އިލެކްޝަންސް ކޮމިޝަނުން އިތުބާރު ނެތްކަމަށް ފާސްކުރިޔަސް އިސްތިއުފާ ނުދެއްވާނެކަމަށް، އެކޮމިޝަންގެ ރައީސްކަމުގެ މަގާމުގައި ހުންނެވި ފުއާދު ތައުފީގު ވިދާޅުވެއްޖެއެވެ.
ފުއާދުގެ އިތުބާރު ނެތްކަމަށް ފާސްވެފައިވަނި، މިމަހުގެ 18 ވަނަ ދުވަހު ބޭއްވި އެކޮމިޝަންގެ ބައްދަލު ވުމެއްގައި، ފުއާދުގެ އިތުބާރު ނެތްކަމަށް ކޮމިޝަންގެ 3 މެމްބަރަކު ވޯޓު ދެއްވުމާއި ގުޅިގެންނެވެ.
ފުއާދުގެ އިތުބާރު ނެތްކަމަށް ފާސްކުރި ބައްދަލުވުމުގައި ކޮމިޝަންގެ 4 މެމްބަރަކު ބައިވެރިވެވަޑައިގެންނެވި އިރު، އެ ބައްދަލުވުމުގެ ރިޔާސަތު ބަލަހައްޓަވާފައިވަނީ ކޮމިޝަންގެ ނާއިބު ރައީސް އިސްމާއިލް ހަބީބެވެ.
ފުއާދުގެ އިތުބާރު ނެތް ކަމަށް ވޯޓު ދެއްވީ އަލީ ނަޝާތާއި ޑރ. މުހައްމަދު ޒާހިރު އަދި މުހައްމަދު އާސިފެވެ.
ފުއާދު ވިދާޅުވެފައިވަނީ ކޮމިޝަންގެ މެމްބަރުންގެ ނިންމުމުގައި ގާނޫނީ ބުރަދަނެއް ނެތްކަމަށާއި، ރިޔާސީ އިންތިޚާބު ކައިރި ވެފައިވަނިކޮށް ކޮމިޝަންގެ ރައީސްކަމުން އޭނާ އިސްތިއުފާ ދެއްވައިފިނަމަ ލިބިގެންދާނީ ބޮޑު ގެއްލުމެއް ކަމުގައެވެ.
I know. I will not resign. I will not let down the people of my country. https://t.co/USJJ5VIZar
— Fuwad Thowfeek (@FuwadThowfeek) July 24, 2023
ފުއާދުގެ މައްޗަށް ނެގި އިތުބާރު ނެތްކަމުގެ ވޯޓާއި ގުޅޭގޮތުން ކޮމިޝަންގެ ނާއިބު ރައީސް ހަބީބް ކުރެއްވި ޓްވީޓެއްގައި ވިދާޅުވީ، އިލެކްޝަންސް ކޮމިޝަންގެ ރައީސް ފުއާދު ކަންތައްތައް ކުރައްވާގޮތުން، ރައީސް އާ މެދު ތިން މެންބަރެއްގެ އިތުބާރު ނެތްކަމަށް، ޖުލައި 18 ވަނަ ދުވަހު ބޭއްވި، ކޮމިޝަންގެ އާންމު ޖަލްސާގެ އަގުލަބިއްޔަތުން ފާސްވި ނަމަވެސް، މި ވޯޓަކީ ކޮމިޝަންގެ ރައީސް ފުއާދު ކޮމިޝަންގެ ރައީސް ކަމުގެ މަގާމުން ދުރު ކުރުމަށް ނެގުނު ވޯޓެއް ނޫން ކަމަށެވެ.
ސަބަބަކީ ގާނޫނީ ގޮތުން ކޮމިޝަންގެ ރައީސް މަގާމުން ވަކިކުރުމުގެ ބާރު މެންބަރުންނަށް ލިބިދީފައި ނުވުން. އެބާރު ލިބިދެނީ ރައްޔިތުންގެ މަޖިލީހަށް،" އޭނާ ވިދާޅުވިއެވެ.
