އެމެރިކާގެ އިންތިޚާބީ ރައީސް ޖޯ ބައިޑް މަގާމްގެ ހުވާ ކުރެއްވުމަށްފަހު، ފުރަތަމަ 100 ދުވަހު އެމެރިކާގެ ރައްޔިތުން މާސްކު އަޅައިގެން އުޅުމަށް އިލްތިމާސް ކުރައްވާނެކަމަށް ވިދާޅުވެއްޖެއެވެ.
ސީއެންއެންއަށް ދެއްވި ޚާއްސަ އިންޓަވިވްއެއްގައި، ބައިޑްން ވިދާޅުވީ، އޭނާ ބޭނުންފުޅު ވަނީ، ވައިރަސް ފެތުރުން ކޮންޓްރޯލް ކުރުމަށްޓަކާ، ވަކި މުއްދަތެއްވަންދެން، އެމެރިކާގެ ހުރިހާ ރައްޔިތުންވެސް މާސްކް އަޅައިގެން އުޅުމަށެވެ.
"އަހަރެން ވެރިކަމުގެ ހުވާ ކުރާދުވަހު، އެމެރިކާގެ ހުރިހާ ރައްޔިތުންގެ ކިބައިންވެސް އެދޭނަން 100 ދުވަސް ވަންދެން މާސްކު އަޅައިގެން އުޅުމަށް،" ބައިޑްން ވިދާޅުވިއެވެ. "ހަމަ އެކަނި އެންމެ 100 ދުވަހަށް، ތާ އަބަދަކަށް ނޫން–100 ދުވަހަށް."
"އަހަރެން އުއްމީދުކުރަނީ، ވެކްސިން ދޭން ފެށުމާއެކު ކޯވިޑް19 ފެތުރޭ އަދަދު ވަރަށް ބޮޑަށް މަދުވެގެން ދާނެ ކަމަށް، އަދި މާސް އަޅައިގެން އުޅެން ފެށުމާއެކު، ބަލިޖެހޭ އަދަތު ބޮޑުތަކުން ދަށަށް ދާނެކަމަށް."
މާސްއަޅައިގެން އުޅުމަށް އެމެރިކާގެ ރައްޔިތުންނަށް އިލްތިމާސް ކުރައްވާނެކަމަށް ބައިޑްން ވިދާޅުވެފައިވަނީ، ކޯވިޑް19ގައި ރެކޯޑް އަދަދަކަށް އެމެރިކާގައި މިހަފްތާގައި މީހުން މަރުވެފައި ވަނިކޮށެވެ. ޖޯން ހޮޕްކިންސް ޔުނިވާސިޓީގެ ހިސާބުތައް ދައްކާގޮތުން، މިފަހްތާގެ އަންގާރަ ދުވަހު އެކަނިވެސް، މިބަލީގަ އެމެރިކާގަ 2،804 މީހުން ވަނީ މަރުވެފައެވެ. މިއީ މިހާތަނަށް އެއް ދުވަހެއްގައި އެމެރިކާގައި އެންމެ ގިނަ އަދަދަކަށް މީހުން މަރުވި ދުވަހެވެ.
މިހާތަނަށް މުޅި ޖުމްލަ 14 މިލިއަން މީހުން ވަނީ އެމެރިކާގައި ކޯވިޑް19 އަށް ޕޮޒިޓިވް ވެފައެވެ. އަދި 275،000 މީހުންވަނީ މިބަލީގައި މަރުވެފައެވެ. ހަމައެއާއެކު، އަންގާރަ ދުވަހު އެކަނިވެސް 200،070 މީހުންވަނީ ކޯވިޑް19 އަށް އެމެރިކާގައި ޕޮޒިޓިވް ވެފައެވެ. މިއީ، މިހާތަނަށް އެއްދުވަހެއްގައި އެންމެ ގިނައިން ބަޔަށް މީހުން ޕޮޒިޓިވްވި ދުވަސް ކަމުގައިވާ ފާއިތުވެދަި ނޮވެމްބަރ 27 ވަނަ ދުވަހަށްފަހު އެގައުމުގައި އެންމެ ގިނަ އަދަދަކަށް މީހުން ޕޮޒިޓިވް ދިުވަހެވެ.
ނޮވެމްބަރު 27 ވަނަ ދުވަހު 205،557 މީހުން އެމެރިކާގައި ކޯވިޑް19އަށް ވަނީ ޕޮޒިޓިވް ވެފައެވެ.
މިހާތަނަށް އެންމެ ގިނައަދަކަށް އަންގާރަ ދުވަހު މީހުން އެމެރިކާގައި މަރުވެފައިވާއިރު، ބައްޔަށް ފަރުވާ ދިނުމަށްޓަކާ، އެމެރިކާގެ ހޮސްޕިޓަލްތަކުގައި އެޑްކުރެވިފައިވާ މީހުންގެ އަދަދުވެސް ފުރަތަމަ ފަހަރަށް ވަނީ 100،000 އަށްވުރެ މައްޗަށް އަރާފައެވެ. ހެލްތު އޮފިޝަލުން އިންޒާރުކޮށްފައިވާ ގޮތުގައި، އެޑްމިޓް ކުރެވޭ މީހުންގެ އަދަދު އާދަޔާ ޚިލާފަށް އިތުރުވެގެން ދަނީ، ޗުއްޓީއާ ދިމާކޮށް މީހުން ދަތުރު ފަތުރު ކުރާ އަދަދު އިންތިހާއަށް އިތުވެގެން ދިއުމާ ގުޅިގެންނެވެ.
ހުއްޓުމެއްނެތި ކޯވިޑް19 ފެެތުރެމުންދާއިރު، މިހާރު އެމެރިކާއިން ދަނީ އެގައުމުގެ ރައްޔިތުންނަށް ވެކްސިން ދޭން ފެށުމަށްވެސް ތައްޔާރު ވަމުންނެވެ.
މިގޮތުން، އެމެރިކާގައި ކޯވިޑް19 ވެކެސިންގެ ފުރަތަމަ ޑޯޒް، މިހިގާ ޑިސެމްބަރު މަހުގެ މެދުތެރޭގައި ދޭން ފަށާނެ ކަމަށް އެގައުމުގެ ސަރުކާރުގެ ފަރާތުން ކޯވިޑް19 ވެކްސިމް ދިނުމުގެ ޕްރޮގްރާމް ހިންގުމަށް އައްޔަން ކޮށްފައިވާ އިސް ފަރާތުން ހާމަކޮށްފިއެވެ.
ޑރ. މޮންސެފް ސްލޯއީ މިގޮތަށް ވިދާޅުވެފައިވަނީ، ފިޒާއާއި އެކުންފުނީގެ ޕާޓްނާ ކުންފުނި ބައޯއެންޓެކްއިން، މިދެކުންފުނިން އުފެއްދި ވެކްސިން އެމްޖެންސީ ހުއްދައަށް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ)އަށް ހުށަހެޅިތާ ދެދުވަސް ފަހުން ސީ.އެން.އެން.އަށް ދިން އިންޓަވިއު އެއްގައެވެ.
އެފްޑީއޭގެ ވެކްސިން އެޑްވައިޒްރުން ވިދާޅުވާގޮތުގައި، އެމެރިކާގެ ވެކްސިން އުފައްދާފައިވާ 2 ކުންފުނި ކަމުގައިވާ ފިޒާއާއި އަދި މޮޑާނާގެ އޮފިޝަލުންނާއި އެފްޑީއޭގެ އޮފިޝަލުން އަންނަ ޑިސެމްބަރުމަހުގެ 8 އިން 10 އަށް މި ވެކްސިންތަކަށް ހުއްދަ ދިނުމާ ގުޅޭގޮތުން މަޝްވަރާކުރުމަށް ބައްދަލު ކުރާނެއެވެ.
"އަހަރުމެންގެ އަމާޒަކީ، ބޭނުންކުރުމުގެ ހުއްދަ ލިބޭތާ 24 ގަޑިއިރު ތެރޭގައި، ވެކްސިން ދިނުމަށް ޚާއްސަ ކުރެވިފައިވާ ސައިޓްތަކަށް ވެކްސިން ފޯރުކޮށްދޭން ފެށުން" ވެކްސިން އުފައްދަން ފެށުމާއެކު ވެކްސިން ފޯރުކޮށްދިނުމަށް އެމެރިކާގެ ފެޑެރަލް ސަރުކާރުން އެކުލާވާލާފައިވާ ޕްރޮގްރާމް ކަމުގައިވާ "އޮޕަރޭޝަން ރެޕް"ގެ ވެރިއާ ސްލޯއީ ވިދާޅުވެފައި ވެއެވެ.
'އެހެން ވީމާ، އަހަރެން އުއްމީދު ކުރަނީ، ވެކްސިން ބޭނުން ކުރުމުގެ ހުއްދަ ލިބޭތާ އެއްދުވަސް ނުވަތަ ދެދުވަސް ތެރޭގައި ވެކްސިން ދޭން ފެށޭނެކަމަށް. އެއީ ޑިސެމްބަރ 11 ނުވަތަ 12″ އޭނާ ވިދާޅުވިއެވެ.
