ރާއްޖޭގެ އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމުގެ ހުވާ ކުރެއްވުމާއި ވެރިކަމުގެ ކަންކަން އޮންނަ އުސޫލުން އަމާން ކަމާއި އޮމާން ކަމާއިއެކު ކުރިއަށް ގެންދިއުމަށް ރައްޔިތުންގެ މަޖިލީހުގެ ފުރިހަމަ އެއްބާރުލުން ލިބިގެންދާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގައި އިއްޔެ ޑރ. މުއިއްޒާއިއެކު ބޭއްވި ބައްދަލުވުމާއި ގުޅޭގޮތުން މަޖިލިސް މެމްބަރުންނަށް މައުލޫމާތު ދެއްވަމުން ރައީސް ނަޝީދު ވިދާޅުވީ ޑރ. މުއިއްޒު ހުވާ ކުރެއްވުމާއި ސަރުކާރާއި ހަވާލު ވުމުގެ އެންމެހާ ކަންކަން ވީހާވެސް އަމާން ކަމާއިއެކު ކުރިއަށް ގެންދިއުމަށް ފުރިހަމަ އެއްބާރުލުން ދެއްވާނެކަމުގެ ޔަގީންކަން ދެއްވާފައިވާކަށް ރައީސް ނަޝީދު ވިދާޅުވިއެވެ.
އެބައްދަލުވުުގައި އަޅުގަނޑު ޑރ. މުއިއްޒަށް ޔަގީންކަން އެރުވިން ރައްޔިތުންގެ މަޖިލީހުން އެބޭފުޅާގެ ހުވާ ކުރެއްވުމާއި އަދި ސަރުކާރު ފަށާ ގަތުމާއި ގުޅޭގޮތުން ކޮށްދޭންޖެހޭ ކަންކަމަށް، މިމަޖިލީހުގެ ތަރުތީބު ތަކުގެ ތެރެއިން އަޅުގަނޑުމެން އެއްބާރުލުން ދެމުން ގެންދާނެކަމަށް.
– ރައީސް ނަޝީދު ވިދާޅުވިއެވެ.
މިބައްދަލުވުމާއި ގުޅޭގޮތުން ރައީސް ނަޝީދު ވިދާޅުވީ ބަރުލަމާނީ ނިޒާމުގެ ވޯޓާއި ގުޅޭގޮތުންވެސް މަޝްވަރާ ކުރެވުނު ކަމަށެވެ. އެގޮތުން މިހާރު އެވޯޓު ނެގުމަށް އެކަމަށް ވަކާލާތު ކުރާ ޑިމޮކްރެޓްސްގެ މެމްބަރުންވެސް ބޭނުން ނުވާކަމަށް ދެންނެވި ކަމަށެވެ. ނަމަވެސް ރައީސް މުއިއްޒު ރިޔާސީ ނިޒާމެއްގެ ތެރެއިން މަސައްކަތް ފެއްޓުމަށް ފަހު ނިޒާމީ ވޯޓު ނެގުމާއިމެދު ވިސްނުން ހުންނެވި ގޮތަކަށް ސުވާލު ކުރެއްވި ކަމަށެވެ. މަޖިލިސް ރައީސް ވިދާޅުވީ މިކަމުގައި މިވަގުތު ވޯޓަށް ނޭހި ނަމަވެސް ފަހުން އެވޯޓު ނެގިދާނެކަމަށް ޑރ. މުއިއްޒުވެސް ގަބޫލުފުޅު ކުރައްވާ ކަމަށެވެ.
މި ބައްދަލުވުމުގައި ޑރ. މުޢިއްޒުގެ ނައިބު ރައީސް އަދި ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފްއާއި ޓްރާންސިޝަނަލް ކޮމިޓީގެ ލީޑަރަކަށް މުޢިއްޒުގެ ފަރާތުން ހަމަޖެއްސެވި ޢަބްދުއްރަޙީމް ވެސް ވަނީ ބައިވެރިވެވަޑައި ގަންނަވާފައެވެ. އަދި މަޖިލީހުގެ މެޖޯރިޓީ ލީޑަރު މުޙައްމަދު އަސްލަމާއި، މައިނޯރިޓީ ލީޑަރު ޢަލީ އާޒިމްގެ އިތުރުން މަޖިލީހުގެ ނައިބު ރައީސް އީވާ ވެސް މިބައްދަލުވުމުގައި ބައިވެރިވެވަޑައިގެންނެވިއެވެ.
ޕީޕީއެމް/ޕީއެންސީގެ ފަރާތުން ޑރ. މުޢިއްޒު އިންތިޚާބުވުމާއިއެކު، ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަދައްކަވަމުން ވެސް، ޑރ. މުޢިއްޒު ވަނީ ޓްރާންސިޝަނަލް ޕީރިއެޑުގައި ދެއްވަން ޖެހޭ އެއްބާރުލުމެއް ދެއްވުމަށް މަޖިލީހުގެ މެންބަރުންގެ ކިބައިން އެދި ވަޑައިގަންނަވާނެ ކަމަށް ވިދާޅުވެފައެވެ.
ޑރ. މުއިއްޒުގެ ވެރިކަމުގެ ހުވާ ކުރައްވާނީ ނޮވެމްބަރު މަހުގެ 17 ވަނަ ދުވަހުއެވެ. ރައީސަށް ހުވާ ލައި ދެއްވާނީ އުއްތަމަ ފަނޑިޔާރެވެ.
