އެމެރިކާގެ ވޮޝިންޓަން ޑީސީގައި އަލުން ރާއްޖޭގެ އެމްބަސީއެއް ހުޅުވައިފިއެވެ. އެމްބަސީ ހުޅުވުމަށް އެމެރިކާގެ ވޮޝިންޓަން ޑީސީގައި އިއްޔެ ބޭއްވި ރަސްމިއްޔާތު ޝަރަފްވެރި ކޮށްދެއްވީ ރާއްޖޭގެ ޚާރިޖީ ވަޒީރު ޝާހިދުއެވެ. މި ރަސްމިއްޔާތުގައި އެމެރިކާގައި ހުންނަ ދެކުނު އަދި ސެންޓްރަލް އޭޝިއާގެ ސްޓޭޓް ޑިޕާޓްމަންޓުގެ އެސިސްޓެންޓް ސެކްރެޓަރީ ޑޮނަލްޑް ލޫ ވެސް ބައިވެރިވެވަޑައިގެންފައި ވެއެވެ.
އެމެރިކާގައި ދިވެހިރާއްޖޭގެ އެމްބަސީއެއް ހުޅުވަން ހަމަޖެއްސިކަން މި ސަރުކާރުން އިއުލާން ކުރައްވާފައިވަނީ ފާއިތުވެދިޔަ އަަހަރުއެވެ.
ދިވެހިރާއްޖޭގެ އެމްބަސިއެއް އެމެރިކާގައި ހުޅުވާފައިވާއިރު، އެމެރިކާގެ އެމްބަސިއެއްވެސް ވަނީ ރާއްޖޭގައި ހުޅުވާފައެވެ. އެމެރިކާއިން ރާއްޖޭގައި އެމްބަސިއެއް ހުޅުވަން ނިންމިކަން އިއުލާން ކުރެއްވީ، އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި، އޭރުގެ ސެކެޓްރީޖެނަރަލް މައިކް ޕޮމްޕެއޯ ރާއްޖެއަށް ކުރެއްވި ޒިޔާރަތުގައެވެ.
އެމެރިކާގެ އެމްބަސިއެއް ރާއްޖޭގައި ހުޅުވުމުގެ ކުރިން، އެމެރިކާއިން ރާއްޖެއާ ކުރާ މުއާމަލާތްތައް ކުރަމުން ގޮސްފައިވަނީ ލަންކާގައި ހުންނަ އެމެރިކާގެ އެމްބަސީ މެދުވެރިކޮށެވެ. އެމެރިކާގައި ރާއްޖެ ތަމްސީލު ކުރަމުންދަނީ އދ.ގައި ހުންނަ ރާއްޖޭގެ މިޝަން މެދުވެރިކޮށެވެ.
ރައީސް މައުމޫންގެ ވެރިކަން ނިމެމުންދަނިކޮށް 2007 ވަނަ އަހަރު އެމެރިކާގެ ވޮޝިންޓަން ޑީސީގައި ރާއްޖޭގެ އެމްބަސީއެއް ހުޅުވާފައި ވެއެވެ. އެހެންނަމަވެސް ނަޝީދު ވެރިކަމަށް ވަޑައިގެން، ޚަރަދު ކުޑަކުރުމުގެ ނަމުގައި، 2008 ވަނަ އަހަރު ވަނީ އެ އެމްބަސީ ބަންދު ކޮށްފައެވެ.
އެމެރިކާއާއި ރާއްޖެއާއި ސިޔާސީ ގުޅުން ގާއިމް ކޮށްފައިވަނީ 1966 ވަނަ އަހަރުއެވެ.
