މާލޭ ރައްޔިތުންގެ ގޯތީގެ މަައްސަލައަށް އިންގިލާބީ ހައްލެއް ހޯދައި ދެއްވި ވެރިއަކީ ރައީސް ޞާލިހު ކަމަށް ރިޔާސީ ދެވަނަ ދައުރަކަށް ރައީސް ޞާލިހު އިންތިޚާބު ކޮށްދެއްވުމަށް ބައިއަތު ހިފާފައިވާ އެމްޑީއޭގެ ލީޑަރު އަހުމަދު ސިޔާމް މުހައްމަދު ވިދާޅުވެއްޖެއެވެ.
މި ސަރުކާރުން ބޯހިޔާވަހިކަން ފޯރުކޮށްދިނުމަށް ހިންގާ "ބިންވެރިޔާ ސްކީމް" އާއި "ގެދޮރުވެރިޔާ ސްކީމް" ގެ ދަށުން ހުޅުމާލެއާއި ގުޅީފަޅު ހިއްކައިގެން ދޫކުރާ ގޯއްޗާއި، ހުޅުމާލޭގައި މިހާރު އިމާރާތް ކުރަމުން އަންނަ 4،000 ފްލެޓަށް އެދުމަށް ސަރުކާރުން ހުޅުވާލީ މިދިޔަ އަހަރުގެ ޖޫން މަހުގެ 26 ގައެވެ.
އިއްޔެ އާންމުކުރާ ލިސްޓުގައި 10،314 މީހުންގެ ނަން ހިމެނޭއިރު، އެ ލިސްޓުގައި ނުހިމެނޭ ނަމަވެސް ޝަރުތު ހަމަވާ 9،500 އަށް ވުރެ ގިނަ މީހުންނަށް ވެސް ގޯތި ދޭން ސަރުކާރުން ވަނީ ނިންމައިފައެވެ.
އެކަމާ ގުޅިގެން ރައީސަށް މަރުހަބާއާއި ޝުކުރު އަދާ ކުރައްވާ ކުރެއްވި ޓުވީޓެއްގައި ސިޔާމް ވިދާޅުވީ، ގޯތީގެ މައްސަލައަކީ މާލޭ ސަރަހައްދަށް ދިމާވެފައި އޮތް އެންމެ ބޮޑު މައްސަލަ ކަމަށާއި ގޯތި ދޫކުރުވެމުން މާލޭ ސަރަހައްދަށް ދިމާވެފައި އޮތް ގޯތީގެ މައްސަލައިގެ މުޅި ނިޒާމަށް ވެސް ހެޔޮ ބަދަލެއް އަންނާނެ ކަމަށެވެ.
އަޅުގަނޑު ހަނދާން ހުންނަން ފެށީއްސުރެވެސް އޮތް އެންމެބޮޑު މައްސަލަ މާލޭ ރައްޔިތުންގެ ގޯތީގެ މަައްސަލައަށް އިންގިލާބީ ހައްލެއް ގެނެސްދެއްވާ މާލޭ ސަރަހައްދުގެ އެންމެ ބޮޑު މައްްސަލައިގެ ނިޒާމަށް މިގެނެސްދެއްވި ބަދަލަށްޓަކައި ރައީސުލް ޖުމްޙޫރިއްޔާ އިބްރާހިމް މުހައްމަދު ޞާލިހަށް އަޅުގަނޑުގެ ހިތުގެ އިހްލާސްތެރި ޝުކުރާއި މަރުހަބާ ދަންނަވަން.
– ސިޔާމް ވިދާޅުވިއެވެ.
މިފަހަރު ދޫކުރައްވާ 5000 ގޯއްޗަކީ ހުޅުމާލެއާއި ގުޅީފަޅުން ދޫކުރެއްވުމަށް ހަމަޖެހިފައިވާ ގޯއްޗެވެ. އޭގެތެރެއިން 1500 އަށްވުރެ ގިނަ ގޯތި ހުޅުމާލެއިން އަދި ބާކީހުރި ގޯތިތައް ދޫކުރުމަށް ހަމަޖެހިފައިވަނީ ގުޅީފަޅާއި ގިރާވަރު ފަޅު ހިއްކައިގެނެވެ.
ގޯތި ލިބޭ މީހުންގެ ވަގުތީ ލިސްޓު މިހާރު ޢާއްމުކުރައްވާފައިވާއިރު، ގޯތިނުލިބޭ ފަރާތްތަކަށް ގޯތިނުލިބޭކަން ގެދޮރުވެރިން ޕޯޓަލް މެދުވެރިކޮށް ސަބަބާއެކީ ފެންނަން ހުންނާނެކަމަށް ފްލެޓާއި ގޯތީ ދޫކުރުމުގެ ކަންކަން ކުރިއަށްގެންދަވާ ކޮމެޓީން ވިދާޅުވެއެވެ.
