އަންނަ ހޮނިހިރު ދުވަހު ބާއްވާ ރިޔާސީ އިންތިޚާބުގައި ވާދަކުރައްވާ 8 ކެންޑިޑޭޓުންގެ މެދުގައި ބައްވާ ބަހުސް މިރޭ އޮންނާނެއެވެ.
މިރޭ ބިލަބޮންގް ހައި އިންޓަނޭޝަނަލް ސްކޫލުގައި ބާއްވާ މިބަހުސަކީ ސަންގު ޓީވީން އިންތިޒާމު ކޮށްގެން ބާއްވާ ބަހުސެކެވެ. ދައުލަތުގެ މީޑިއާއިން މިފަދަ ބަހުސެއް ބޭއްވުމަށް މަސައްކަތް ކުރި ނަމަވެސް އެމްޑީޕީގެ ރިޔާސީ ކެންޑިޑޭޓް ރައީސް ޞާލިހު ބައިވެރި ނުވާތީ ބަހުސް ވަނީ ކެންސަލް ކޮށްފައެވެ.
މިރޭ ސަންގުން ބާއްވާ ބަހުސްގައި އިންތިޚާބުގައި ވާދަކުރާ 8 ކެންޑިޑޭޓުންވެސް ބައިވެރިވެއެވެ. ފުރަތަމަ ސަންގު ބަހުސް ބޭއްވުމަށް ހަމަޖެއްސީ އެހެން ޑިމޮކްރެޓިކް ގައުމުތަކުގައި ރިޔާސީ ބަހުސް ބާއްވާފަދައިން، ހަމައެކަނި ސިޔާސީ ޕާޓީތަކުގެ ކެންޑިޑޭޓުންގެ މެދުގައެވެ. އެހެން ނަމަވެސް ރައްޔިތުންގެ ހިޔާލަށް ހުޅުވާލުމަށްފަހު، ރައްޔިތުން އެދުނު ގޮތަށް މިހާރު ސަންގުން ވަނީ މި ބަހުސްގައި ހުރިހާ ކެންޑިޑޭޓުންވެސް ބައިވެރިކުރުމަށް ނިންމާފައެވެ.
ޕާޓީތަކުގެ ޓިކެޓްގައި ނިކުންނެވި ބޭފުޅުން:
1- ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް / މުހައްމަދު އަސްލަމް (އެމްޑީޕީ)
2- ޑރ. މުހައްމަދު މުޢިއްޒު / ޙުސެއިން މުހައްމަދު ލަޠީފް (ޕީއެންސީ)
3- ގާސިމް އިބްރާހިމް / ޑރ. އަމީން އިބްރާހިމް (ޖުމްހޫރީ ޕާޓީ)
4- މުހައްމަދު ނާޒިމް / ޑރ. އަހުމަދު އަދީލް ނަޞީރު (އެމްއެންޕީ)
5- އިލްޔާސް ލަބީބް / ހުސެއިން ޢަމްރު (ދަ ޑިމޮކްރެޓްސް)
އަމިއްލަ ގޮތުން ވާދަކުރައްވާ ކެންޑިޑޭޓުން:
1- އަޙްމަދު ފާރިސް މައުމޫން / ޑރ. އަބްދުއްޞައްތާރު ޔޫސުފް
2- އުމަރު ނަސީރު / މުހައްމަދު ސަލީމް
3- ޙަސަން ޒަމީލް / މަރިޔަމް ޢަލީމް
ބަހުސް އޮންނާނި މިރޭ 21:00 އިން 23:00 އަށެވެ. އިންތިޚާބުތަކާ ބެހޭ އާންމު ގާނޫނުގެ 30 ވަނަ މާއްދާގައިވާ ގޮތުގެމަތިން، ރިޔާސީ ކެންޑިޑޭޓުންނަށް ޚާއްޞަކޮށްގެން ބްރޯޑްކާސްޓަރުން އިންތިޒާމުކުރާ ކަންކަމުގައި، ހުރިހާ ކެންޑިޑޭޓުންނަށް ހަމަހަމަ ފުރުޞަތު ދިނުމަކީ ލާޒިމްކަމެކެވެ. އެހެންކަމުން، ކެންޑިޑޭޓުންނަށް ޚާއްޞަކޮށްގެން، ބަހުސެއް ބޭއްވިޔަސް، އެހެން ޕްރޮގްރާމެއް އިންތިޒާމް ކުރިނަމަވެސް، ބްރޯޑްކާސްޓަރުން އެކަމެއް ކުރައްވަންވާނީ، ހަމަހަމަ ފުރުސަތު ފަހިވާގޮތެއްގެ މަތީންކަމަށް އިލެކްޝަންސް ކޮމިޝަނުން ވަނީ ފާހަގަކުރައްވާފައެވެ.
ރާއްޖޭގެ ގާނޫނޫ އަސާސީއަށް ބަދަލު ގެނެސް މަލްޓި ޕާޓީ ސިސްޓަމް ތައާރަފުކުރި ފަހުން މީ އެންމެ ގިނަ ބަޔަކު ރައީސްކަމަށް ވާދަކުރާ ފުރަތަމަ ފަހަރެވެ. ފެހި ޤާނޫނު އަސާސީގެ ދަށުން 2008 ވަނަ އަހަރު ބޭއްވި ފުރަތަމަ ރިޔާސީ އިންތިޚާބުގައި ވާދަކުރީ 6 ކެންޑިޑޭޓުންނެވެ. ނަމަވެސް މިފަހަރުގެ ރިޔާސީ އިންތިޚާބަށް 8 ކެންޑިޑޭޓުން ވާދަކުރައްވައެވެ. އޭގެތެރޭގައި ހިމެނެނީ ސިޔާސީ ޕާޓީގެ ޓިކެޓްގައި ރިޔާސީ ރޭހަށް ނިކުމެވަޑައިގަތް 5 ކެންޑިޑޭޓަކާއި އަމިއްލަ ގޮތުން ވާދަކުރާ 3 ކެންޑިޑޭޓުންނެވެ.
