ހައްޖުވެރިން އެނބުރި އަންނަ ދުވަސްތަކުގައި ވެލާނާ އިންޓަބޭޝަނަލް އެއާޕޯޓް ބާރުބޮޑުވާނެތީ، އެއާޕޯޓުގައި އިތުރު ފުލުހުން ހަރަކާތްތެރިވާނެ ކަމަށް ފުލުހުންގެ އިދާރާއިން ބުނެފިއެވެ.
މި އަހަރު ހައްޖުވެރިން އެނބުރި ރާއްޖެ އައުމަށް ހަމަޖެހިފައިވަނީ މާދަމާއިން ފެށިގެންނެވެ. އަދި މި ދުވަސްތަކުގައި ވެލާނާ އިންޓަނޭޝަނަލް އެއާޕޯޓުގެ ޓްރެފިކް ތޮއްޖެހުން ބޮޑުވާނެކަމަށް ބަލައި، ޖުލައި 7، 10 އަދި 14 ގައި، ކޮންމެ ދުވަހަކު 13:50 ގައި ގިނަ އަދަދެއްގެ ހައްޖުވެރިން އައުމަށް ހަމަޖެހިފައިވާކަމަށް ފުލުހުން ބުނެފައިވެއެވެ.
އެހެންކަމުން، އޮމާންކަމާއެކު ޓްރެފިކް ފޮލޯ ކުރިއަށްދާނެކަން ކަށަވަރުކުރުމަށްޓަކައި އިތުރު ފުލުހުން އެއާޕޯޓުގައި ހަރަކާތްތެރިވަމުން ގެންދާނެ ކަމަށާއި އެއާޕޯޓުން ހިދުމަތް ހޯދާ އެންމެހައި ފަރާތްތައް ފުލުހުންގެ އިރުޝާދުތަކާ އެއްގޮތަށް އަމަލު ކުރުމަށް ފުލުހުން އެދުނެވެ.
ދިވެހި ޙައްޖުވެރިން އެނބުރި ރާއްޖެ އައުމަށް ހަމަޖެހިފައިވަނީ 6 ފްލައިޓެއްގައިކަމަށް އިސްލާމިކް މިނިސްޓްރީން ބުނެފައިވެއެވެ.
ހުކުރު ދުވަހު، އެންމެ ފުރަތަމަ 2 ފްލައިޓް ގައި އަންނަން ހަމަޖެހިފައިވަނީ އަލްމަނާސިކާއި ޙައްޖު ކޯރޕަރޭޝަންގެ ޙަވާލުގައި ދިޔަ ޙައްޖުވެރިންގެ ގްރޫޕެވެ. އަދި ހޯމަ ދުވަހު 3 ވަނަ ފްލައިޓުން ރާއްޖެ އައުމަށް ހަމަޖެހިފައިވަނީވެސް ޙައްޖު ކޯރޕަރޭޝަންގެ ޙަވާލުގައި ދިޔަ ގްރޫޕެކެވެ.
މީގެ އިތުރަށް ޖުލައި 11 ވަނަ ދުވަހު 4 ވަނަ ފްލައިޓުން ރާއްޖެ އައުމަށް ހަމަޖެހިފައިވަނީ ސިސިލްފަރު ޙައްޖު އެންޑް ޢުމްރާ ގުރޫޕުގެ ޙަވާލުގައި ދިޔަ ޙައްޖުވެރިންނެވެ. އަދި ދިވެހި ޖުލައި 12 ވަނަ ދުވަހު އޮންނަ 5 ވަނަ ފްލައިޓުން އަލްޙަރަމައިން ޙައްޖު އެންޑް ޢުމްރާ ގުރޫޕުގެ ޙަވާލުގައިދިޔަ ޙައްޖުވެރިންން އައުމަށް ވަނީ ހަމަޖެހިފައިއެވެ. އަދި ޖުލައި 14 ގައި އޮންނަ އެންމެ ފަހު ފްލައިޓުގައި އަންނަން ހަމަޖެހިފައިވަނީ ޙައްޖު ކޯރޕަރޭޝަންގެ ޙަވާލުގައިދިޔަ ޙައްޖުވެރިންގެ ފަހު ގްރޫޕެވެ.
މިއަހަރު ރާއްޖެއަށް ޙައްޖަށް މީހުން ގެންދިޔުމަށް ލިބުނު 1000 ކޯޓާގެ ދަށުން ޙައްޖު ކޯރޕަރޭޝަންގެ އިތުރުން އަމިއްލަ 3 ގްރޫޕެއްގެ ޙަވާލުގައި ދިވެހިން ޙައްޖަށްގޮސްފައިވެއެވެ. އެގޮތުން މޯލްޑިވްސް ޙައްޖު ކޯރޕަރޭޝަންގެ ޙަވާލުގައި 881 ޙައްޖުވެރިން ގޮސްފައިވެއެވެ.
