އަނިޔާވެރިނުވެ، ޤައުމު ދަރުވާނުލައި އިންސާފުވެރި ވެރިކަމެއް ކޮށްދެވޭނީ ޖުމްހޫރީ ޕާޓީގެ ލީޑަރު ޤާސިމް އިބްރާހިމަށް ކަމުގައި އެޕާޓީގެ ޑެޕިއުޓީ ލީޑަރު އަހުމަދު ސައުދު ވިދާޅުވެއްޖެއެެވެ.
"ހާސްކަނޑާލާ! ހަމަޖެހޭނެ!" މި ޝިއާރުގެ ދަށުން ކުރިޔަށްގެންދިޔަ ޖަލްސާގައި ވާހަކަދައްކަވަމުން ސައުދު ވިދާޅުވީ، ގައުމަށް ބޭނުންވަނީ އިންސާފުވެރިކަން ހުރި ބޭފުޅެއްކަމަށާއި، އެއީ ޤާސިމް އިބްރާހީމްކަމަށެވެ. އެއީ އެއްވެސް މީހަކަށް އަނިޔާވެރިވެފައިވާ ބޭފުޅެއް ނޫންކަމަށާއި، މީހުން ފެންވަރަކަށް ވަކި ކުލައަކަށް ނުބަލައި ގައުމަށް އެބޭފުޅާ ދަނީ އެހީވަމުންކަމަށް ސައުދު ވިދާޅުވިއެވެ. އަދި ވިދާޅުވީ، ގައުމަށް ބޭނުންވާ ވެރިޔަކީ އެއީކަމަށާއި، ގައުމަށް ދެރައެއް ލިބޭ އިރު ގާސިމް ހުންނަވާނީ އެންމެ ކުރީގައިކަމަށެވެ.
ރާއްޖެއަށް ވޯޓަރ ބަނގްލޯ ތައާރްފްކުރެއްވީ ގާސިމް. ރާއްޖޭގައި ހިލޭ ސްކޮލަޝިޕްދޭން ފެެއްޓެވީ ގާސިމް، މި ހުރިހާ ކަމެއް ފެއްޓެވީ ގާސިމް. ގާސިމް އަބަދުވެސް އިސްކުރައްވަނީ ގައުމު. ގާސިމް ވިދާޅުވި މަގު ހިޔާރުކުރިނަމަ ރާއްޖޭގައި ކޮރަޕްޝަނާއި، ވައްކަމުގެ މައްސަލަތަކެއް ނުގިނގާނެ. މި ކަންކަމަށް ގާސިމް ފުުރުސަތެއް ނުދެއްވާނެ. ގާސިމަކީ އެމަނިކުފާނުގެ ވިޔަފާރި ފައްޓަވައި ރާއްޖޭގެ އޭރުގެ މިލިއަނަރުން ފަހަތަށް ޖެއްސެވި ބޭފުޅެއް. އެހެންވީމަ، ގާސިމަށް 100 މިލިއަނަރުން ނުއުފެއްދޭނެތޯ؟
– ސައުދު ވިދާޅުވިއެވެ.
ރޭގެ ޖަލްސާގައި ދައުދު ވަނީ ޤާސިމްގެ ވެިރކަމެއްގައި ރައްޔިތުންނަށް އުފާފާގަތިކަން ލިބޭނެކަމުގެ ޔަގީންކަން ދެއްވާފައެވެ. އަދި ޤާސިމަކީ އެއްވެސް ތަފާތުކުރުމެއްނެތި ހަމަހަމަ ކަމާއިއެކު ޚިދުމަތް ކޮށްދެވޭނެ ހަމައެކަނި ވެރިޔާކަމަށް ސައުދު ވިދާޅުވިއެވެ.
