ޖުލައި 15 ވަނަ ދުވަހު ރާއްޖޭގެ ބޯޑަރު ހުޅުވާލިއިރު، ދުވާލަކު ރާއްޖެ އަންނަ މީހުންގެ އަދަދު ހުރީ ވަރަށް ދަށުގައެވެ. މިކަން ވީ ފަތުރުވެރިކަމުގެ ދާއިރާގެ އެންމެންގެ ހިތަށް ވެސް ނުތަނަވަސްކަން ގެނުވި ކަމަކަށެވެ. ނަމަވެސް އިއްޔެ އަނެއްކާވެސް މިވަނީ ފަތުރުވެރިކަމުގެ ދާއިރާގައި މަސައްކަތް ކުރާ އެންމެނަށް ހިނިތުންވުން ގެނުވާފައެވެ.
ކޯވިޑް-19ގެ ސަބަބުން ރާއްޖޭގެ ބޯޑަރު ބަންދުކުރުމަށްފަހު ހުޅުވި ފަހުން އެއް ދުވަހު އެންމެ ގިނަ މީހުން ރާއްޖެ އައިސްފައި މިވަނީ އިއްޔެ އެވެ. އިއްޔެ ރާއްޖެއަށް 2900 ފަތުރުވެރިން އައިސްފައިވާ ކަމަށާއި މިއީ އައު ރެކޯޑެއް ކަމަށް ޓޫރިޒަމް މިނިސްޓަރ ޑރ. ޢަބްދުﷲ މަޢުސޫމް ރޭގަ ވަނީ ވިދާޅުވެފައެވެ.
މިކަން ފާހަގަކޮށް މިނިސްޓަރ ކުރެއްވި ޓްވީޓުގައި ވިދާޅުވީ ބޯޑަރު ހުޅުވާލިތާ 20 ހަފްތާ ތެރޭ ދުވާލެއްގެ މައްޗަށް އަންނަ ފަތުރުވެރިންގެ އަދަދު ސުމަކުން 3000 އަށް ގެންދެވުނީ ފަތުރުވެރިކަމުގެ ދާއިރާގެ އެންމެންގެ ގުޅިގެން ކުރި މަސައްކަތުން ކަމަށެވެ.
Congratulations travel and tourism industry. Another #NewRecord of daily arrivals to #Maldives since border reopened. Today tourist arrivals 2900 plus.
How do we thank you all for bringing daily arrivals from zero to near 3000 in just 20 weeks?
Thank you all very very much!!— Abdulla Mausoom (@Mausoom_Maus) December 5, 2020
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖޭގެ ބޯޑަރު ހުޅުވާލި ޖުލައިމަހު ރާއްޖެއަށް އެވްރެޖްކޮށް ކޮންމެ ދުވަހަކު އައިސްފައިވަނީ 100 ވަރަކަށް ފަތުރުވެރިންނެވެ. ނަމަވެސް ނިމުނު ނޮވެމްބަރުމަހު ރާއްޖެއަށް އެވްރެޖްކޮށް ކޮންމެ ދުވަހަކު 1192 ފަތުރުވެރިން ވަނީ އައިސްފައެވެ.
ރާއްޖެ އަންނަ ފަތުރުވެރިން އިތުރެވެފައި މިވަނީ ރާއްޖެއަކީ މިފަދަ ވަގުތެއްގައި އެންމެ ރައްކާތެރި ކަމާއެކު ޗުއްޓީ ހޭދަކޮށްލެވޭނެ މަންޒިލް ކަމަށް ވުމުންނެވެ. އަދި ރާއްޖެ އަންނަން ބޭނުންވާ މީހުން އިތުރު ވީވަރަކަށް އެއަރލައިން ތަކުން ރާއްޖެއަށް ކުރާ ދަތުރުތައްވެސް އަންނަނީ އިތުރު ކުރަމުންނެވެ. އެގޮތުން ޖުލައި 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލި ފަހުން ރާއްޖެއަށް ދަތުރުކުރާ އެއަރލައިންގެ އަދަދު މިވަނީ 19 އަށް އިތުރު ވެފައެވެ. ޓޫރިޒަމް މިނިސްޓްރީން ލަފާކޮށްފައިވާ ގޮތުގައި މި އަހަރު ނިމެންވާއިރަށް ރާއްޖެއަށް ދަތުރުކުރާ އެއަރލައިންގެ އަދަދު 26 އަށް އަރާނެއެވެ.
