އަޑުއިވުމާއި ވާހަކަ ދެއްކުމުގައި ދަތިކަން ހުންނަ މީހުންނަށް ޚިދުމަތް ދިނުމުގައި ދިމާވާ ދަތިތަކަށް ހައްލު ހޯދުމަށް، ޑެފް އެސޯސިއޭޝަނާ ގުޅިގެން ބެންކުގެ މުވައްޒަފުންނަށް ސައިން ލޭންގްއޭޖް ޓްރެއިނިންގއެއް ހިންގުމަށް ބެންކުން ނިންމައިފިއެވެ.
ގައުމީ ބެންކުން މިކަން ހާމަކުރީ ބައިނަލްއަގުވާމީ ގޮތުން ފާހަގަކުރާ ނުކުޅުދުންތެރިކަން ހުންނަ މީހުންގެ ދުވަސް ފާހަގަކުރުމުގެ ގޮތުން އެ ބެންކުން ކުރިއަށް ދެންދިޔަ ބައެއް ހަރަކާތްތަކުގެ ތެރެއިންނެވެ.
މިއަދުގެ ހަރަކާތްތަކުގެ ތެރެއިން އަޑުއިވުމުގެ ދަތިކަން ހުންނަ ފަރާތްތަކުގެ ހައްގުގައި މަސައްކަތް ކުރަމުންދާ މޯލްޑީވްސް ޑެފް އެސޯސިއޭޝަނަށް ވަނީ ބެންކުން ވަނީ 30000 ރުފިޔާ ހަދިޔާކޮށްފައެވެ. މި ފައިސާ ބޭނުންކުރުމަށް ހަމަޖެހިފައިވަނީ އެ ޖަމިއްޔާއިން ހިންގާ ހަރަކާތްތައް ކުރިއަށްގެންދިޔުމަށެވެ. މީގެ އިތުރުން އެ ޖަމިއްޔާގެ މެމްބަރުންވަނީ ބެންކުގެ މެއިން ބްރާންޗަށް ޒިޔާރަތްކޮށް ބެންކުގެ ބައެއް މަސައްކަތް ހިނގާ ގޮތް ބަލައި މުވައްޒަފުންނާއެކު ވަގުތު ހޭދަކޮށްފައެވެ.
މި ދުވަސް ފާހަގަކުރުމަށް ކުރިއަށް ގެންދެވުނު އިތުރު ހަރަކާތްތަކުގެ ތެރޭގައި ރާއްޖޭގެ އެކި ކަންކޮޅުތަކުގައި ދިރިއުޅޭ، ހިނގާބިނގާވެ އުޅުމުގެ ނުކުޅެދުންތެރިކަން ހުންނަ މީހުންނަށް އިތުރު މޮޓޮރައިޒްޑް ފުރޮޅުލީގޮނޑި ހަދިޔާކުރުން ހިމެނެއެވެ. މި ޕްރޮގްރާމްގެ ދަށުން މިހާތަނަށް ޖުމްލަ 125 އަށްވުރެ ގިނަ ފުރޮޅުލީގޮނޑި އެކިފަހަރު މަތިން ހަދިޔާކޮށްފައި ވާކަމަށް ބެންކުން ބުނެއެވެ.
މިއަހަރު ޖަނަވަރީ މަހު ރާއްޖޭގެ 10 ސްކޫލެއްގެ ސެން ކްލާސްތަކުގައި ކިޔަވަމުންދާ 300 އެއްހާ ކުދިންނަށް ކިޔަވައިދިނުން ލުއިފަސޭހަ ކުރުމަށް އެފަދަ ކުދިންނަށް ކިޔަވައިދިނުމަށް ބޭނުންވާ ހާއްސަ ތަކެތި ހަދިޔާކޮށްފައި ވާކަމަށްވެސް ބެންކުން ބުނެއެވެ.
