ހުރިހާ ހާލަތެއްގައިވެސް ސާފުތާހިރު ވުމަކީ އިސްލާމީ ސަގާފަތުގެ ތެރެއިން ވާކަމެއް ކަމަށާއި، މަގުމައްޗަށާއި، ހިޔާލިބޭ ގަސްގަތުގެ ދަށަށާއި، މީހުން ހިނގާބިގާވެ އުޅޭ ތަންތަނަށް ކުޑަކަމު ދިއުމާއި، ޤަޟާޙާޖަތް ކުރުމާއި، ކުޅުޖެހުންފަދަ ކަންކަމަކީ އިސްލާމް ދީނުގައި ނަހީ ކުރައްވާފައިވާ ކަންކަން ކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"އިސްލާމް ދީނަކީ ސާފުތާހިރު ކަމުގެ ދީން" މިމައުޟޫއަށް ޚާއްސަ ކުރެވުނު މިއަދުގެ ހުކުރު ޚުޡުބާގައި ވިދާޅުވި ގޮތުގައި ފަރުދީ ސާފުތާހިކަން، ނުވަތަ ޝަޚުސީ ސާފުތާހިރު ކަމަކީވެސް އިސްލާމްދީން ވަރަށް ބޮޑަށް ބާރުއަޅާފައިވާ ކަމެއްކަމުގައެވެ. މިގޮތުން ނިޔަފަތި ކެނޑުމާއި، ކިހިލި ފަށްދަށުން އިސްތަށި އުފުރުމާއި، މަތިމަސް ކުރު ކުރުންފަދަ ކަންކަމަކީ ޝަޚުސީ ސާފުތާހިރުކަމުގެ ތެރޭގައިވާ ކަންކަމެވެ.
މުސްލިމް އަޚުންނޭވެ! ތިމާގެ ހަށިގަނޑާއި، ފޭރާމާއި، ދިރިއުޅޭ ވެށީގެ ސާފްތާހިރުކަމަކީ އަޅުކަން ގަބޫލުވުމާއި މާތްاللهގެ ރުއްސެވުމާއި، އެކިއެކި ބަލިމަޑުކަމުން ރައްކާތެރިވުމުގެ ވަސީލަތެކެވެ. އަދި ސާފުތާހިރުވުމަކީ މާތް اللهއާއި އެކަނލާގެ ރަސޫލާ އަމުރުކުރައްވާފައިވާ ކަމެކެވެ. ކީތި ޤުރުއާންގައި މާތް الله ވަޙީ ކުރައްވާފައި ވެއެވެ. "އަދި ކަލޭގެފާނުގެ ފޭރާންކޮޅުތައް ޡާހިރު ކުރައްވާށެވެ!"
މިއަދުގެ ހުކުރު ޚުޡުބާގައި ވިދާޅުވެފައި ވެއެވެ.
ޚުޡުބާގައި އިތުރަށް ވިދާޅުވެފައިވާ ގޮތުގައި ފެން ނުލިބިގެން ނުވަތަ އެހެން ސަބަބަކާހުރެ ވިޔަސް، ހިނައިގަތުމާއި، ވުޟޫ ކުރުމަށް ފެން ބޭނުން ކުރުމަށް ނުކުޅެދިގެންވާ މީހުންވެސް ނަމާދު ކުރުމާއި ޡަވާފްކުރުމަށް ޡާހިރުވުމަށް އިސްލާމް ދީނުގައި ވަނީ އަންގަވާފައެވެ. އެއީ ތަޔައްމަމް ކުރުންކަން ބަޔާން ކުރައްވަމުން ޚުޡުބާގައި ވިދާޅުވެފައިވަނީ މިކަންކަމުންވެސް ދޭހަވަނީ އިސްލާމް ދީނުގައި ސާފުތާހިރުކަމަށް ދެއްވާފައިވާ މުހިންމުކަން ކަމުގައެވެ.
މުސްލިމް އަޚުންނޭވެ! އިސްލާމް ދީނުގައި ސާފުތާހިރު ކަމުގެ ދާއިރާ ވަރަށް ފުޅާވެގެން ވެއެވެ. މަގުމަތި ސާފުތާހިރުކޮށް ބެލެހެއްޓުކަމީވެސް އަޅުކަމެކެވެ. ވަރަށްބޮޑު ޒީނަތެކެވެ. މަގުމަތީގެ ސާފުތާހިރު ކަމަކީ އެތައް ބަލިތަކުން މުޖުތަމަޢު ރައްކާތެރި ކޮށްދޭ ކަމެކެވެ. މަގުމަތިން ކުނިބުނި ނަގާ ސާފު ކުރުމަކީ އީމާންކަމުގެ ތެރެއިންވާ ކަމެއްކަމުގައި ކީރިތި ރަސޫލާ ހަދީސް ކުރައްވާފައި ވެއެވެ.
މިއަދުގެ ހުކުރު ޚުޡުބާގައި ވިދާޅުވެފައި ވެއެވެ.
