މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒުގެ އާއިލާގެ ބައެއް ބޭފުޅުންވެސް މިސަރުކާރުން މާލޭގެ ރައްޔިތުންނަށް ހިލޭ ގޯތި ލިބޭނެކަމަށް އާންމު ކޮށްފައިވާ ލިސްޓުގައި ހިމެނޭކަން ހާމަވެއްޖެއެވެ.
ހައުސިން މިނިސްޓްރީން އާންމު ކޮށްފައިވާ ލިސްޓުގައި ގޯތި ލިބޭކަމަށް ޝަރުތުހަމާ މީހުންގެ ލިސްޓުގައި ހިމެނިފައިވާ ފަރާތްތަކުގެ ތެރޭގައި މުއިއްޒުގެ އާއިލާގެ ބައެއް މެމްބަރުން ޝަރުތު ހަމަވެފައިވަނީ ގުޅިގެން ގޯތި ލިބޭމީހުންގެ ކެޓަގަރީގައެވެ.
މާލޭގެ ގޯތި ލިބުނު ލިސްޓު ސަރުކާރުން ޢާންމުކުރިއިރު، ތަނަވަސް ފުދުންތެރިކަން ހުރި ގިނަ ބޭބޭފުޅުންނާއި، އެބޭފުޅުންގެ ޢާއިލާތަކަށް ގޯތި ގޮތަށް ހަމެޖެހިގެން ދިއުމުގެ މައްސަލަ ވަނީ ފެންމަތިވެފައެވެ.
މާލޭން ހިލޭ ގޯތި ލިބޭ މީހުންގެ ވަގުތީ ލިސްޓް އާންމުކުރިއިރު، ރައްޔިތުންގެ މަޖިލީހުގައި މާލޭގެ 15 ދާއިރާ ތަމްސީލުކުރައްވާ މެމްބަރުންގެ ތެރެއިން އަށް މެމްބަރަކަށާއި އެހެން ދާއިރާތައް ތަމްސީލުކުރައްވާ މެމްބަރުންގެ ތެރެއިން ދެ ބޭފުޅަކަށް ސީދާ ގޯތި ލިބިވަޑައިގަންނަވައެވެ. އޭގެ ތެރޭގައި ހިމެނިވަޑައިގަންނަވަނީ، ވެރިކަން ކުރާ އެމްޑީޕީގެ ފަސް މެމްބަރަކާއި ސަރުކާރާ ދެކޮޅަށް އުފެއްދުމަށް މަސައްކަތް ކުރަމުން އަންނަ 'ދަ ޑިމޮކްރެޓްސް’އަށް ނިސްބަތްވެވަޑައިގަންނަވާ ހަތަރު މެމްބަރަކާއި އެމްއެންޕީގެ މެމްބަރެކެވެ.
ގޯތި ލިބުނު މެމްބަރުންނަކީ ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު (އެމްޑީޕީ)، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް (ޑިމޮކްރެޓްސް)، މައްޗަންގޯޅި އުތުރު ދާއިރާގެ މެމްބަރު މުހައްމަދު ރަޝީދު (ޑިމޮކްރެޓްސް)، މައްޗަންގޯޅި ދެކުނު ދާއިރާގެ މެމްބަރު އަހުމަދު ހައިތަމް (އެމްޑީޕީ)، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (ޑިމޮކްރެޓްސް)، މާފަންނު ހުޅަނގު ދާއިރާގެ މެމްބަރު މުހައްމަދު ފަލާހް (އެމްޑީޕީ)، މާފަންނު މެދު ދާއިރާގެ މެމްބަރު އިބްރާހިމް ރަޝީދު (ޑިމޮކްރެޓްސް)، ވިލިމާލޭ ދާއިރާގެ މެމްބަރު އަހުމަދު އުޝާމް (އެމްއެންޕީ)، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އަދި އޭނާގެ ފިރިކަލުން، ކިނބިދޫ ދާއިރާގެ މެމްބަރު މުހައްމަދު ނާޝިޒް (އެމްޑީޕީ)،
ފޯމަކަށް ލިބޭނެ ގޯތީގެ އެންމެ ކުޑަ ސައިޒަކީ 1،250 އަކަފޫޓެވެ. ޖޮއިންޓް އެޕްލިކޭޝަނެއް ނުވަތަ އެކަކަށް ވުރެ ގިނަ މީހުންގެ ނަމުގައި ހުށަހަޅާ ފޯމުތަކަށް، އިތުރަށް ބައިވެރިވާ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރު ކުރެވޭނެއެވެ. ހަތް މީހުންނަށް ވުރެ ގިނަ މީހުން ޖޮއިންޓް އެޕްލިކޭޝަނުގައި ބައިވެރިވާ ނަމަ، އެ ފޯމަކަށް ލިބޭނީ ޖުމްލަ 4،000 އަކަފޫޓެވެ.
