ފިއުއައުނު ޢަރަގު ކުރެއްވި ހާދިސާއިން އެނގެނީ މާތް ރަސްކަލާންގެ އަށް ކާފިރުވެ، ދުނިޔެ ފަސާދަކުރަން އުޅޭ މީހުންނަށް ގަދަފަދަ އަޒާބުން އަޒާބު ދެއްވާ ނެތިކުރައްވާނެކަން ކަމާއި، އެހެންކަމުން ފަސާދައާއި ދެކޮޅަށް މިއަދު ތެދުވާން ޖެހިފައިވާކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"ޢާޝޫރާ ދުވަހުގެ މާތްކަން"، މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ވިދާޅުވީ މުޙައްރަމް މަހުގެ ދިހަވަނަ ދުވަހަކީ، ނުވަތަ ޢާޝޫރާ ދުވަހަކީ، ހެޔޮކަމާއި، ޒިކުރުތަކާއި، ފިލާވަޅުތަކުން ފުރިގެންވާ ދުވަހެއް ކަމުގައެވެ.
އަދި ޚުޡުބާގައި ވިދާޅުވި ގޮތުގައި ތަފްސީރު ފޮތްތަކުގައި ބަޔާންވެގެންވާ ގޮތުގައި މާތް ރަސްކަލާންގެ އާދަމްގެފާނުގެ ތައުބާ ގަބޫލުފުޅު ކުރެއްވީ އާޝޫރާ ދުވަހުގައެވެ.
ނޫޙުގެފާނާއި އެކަލޭގެފާނަށް އީމާންވީ މީހުން ތޫފާނުން ސަލާމަތް ކުރެއްވީ ޢާޝޫރާ ދުވަހުގައެވެ. އިބުރާހިމްގެފާނު އަންދާލުމަށް ލަޢުނަތް ލެއްވި ނަމްރޫދު ރޯކުރި އަލިފާންގަނޑުން އިބުރާހިމްގެފާނު ސަލާމަތް ކުރެއްވީ ޢާޝޫރާ ދުވަހުއެވެ. ޔޫސުފްގެފާނުގެ އަޚުންގެ ނުބައި ރޭވުންތަކުން ޔޫސުފްގެފާނު ސަލާމަތް ކުރެއްވުމަށްފަހު އެކަލޭގެފާނުގެ ބަފައިކަލުން ޔައުޤޫބުގެފާނާއި އަލުން ބައްދަލުވެވަޑައިގަތީ ޢާޝޫރާ ދުވަހުއެވެ. އައްޔޫބުގެފާނު އިމްތިޙާން ކުރެއްވުމުގެ ގޮތުން އެކަލޭގެފާނަށް ޖެއްސެވި ދިގު މުއްދަތުގެ ބޮޑު އާލާސްކަންފުޅުން، އެކަލޭގެފާނު ސަލާމަތް ކުރެއްވީ އާޝޫރާ ދުވަހުއެވެ.
އާޝޫރާދުވަހުގެ މާތްކަމަށް އަލިއަޅުއްވާލަވަމުން މިއަދު ޚުޡުބާގައި ވިދާޅުވެފައި ވެއެވެ.
ޚުޡުބާގައި އިތުރަށް ވިދާޅުވި ގޮތުގައި ޢާޝުރާ ދުވަހަކީ ފިއުއައުނުގެ ކިބައިން މޫސާގެފާނު ސަލާމަތްކުރައްވާ، ފިއުޢައުނާއި އޭނާގެ ލަޝްކަރު ޢަރަގު ކުރެއްވި ދުވަސްވެސްމެއެވެ.
މިގޮތުން މިފަދަ ހާދިސާތަކުގައި ގިނަގުނަވެގެންވާ ދަރުސްތަކާއި އިބުރަތްތައް ވާކަމަށް ބަޔާން ކުރައްވަމުން ހުކުރު ޚުޡުބާގައި ވިދާޅުވި ގޮތުގައި އޭގެ އެންމެ މުހިންމު ފިލާވަޅަކީ މާތް ރަސްކަލާންގެއަށް އީމާންވާ މީސްތަކުންނާއި، އެކަލާނގެ ނަބިއްޔުންނާއި ރަސޫލުން، ބޮޑެތި މުސީބާތްތަކުންނާއި ބަލާތަކުން ސަލާމަތް ކުރައްވާ ގޮތް އެނގި، އީމާންކަން ހަރުދަނާ ކުރުމަށް މަސައްކަތް ކުރުމުގެ ފިލާވަޅު ކަމުގައެވެ.
