އިލެކްޝަންސް ކޮމިޝަންގެ ރައީސް ފުއާދު ތައުފީގް މަސައްކަތް ކުރައްވަމުންދަނީ ސަރުކާރާއިމެދު ރައްޔިތުންގެ ހިތްތަކުގައިި ނަފްރަތު އުފެއްދުމަށް ކަމުގައި ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.

އޭނާ މިހެން ވިދާޅުވީ އިލެކްޝަންސް ކޮމިޝަނުން ރައީސް ނަޝީދު އިސްކޮށް ހުންނަވައިގެން އުފެއްދުމަށް މަސައްކަތް ކުރާ ދަ ޑިމޮކްރެޓްސް އުފެއްދުމުގެ ހުއްދަ ދިނުމާއިމެދު ކޮމިޝަނުން ނިންމަންޖެހޭ ނިންމުމުގައި ޢަމަލު ކުރައްވަމުންދާ ގޮތާއި ގުޅޭގޮތުން ފުއާދަށް ފާޑުވިދާޅުވެ ކުރެއްވި ޓުވީޓުގައެވެ.

މިމައްސަލާގައި ފުއާދާއި ކޮމިޝަންގެ ނައިބް ރައީސް ނިންމެވީ ރައީސް ނަޝީދުގެ ދަ ޑީމޮކްރެޓްސް އުފެއްދުމުގެ ހުއްދަ ދިނުމަށެވެ. ނަމަވެސް ކޮމިޝަންގެ މެމްބަރުންގެ ތެރެއިން އަންނަ މަހުގެ 22 ވަނަ ދުވަހު ދައުރު ހަމަވާ ނަޝާތުއާއި، އާސިފް ވަނީ ދަ ޑީމޮކްރެޓްސް އުފެއްދުމަށް ހުއްދަދޭން ދެކޮޅު ހަދާފައެވެ. މިކަމުގައި އިލެކްޝަންސްގެ ތެރޭގައި އުފެދިފައިވާ ޚިޔާލު ތަފާތުވުންތަކުގައި ކޮމިޝަންގެ ބައްދަލުވުން ނުބޭއްވި ވަނީ ޑެޑްލޮކަކަށް އައިސްފައެވެ.

މިމައްސަލާގައި ރާއީ ވިދާޅުވީ ކޮމިޝަންގެ ރައީސްގެ އަމަލުތައް ހުންނެވިގޮތުން ކޮމިޝަންގެ އެހެން މެމްބަރުންނަށް މަސައްކަތް ކުރުމުގެ ޖާގަ އެންމެ ފުރިހަމަ ލިބުމުގައި ދަތިތަކެއް ހުރިކަމަށެވެ. އަދި ކޮމިޝަންގެ ރައީސް ފުއާދު މަސައްކަތް ކުރައްވަމުންދަނީ ސަރުކާރާއިމެދު ރައްޔިތުންގެ ހިތްތަކުގައި ނަފުރަތު އުފެއްދުމަށް ކަމަށް ރާއީ ވިދާޅުވިއެވެ.

އިލެކްޝަން ކޮމިޝަންގެ ރައީސް އަމަލުފުޅު މިހާރު ހުންނެވި ގޮތުންނާއި ކުރައްވަމުން ގެންދަވާ ކަންކަމުގެ ގޮތުން ކޮމިޝަންގެ މެމްބަރުންނަށް މަސައްކަތްތައް ފުރިހަމައަށް ކުރުމުގެ ޖާގަ ލިބިގެންދާ ކަމާއިމެދު ސުވާލު އުފެދޭ. އަދި ސަރުކާރާއި މެދު ރައްޔިތުންގެ މެދުގައި ނަފްރަތު އުފެއްދުމަށް މަސައްކަތް ކުރާކަން، ކަންކަމުގައި ނިންމަވާ ނިންމެވުމުންނާއި ދައްކަވާ ވާހަކަފުޅު ތަކުން ދޭހަވޭ.

– ރާއީ ވިދާޅުވިއެވެ.

އިލެކްޝަންސް ކޮމިޝަނުގައި ހަތަރު މެމްބަރުން ތިބެގެން ކުރިއަށް އޮތް ރިޔާސީ އިންތިހާބު ބޭއްވަން ގާނޫނީ ގޮތުން ހުރަހެއް ނެތް ނަމަވެސް ހިރި އަދަދެއްގެ މެމްބަރުން ތިބުމުން ނިކުމެދާނެ މައްސަލަތަކެއް އެބަހުއްޓެވެ. އިލެކްޝަންސް ކޮމިޝަނުގެ ގާނޫނުގައި ބުނެފައި އޮންނަ އެ ކޮމިޝަނުގެ ގާނޫނީ އަދަދަކީ ފަހެކެވެ. ގާނޫނީ ތަޖުރިބާކާރުން ބުނަނީ މެމްބަރަކު މަދުކޮށް އިލެކްޝަންސް ކޮމިޝަނުގެ މަސައްކަތްތައް ކުރިއަށް ގެންދިޔުމަށް ހުރަހެއް ނެތް ކަމަށެވެ.

އިލެކްޝަންސްގެ ކޮމިޝަނުގެ ތެރޭގައި މައްސަލައެއް އުޅޭކަމުގެ ނިޝާނެއް ނުފެނި އޮމާންކަމާއެކު ފަސް އަހަރުވާން ކައިރިވެފައި އޮއްވައި، އެ ކޮމިޝަނުގެ ރައީސް ފުއާދު ތައުފީގު މަސައްކަތް ކުރައްވަނީ ނުފޫޒެއްގެ ދަށުގައި ކަމަށް އެ ކޮމިޝަނުގެ މެމްބަރުން މުހައްމަދު އާސިފާއި އަލީ ނިޝާތު ތުހުމަތު ކުރައްވައިފައެވެ.

އިލެކްޝަންސް ކޮމިޝަނުގެ ގާނޫނު ބުނާ ގޮތުން އެ ކޮމިޝަނުގެ މެމްބަރުންގެ އަދަދަކީ ފަހެކެވެ. އެ ކޮމިޝަނުގެ މެމްބަރެއްގެ ދައުރު ހަމަވާތީ އިތުރު ނަމެއް ފާސް ކުރަން އޮތީ މަޖިލީހަށް ހުށަހަޅައިފައެވެ. ނަމަވެސް މަޖިލިސް ޗުއްޓީއަށް ދިޔައިރު އެކަން ކޮށްފައި ނުވެއެވެ.