ވެރިކަމުގެ ނިޒާމް ބަދަލު ކުރަން އުޅުމަކީ އިންތިޚާބީ ރައީސް ޑރ. މުއިއްޒުއާއި ދެކޮޅަށް އެމްޑީޕީގެ ކުރީގެ ރައީސް މުހައްމަދު ނަޝީދު ގެންނަވަން އުޅުއްވާ ބަޢާވާތެއްގެ ގޮތުގައި އެމްޑީޕީގެ ގައުމީ މަޖިލިހުގެ މެމްބަރުން ސިފަ ކޮށްފިއެވެ.
ރާއްޖެ ޑިމޮކްރަޓިކް ނިޒާމު ބަލައިގަތުމަށްފަހު ބަލައިގެންފައިވާ ރިޔާސީ ނިޒާމު ބަދަލުކޮށް ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ނުކުރުމަށް އެމްޑީޕީގެ ގައުމީ މަޖިލިހުގެ ސާފު މެޖޯރިޓީން ރޭ ވަނީ ފާސްކޮށްފައެވެ.
އެމްޑީޕީގެ ކުރީގެ ރައީސް މުހައްމަދު ނަޝީދު ބޭނުންފުޅުވެގެން ރާއްޖޭގެ ވެރިކަމުގެ ނިޒާމު ބަދަލު ކުރުމަށް ރައްޔިތުންގެ މަޖިލީހުން ގަރާރެއް ފާސްކުރުމާއި ގުޅިގެން ނިޒާމު ބަދަލު ކުރުމާއި ގުޅޭގޮތުން އެމްޑީޕީން ރަސްމީ ނިންމުމެއް ނިންމުމަށް ރޭ ބޭއްވުނު އެޕާޓީގެ ގައުމީ މަޖިލިހުގެ ބައްދަލުވުމުގައި ބައިވެރި 90 މެމްބަރުންވެސް ވޯޓު ދީފައިވަނީ ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކުރުމާއި ދެކޮޅަށެވެ.
ރޭގެ ގައުމީ މަޖިލިސް ޖަލްސާގައި ބަރުލަމާނީ ނިޒާމަކާއި އެއްކޮޅަށް ވާހަކަ ދައްކާފައިވަނީ އެމްޑީޕީގެ ޕާލަމެންޓްރީ ގުރޫޕުގެ މެމްބަރު ޖާބިރު ގިނިކަންޏާއެވެ. އެހެންނަމަވެސް ބަރުލަމާނީ ނިޒާމަކަށް ތާއީދުކޮށް ވާހަކަ ދެއްކެވުމަށްފަހު އޭނާވަނީ ގައުމީ މަޖިލިހުގެ ޖަލްސާ ދޫކޮށް ވަޑައިގެންފައެވެ.
ރޭ ބޭއްވުނު ގައުމީ މަޖިލިހުގެ ބައްދަލުވުމުގައި ވާހަކަ ދައްކަވަމުން މިހާރުގެ ފޮރިން މިނިސްޓަރ ޝާހިދު ވިދާޅުވީ، އާ ރައީސަކު އިންތިޚާބު ވެފައި ވަނިކޮށް، ނިޒާމު ބަދަލު ކުރުމަކީ އާ ރައީސް އިށީންނަވަން ހަމަޖެހިފައިވާ ގޮނޑި ދަމައިގަތުން ކަހަލަ ކަމެއްގެ ގޮތުގައެވެ. އަދި ހަމަ މި ބައްދަލުވުމުގައި ވާހަކަ ދައްކަވަމުން މިހާރުގެ ހައުސިން މިނިސްޓަރ އަސްލަމް ވިދާޅުވީ، އިންތިހާބުން ބަލިވުމުން މޮޅުވި މީހުން ދުއްވާލަން ގޮތެއް ހޯދަން ނުޖެހޭ ކަމަށެވެ.
އިންތިހާބުން ބަލި ވުމުން މޮޅުވި މީހުންނާ ދެކޮޅަށް އަދި ރައްޔިތުންގެ ނިންމުމަށް ގޮންޖަހައި އެ ނިންމުން ނިންމަން އިންޖިނިއާޑް ގޮތެއް ހޯދަން ނުޖެހޭ ކަމަށާއި، އަދި އެ އުސޫލު ގަބޫލު ނުކުރައްވާ ކަމަށާއި އެއީ ޑިމޮކްރެޓިކް ހަމައެއްވެސް ނޫން ކަމަށްވެސް އަސްލަމް ވިދާޅުވިއެވެ.
އަޅުގަނޑެއް ތާއިދެއް ނުކުރަން ހަމަ ޔަގީނުންވެސް ރައްޔިތުން ނިންމި ނިންމުމަށް ގޮންޖަހާފަ އެހެން ގޮތަކަށް މި ވެރިކަން ބަދަލުކުރުމަށް އެއީ އެއްވެސް ބަޔަކު މި ޕާޓީ ތެރެއިން ވެސް މަސައްކަތް ކުރަން އަޅުގަނޑެއް ނޭދެން. އަދި އެކަމަކަށް ތާއިދެއްވެސް ނުކުރާނަން.
އަސްލަމް ވިދާޅުވި އެވެ.
މިބައްދަލުވުމުގައި ވާހަކަ ދެއްކެވި ގައުމީ މަޖިލިހުގެ ގިނަ މެމްބަރުން ވިދާޅުވެފައިވަނީ ބޭނުމީ ބަރުލަމާނީ ނޫން ގޮތެއް ކަމަށާއި، އަދި ނަޝީދު ނޫންގޮތެއްވެސް ކަމަށެވެ.
