އަންނަ ހޮނިހިރު ދުވަހު އޮންނަ ރިޔާސީ އިންތިހާބުގައި ލ. މާބައިދޫން ވަރަށް ފުރިހަމަ ނަތީޖާއަކަށް އުންމީދު ކުރައްވާ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މާބައިދޫގައި ތިބި ޕީޕީއެމް/ޕީއެންސީގެ ސަޕޯޓަރުންނާ ބައްދަލު ކުރައްވައި މުއިއްޒު ވިދާޅުވީ އެ ރަށުގެ ރައްޔިތުންގެ ހުރި ފޯރި އާއި ޖޯޝު ފެނިގެން ގޮސްފައިވާ ކަމަށެވެ. އެހެންވެ، އެ ރަށާއި އަތޮޅަކީ ވެސް އޭނާ އަށް ވޯޓު ދިނުމުގައި ފުރިހަމަ ނަމޫނާއަކަށް ވާނެ ރަށްތަކަކަށް ވާނެ ކަމަށެވެ.
މުއިއްޒު ވިދާޅުވީ މާބައިދޫ ސްކޫލަށް ބަލާ އިރު، ޖާގަ އިތުރުކޮށް މަލްޓި ޕާޕަސް ހޯލްއެއް އަޅަން ޖެހޭ ކަމަށެވެ. އަދި މާބައިދޫގެ ފުޓްބޯޅަ ދަނޑުގައި ޓާފް އަޅައި ފުޓްސަލް ދަނޑެއް ގާއިމުކޮށް ދެއްވާނެ ކަމަށް މުއިއްޒު ވިދާޅުވިއެވެ. ގިރާ ސަރަހައްދަކީ ވައުދެއް ނޫން ކަން ފާހަގަ ކުރައްވައި މުއިއްޒު ވިދާޅުވީ ސަރުކާރުން ނަގާ ގްރީން ޓެކްސްއަކީ ރަށްރަށުގެ ގޮނޑުދޮށް ހިމާޔަތް ކުރުމާއި ކުނި މެނޭޖް ކުރުމަށް ބޭނުން ކުރާނެ ފައިސާ ކަމަށެވެ.
އެހެންވީމަ މި ރަށުގެ ގިރާ ސަރަހައްދަކީ ހައްލެއް ގެނެސްދޭނެ ކަމެއް ކަމަށް ދަންނަވަން.
– މުއިއްޒު ވިދާޅުވިއެވެ.
މުއިއްޒު ވަނީ ބީއެމްއެލްގެ އޭޓީއެމްއެއް މާބައިދޫގައި ގާއިމުކޮށް ދެއްވާނެ ކަމަށެވެ. އަދި މުޅި ރަށަށް ބަލާއިރު، މުސްތަގްބަލަށް ކުރަން ޖެހޭ ކަންކަން ހުރި ކަމަށާއި އެގޮތުން ގެދޮރުވެރިކަމާއި އާމްދަނީ ލިބޭ ގޮތްތައް ހޯދަން ޖެހޭ ކަމަށް އޭނާ ވިދާޅުވިއެވެ. ލ. އަތޮޅުގައި ޓޫރިޒަމް މަޝްރޫއެއް ހިންގުމަށް މުއިއްޒު ރޭ ވަނީ ވައުދުވެވަޑައިގެންފައެވެ.
