ރާއްޖޭގެ ވެރިކަމުގެ ނިޒާމް ބަދަލު ކުރުމަށް މަޝްވަރާ ކުރުމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ކުރީގެ ރައީސް އަދި އިދިކޮޅު ޕީޕީއެމް-ޕީއެންސީގެ ލީޑަރު ޔާމީން އަބްދުލްގައްޔޫމްގެ އަރިހަށް ވަޑައިގެންނެވުމަށް އެދުމުން ބައްދަލު ކުރައްވަން އިއުތިރާޒު ކުރެއްވުމުން ބައްދަލުވާ ގޮތެއް ނުވިއެވެ.
އިއްޔެ ޑިމޮކްރެޓްސްގެ ސަޕޯޓަރުންނާއި ބައްދަލުކުރައްވައި ނަޝީދު ވިދާޅުވީ މިއަދު ހުއްޓިގެން ތިބީ ފަސޭހަ ހަތަރުއަގޯޅިއެއްގެ ކަންމަތީގައި ނޫން ކަމަށެވެ. ގައުމު މިހާރު އޮތް ހާލަތުން އަނެއް ހާލަތަށް ބަދަލުވާ ދަނޑިވަޅުތަކެއް އަބަދުވެސް އެމަނިކުފާނު ހިތަށް އަރާވަޑައިގަންނާ ކަމަށް ވިދާޅުވިއެވެ.
ނަޝީދު ވިދާޅުވީ ވެރިކަމުގެ ނިޒާމަށް ބަދަލެއް ރައްޔިތުން ގެންނަން ބޭނުންވާކަން ކުރިއަށް އޮތްތާއި ހާމަވެގެންދާނެ ކަމަށެވެ. ވެރިކަމުގެ ނިޒާމަށް ބަދަލެއް ގެންނަ އިރުގައި ކުރީގެ ރައީސް ޔާމީންއާ ވެސް މިކަމުގައި މަޝްވަރާކުރުން ބޭނުންތެރި ކަމަށް ވިދާޅުވިއެވެ.
މަޖިލީހުން އެދިގެން ކަރެކްޝަނުން ރައީސް ޔާމީނާއި ރައީސް ނަޝީދު ބައްދަލު ކުރުމުގެ އިންތިޒާމު ހަމަޖައްސަވަން ކުރެއްވި މަސައްކަތުގައި ރައީސް ޔާމީން ވަނީ ރައީސް ނަޝީދާއި ބައްދަލު ކުރައްވަން އިއުތިރާޒު ކުރައްވާކަމަށް ވިދާޅުވެފައެވެ.
ރައީސް ނަޝީދު ވިދާޅުވެފައިވަނީ ރައީސް ޔާމީންގެ އަރިހުގައި ދަންނަވަން ބޭނުންވަނީ ވެރިކަމުގެ ނިޒާމަށް ބަދަލެއް ގެންނަނަށް 25 ވަނަ ދުވަހުގެ ކުރިން ވޯޓު ނެގުމުގައި އެމަނިކުފާނު ދެކެވަޑައިގަންނަވާ ގޮަތަކާއި އަދި ޑިމޮކްރެޓްސްއަށް އެހީތެރިވެދެއްވާތޯ ކަމަށެވެ. ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަކީ ރައީސް ޔާމީން ތާއީދު ކުރާކަމެއް ނޫންކަން މީގެ ކުރިން އެކި ފަހަރު މަތީން ވަނީ ހާމަ ކުރައްވާފައެވެ.
ރައީސް ނަޝީދާއި، ޑިމޮކްރެޓްސް އިން ގެންދަނީ ބަރުލަމާނީ ނިޒާމުގެ ވޯޓުގެ ކަންތަކުގައި އެމްޑީޕީއާއި ވާހަކަ ދައްކަވަމުންނެވެ. ނަމަވެސް މިހާތަނަށް އަދި އެމްޑީޕީން އެކަމުގައި ޖަވާބެއް ދީފައި ނުވެއެވެ. މިވޯޓާއި ގުޅިގެން އިލެކްޝަނުން ބުނެފައިވަނީ މިވޯޓު ނެގުމަށްޓަކައި 30 ދުވަހުގެ މުއްދަތެއް ދޭންޖެހޭ ކަމަށެވެ. އެނޫން ގޮތަކަށް ބަރުލަމާނީ ނިޒާމުގެ ވޯޓެއް ބޭއްވެން ނެތްކަމަށެވެ.
