ސިޔާސީ ޕާޓީތަކުން ކުރާ ސިޔާސީ މަސައްކަތަށް ރާއްޖޭގައި ރަޖިސްޓްރީ ވެފައިވާ ޖަމްއިއްޔާތަކުން ނުވަނުމަށް ހޯމް މިނިސްޓަރ އިމްރާން ގޮވާލައްވައިފިއެވެ.
އިމްރާން މިހެން ވިދާޅުވީ ކޮން ޖަމްއިއްޔާއަކުން ސިޔާސީ މަސައްކަތެއްގައި އުޅުއްވާތީކަން ވިދާޅެއް ނުވެއެވެ. ނަމަވެސް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުއަކީ ޖަމްއިއްޔަތުލް ސަލަފްގެ ކެންޑިޑޭޓެއްކަމަށް ވިދާޅުވެ އިމްރާން ތާއީދު ކުރައްވާ އެމްޑީޕީގެ ރިޔާސީ ކެންޑިޑޭޓްގެ ތަރުޖަމާން މާރިޔާ ދީދީވަނީ ވަރަށް ބޮޑަށް ފާޑު ވިދާޅުވެފައެވެ.
އިމްރާން ވިދާޅުވީ ރާއްޖޭގައި މިވަގުތު ކަނޑައެޅިފައިވާ ނިޒާމުގެ ތެރެއިން ސިޔާސީ މަސައްކަތް ކުރާނީ ސިޔާސީ ޕާޓީތަކުން ކަމަށެވެ. އެކަންކަމުގެ ތެރެއަށް ރާއްޖޭގައި އުފެދިފައިވާ ޖަމްއިއްޔާ ޖަމާއަތްތަކުން ވަނުމަކީ ރަނގަޅު ގޮތެއް ނޫންކަމަށެވެ. ޖަމްއިއްޔާ ޖަމާއަތްތަކުން ކުރަން ކަނޑައެޅިފައިވާ ކަންކަން އެބޭފުޅުން ކުރެއްވުން މާ ރަނގަޅުވާނެކަމަށް އިމްރާން ވިދާޅުވިއެވެ.
މި ރާއްޖެ ހިންގުމަށް މިވަގުތު ކަނޑައެޅިފައިވާ ނިޒާމުގައި ސިޔާސީ މަސައްކަތް ކުރާނީ ސިޔާސީ ޕާޓީތަކުން. ޖަމްޢިއްޔާތަކުން ކުރަންވާނީ ޖަމްޢިއްޔާތަކުން ކުރުމަށް ކަނޑައެޅިފައިވާ ކަންކަން.
– އިމްރާން ވިދާޅުވިއެވެ.
ރިޔާސީ އިންތިޚާބުގައި ޢާންމުކޮށް، ރާއްޖޭގެ ދީނި ޖަމާއަތްތަކާއި، އެނޫންވެސް ޖަމްއިއްޔާ ޖަމާއަތްތަކުން ވަކިވަކި ސިޔާސީ ޕާޓީތަކަކާއި، ކެންޑިޑޭޓުންނަށް ތާއީދުކޮށް އިންތިޚާބު ކާމިޔާބު ކުރުމަށް ސިޔާސީ މަސައްކަތުގައި ޝާމިލުވެފައިވާތަން ފެނިފައިވެއެވެ. ރާއްޖޭގެ ޤާނޫނުތައް ހަމަޖެހިފައިވާ ގޮތުން ސިޔާސީ ޕާޓީތަކުން ކުރާ ސިޔާސީ މަސައްކަތުގައި ޖަމްއިއްޔާ ޖަމާއަތްތަކުން ބައިވެރިވުމަކީ ކުށެއް ނޫނެވެ. އަދި އެފުރުސަތު ބަންދުވާ ގޮތެއްވެސް ނެތެވެ.
