ސާފް ޗެމްޕިއަންޝިޕްގައި ރާއްޖޭގެ ޤައުމީ ޓީމު މިއަދު ބުޓާނާއި ދެކޮޅަށް ކުޅުނު މެޗުގައި ރާއްޖޭގެ ޓީމުން ދެއްކި ދަށް ކުޅުމަށް ފާޑުކިޔުމުން ޔޫތު މިނިސްޓަރ އަހުމަދު މަހުލޫފް ނުރުހުން ފާޅުކޮށްފިއެވެ.

އިންޑިއާގެ ބެންގަލޫރުގައި މިހާރު ކުރިއަށްދާ ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖެއިން ކުޅުނު ފުރަތަމަ މެޗުން ބޫޓާން އަތުން މޮޅުވީ 2-0 ގެ ނަތީޖާއަކުންނެވެ. މުޅި މެޗު ޑޮމިނޭޓްކޮށްގެން މޮޅަށް ކުޅެފައިވަނީ ބޫޓާންގެ ޓީމުންނެވެ. ކޯވިޑާއިއެކު ބޯޅަކުޅުން މެދު ކެނޑިފައި އޮންނަތާ އަހަރުތަކެއް ފަހުން އަލުން ފުޓުބޯޅަ ފަށައި ބޫޓާން ކުޅޭ ފުރަތަމަ މުބާރާތަކީވެސް މިމުބާރާތެވެ.

ރާއްޖެއިން މިހާތަނަށް ބޫޓާންއާއި ދެކޮޅަށް ކުޅުނު މެޗުތަކުގައި މޮޅަށް ކުޅެ ތަފާތު ބޮޑު ނަތީޖާތަކެވެސް ނެރެފައިވެއެވެ. ނަމަވެސް މިރޭގެ މެޗުގައި ދިވެހި ޓީމުގެ ފަރާތުން ފެނިގެން ގޮސްފައިވަނީ ވަރަށް އާދައިގެ ދަށް ކުުޅުމެކެވެ. މަހުލޫފް ވަނީ މިމެޗުން މޮޅުމުން ޓީމަށް މަރުހަބާ ދަންނަވާފައެވެ. އަދި މިމޮޅާއިއެކު ބަންގާޅަ އަތުން މޮޅުވުމަށް މަހުލޫފްވަނީ ހިތްވަރު ދީފައެވެ.

މަރުހަބާ ޤައުމީ ޓީމް. ރަނގަޅު ފެށުމެއް، މުހިއްމު މޮޅެއް. އިތުބާރާއެކު ނުކުމެ ބަންގްލަދޭޝް މެޗުވެސް ކާމިޔާބުކުރަމާ ހިނގާ. ކާމިޔާބަށްއެދެން.

– މަހުލޫފް ވިދާޅުވިއެވެ.

މަހުލޫފް ވަނީ މެޗުގެ ލައިވް ކޮމެންޓްރީ ދެއްވި ފަރާތްތަކަށް ފާޑު ވިދާޅުވެފައެވެ. މިމެޗުގެ ލައިވް ކޮމެންޓްރީގައި ބައިވެރިވި ސޮބާހު މުހައްމަދު ވަނީ ޤައުމީ ޓީމުގެ ކުޅުމަށް ވަރަށް ބޮޑަށް ފާޑުކިޔާފައެވެ. ޚާއްސަކޮށް ޤައުމީ ޓީމުގެ ކުޅުންތެރިން ދެއްކި ދަށް ކުޅުމާއި، ޕާސް ޖެހުމާއި، ބޯޅަ ކޮންޓްރޯލް އަދި ފިޒިކަލް ފިޓްނަސްގެ ފެންވަރާއިމެދުވެސް ސޮބާހު ވަނީ ފާޑުކިޔާފައެވެ. ސޮބާހުގެ ވާހަތަކަށް މަހުލޫފްވަނީ ވަރަށް ބޮޑަށް ހިންހަމަ ނުޖެހިފައެވެ.

ކޮމެންޓޭޓަރުން މެޗު ފެށުނީއްސުރެ ނިމެންދެން ރާއްޖެ ޓީމަށް ފާޑުކިޔުމުގެ ބަދަލުގައި، ހެޔޮބަހެއް ނަމަވެސް ބުނެލާނަމައޭ ހިތައްއެރި.

– މަޙުލޫފް ވިދާޅުވިއެވެ.

މިރޭގެ މެޗުން ރާއްޖެ އުދަނގޫ މޮޅެއް ހޯދުމުން، ސޮބާވަނީ މިމުބާރާތުގެ ކުރިއަށް ހުރި މެޗުތަކަކީ ބޫޓާނަށްވުރެ މާމޮޅު ދެޓީމަށްވާއިރު، އިތުރު ހިތްވަރެއް ލައިގެން ނޫނީ ރާއްޖެއަށް ކާމިޔާބީއާއި ހަމައަށް ދިއުމަކީ ދުރުކަމެއް ކަމަށް ބުނެފައެވެ. މިރޭ ޤައުމީ ޓީމު މޮޅުވި ނަމަވެސް ދެއްކި ކުޅުމާއިމެދު ގިނަ ބައެއްގެ ފާޑުކިޔުން ވަނީ އަމާޒުވެފައެވެ.

ރާއްޖެ ހިމެނޭ ގްރޫޕް ބީގައި ދެން ހިމެނެނީ ބޫޓާން، ލުބުނާން އަދި ބަންގްލަދޭޝްއެވެ. ރާއްޖެއިން މި މުބާރާތުގެ ދެވަނަ މެޗުގައި ނުކުންނަން ޖެހޭނީ ބަންގްލަދޭޝް އާއި ދެކޮޅަށެވެ. އެ މެޗު ކުޅޭނީ އަންނަ އާދީއްތަ ދުވަހު ރާއްޖެ ގަޑިން 15:00 ގައެވެ.