މޯލްޑިވްސް މީޑިއާ ކައުންސިލް (އެމްއެމްސީ)އިން ދޭ ނޫސްވެރިކަމުގެ އިނާމު ދިނުމުގެ ހަފުލާ މިރޭ ބާއްވަން ނިންމައިފި އެވެ.
މި އިނާމާ ބެހޭގޮތުން މަޢުލޫމާތު ދިނުމަށް އެމްއެމްސީން ބޭއްވި ނޫސްވެރިންގެ ބައްދަލުވުމުގައި ނޫސްވެރިކަމުގެ އިނާމު 2019ގެ ކޮމިޓީގެ މުގައްރިރު އަޙްމަދު އަމީން މުޙައްމަދު ވިދާޅުވީ ހަފްލާ އޮންނާނީ ޕީއެސްއެމްގެ މަލްޓި ޕާޕަސް ހޯލްގައި ކަމަށެވެ. އަދި ހަފުލާ ބޭއްވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހުއްދަދީފައިވާ ކަމަށާއި ހަފުލާ ކުރިއަށްދާނީ އެޗްޕީއޭގެ ގައިޑްލައިނާ އެއްގޮތަށް ކަމަށްވެސް އަމީން ވިދާޅުވިއެވެ.
ނޫސްވެރިކަމުގެ އިނާމު ދިނުމުގެ ހަފުލާގައި ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހުގެ ހާއްސަ ވީޑިއޯ މެސެޖެއް ގެނެސްދިނުމަށް ހަމަޖެހިފައި ވާކަމަށް އެމްއެމްސީން މައުލޫމާތު ދެއެވެ.
މިއަހަރުގެ އެވޯޑު 11ކެޓަގަރީން 19 ދާއިރާއަކުން ދިނުމަށްވަނީ ހަމަޖެހިފައެވެ. މި 11 ކެޓަގަރީން 54 ނޫސްވެރިއެއްގެ، 80 ހުށައެޅުމެއް ލިބިފައި ވާކަމަށް އެމްއެމްސީން މައުލޫމާތު ދެއެވެ.
މިއަހަރުގެ އިނާމު ދިނުމަށް ހަމަޖެހިފައިވާ 11 ކެޓަގަރީއަކީ:
1 – ތަޙްގީގީ ނޫސްވެރިކަން (އިންވެސްޓިގޭޓިވް ޖާނަލިޒަމް) – ޕްރިންޓް، އޮންލައިން
2 – އިޖުތިމާއީ، ތާރީހާއި ސަގާފަތް، ފަންނުވެރިކަން – ޕްރިންޓް، އޮންލައިން
3 – ތިމާވެއްޓާއި ދެމެހެއްޓެނެވި ތަރައްގީ – ޕްރިންޓް، އޮންލައިން ކެޓެގަރީ
4 – ސިޔާސީ ދާއިރާ – ޕްރިންޓް، އޮންލައިން
5 – ޝަރުއީ އަދި ގާނޫނީ – ޕްރިންޓް، އޮންލައިން
6 – ވިޔަފާރިއާއި އިގްތިސޯދު – ޕްރިންޓް، އޮންލައިން، ބްރޯޑްކާސްޓިން
7 – ކުޅިވަރު – ޕްރިންޓް، އޮންލައިން
8 – ފީޗާ ރިޕޯޓް – ޕްރިންޓް، އޮންލައިން، ބްރޯޑްކާސްޓިންގ
9 – ފޮޓޯ ޖާނަލިޒަމް – ޕްރިންޓް، އޮންލައިން
10 – ވީޑިއޯ ޖާނަލިޒަމް – ބްރޯޑްކާސްޓިން
11 – އެންމެ އުންމީދީ ނޫސްވެރިޔާ
މިދިޔަ އަހަރު ނޫސްވެރިކަމުގެ އިނާމު ދީފައިވަނީ 9 ދާއިރާއަކުންނެވެ. މިއީ ނޫސްވެރިންގެ އަގު ވަޒަންކުރުމުގެގޮތުން މޯލްޑިވްސް މީޑިއާ ކައުންސިލުން 2014 ވަނަ އަހަރުން ފެށިގެން ދެމުން އަންނަ އިނާމެކެވެ.
