އަންނަ ހުކުރު ދުވަހުގެރޭ އެމްޑީޕީގެ ބޮޑު ޖަލްސާ މާލޭގައި ބާއްވާތީ ރިޔާސީ ބަހުސް ފަސް ކުރަން އެމްޑީޕީން އެދިއްޖެއެވެ.

ރައީސް ޞާލިހުގެ ތަރުޖަމާން މާރިޔާ ދީދީ މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވީ އެމްއެންޔޫއިން އިންތިޒާމުކޮށް ޕީއެސްއެމްއާއި ގުޅިގެން ބާއްވާ ބަހުސް އޮންނަނީ ސެޕްޓެމްބަރު 1 ގައިކަމަށެވެ. ހަމަ އެރޭ އެމްޑީޕީގެ ބޮޑު ޖަލްސާއެއް މާލޭގައި ބޭއްވުމަށް ހަމަޖެހިފައިވާކަމަށެވެ.

އެމްޑީޕީގެ ޖަލްސާތަކާއި އިވެންޓުތަކަކީ ދުރާލައި ރޭވިގެން ކުރިއަށްދާ ކަންކަމަށްވާއިރު މިކަންކަން ފަސްކުރެވޭނެ ގޮތެއް ނޯންނާނެކަމަށް މަރިޔާ ވިދާޅުވިއެވެ. އަދި ބަހުސް ފަސް ކުރުމަށް އެމްއެންޔޫއާއި ވާހަކަ ދައްކަމުން ދާކަމަށް މާރިޔާ ވިދާޅުވިއެވެ.

އަޅުގަނޑު ދަންނަވާނީ ޖަލްސާ އޮންނާނެ. ޖަލްސާ ފަސް ނުކުރާނެ. އަޅުގަނޑުން ވާނީ ބަހުސް ރީޝެޑިއުލް ކުރަން އެމްއެންޔޫގައި އެދިފަ.

– މާރިޔާ ވިދާޅުވިއެވެ.

މާރިޔާ މިހެން ވިދާޅުވިއިރު، ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނަށް ޚާއްޞަކޮށްގެން ޕަބްލިކް ސާރވިސް މީޑިއާ، ޕީއެސްއެމް އާއި ޤައުމީ ޔުނިވާސިޓީ ގުޅިގެން ބާއްވާ ރިޔާސީ ބަހުސްގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް ބައިވެރިވެވަޑައިގަންނަވާނެކަމަށް އިއްޔެ އެމްޑީޕީން ވަނީ ބުނެގައެވެ.

ޕީއެސްއެމާއި ޤައުމީ ޔުނިވާސިޓީ ގުޅިގެން އިންތިޒާމްކުރާ ބަހުސްގައި އިންތިޚާބުގައި ވާދަކުރައްވާ 8 ކެންޑިޑޭޓުންވެސް މިހާރު ވަނީ ދަޢުވަތު ޤަބޫލުފުޅު ކުރައްވާފައެވެ. ރިޔާސީ ބަހުސް އޮންނާނީ ސެޕްޓެމްބަރު 1 ވަނަ ދުވަހުގެ ރޭ 21:00ގައި ޕީއެސްއެމްގައެވެ.

ބަހުސް ލަސްކުރަން އެމްޑީޕީން އެދުނުއިރު، އެންމެ ފަހުން އެމްއެންޔޫއިން 2018 ވަނަ އަހަރު ބޭއްވި ރިޔާސީ ބަހުސްގައިވެސް ރައީސް ޞާލިހު ބައިވެރިވެފައި ނުވެއެވެ.