ރައްޔިތުންގެ މަޖިލީހުގެ ރައީސަށް ސަނާ ނުކިޔާ ކޮންމެ މީހަކީ މިއަދު ރަށްތަކާއި ފަޅުތަކާއި، ވަޒީފާތަކާއި، ޕްރޮޖެކްޓް ލިބުނު މީިހަކަށް ވެއްޖެ ކަމުގައި ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު ވިދާޅުވެއްޖެއެވެ.
މޯޑު މިހެން ވިދާޅުވީ މަޖިލިސްގެ ރައީސް މުހައްމަދު ނަޝީދާއި، ނައިބް ރައީސް އީވާގެ އިތުބާރު ނެތްކަމުގެ މައްސަލަ މަޖިލީހަށް ވެއްދި ހިސާބުން މަޖިލީހުގެ މަސައްކަތް ހުއްޓުވައި، މަޖިލިސް އިތުރަށް ކުރިއަށް ނުގެންދިއުމަށް ކުރަމުންދާ މަސައްކަތާއި ގުޅިގެން އޭނާ ހިމެނޭހެން އެމްޑީޕީން ބައެއް މެމްބަރުން ކިޔަމުންދާ ފާޑުކިޔުންތަކާއި ގުޅިގެން ނަޝީދަށް ތާއީދުކުރާ މީހުން އަމާޒުކުރަމުންދާ ފާޑުކިޔުންތަކަށް ރައްދު ދެއްވައި ކުރެއްވި ޓުވީޓެއްގައެވެ.
މަޖިލިސް ހުއްޓުވައިގެން އުޅޭ މައްސަލާގައިވެސް މޯޑު ވަނީ މަޖިލިސްއަށް މިހާރު އޮތް ހާލަތުންވެސް ކުރިއަށް ދެވޭނެ ގޮތްތައް މަޖިލީހުގެ ގަވާއިދުތަކާއިއެކު ހިއްސާ ކުރައްވާފައެވެ. އޭނާ މިހެން ކަންކަން ކުރުމުން ރައީސް ނަޝީދަށް ތާއީދު ކުރާ މެމްބަރުން ވަނީ އޭނާއަށް ވަރަށް ބޮޑަށް ފާޑު ވިދާޅުވެފައެވެ.
މިފާޑު ކިޔުންތަކައި ގުޅިގެން މޯޑު ވިދާޅުވީ ރައީސް ނަޝީދު ޤާނޫނު އަސާސީއާއި ޤާނޫނާއި ޚިލާފަށް ކަމެއް ކުރުމުންވެސް އެކަމަށް ފާޑުކިޔުމަކީ ކުރެވިގެންވާ ކަމެއްކަމަށް ބައެއް ބޭފުޅުން ނުދެކޭކަމަށެވެ. އަދި ރައީސް ނަޝީދަށް ފާޑިކިޔައި ސަނާ ނުކިޔާ ކޮންމެ މީހަކީ ސަރުކާރުގެ ވަޒީފާތަކާއި، ޕްރޮޖެކްޓްތަކާއި، ރަށްތަކާއި ފަޅުތައް ލިބޭމީހަކަށް ވެފައިވާކަމަށެވެ.
ރައީސް ނަޝީދަށް ސަނާ ނުކިޔާ، ޤާނޫނު އަސާސީއާއި ގަވާއިދާއި ޚިލާފަށް ކަމެއް ކޮށްފިޔޭ ބުނެ، ފާޑުކިޔާފިއްޔާ އެމީހަކު އެވީ ޕްރޮޖެކްޓް ލިބުނު މީހަކަށް! ރަށް ލިބުނު މީހަކަށް! ވަޒީފާ ލިބުނު މީހަކަށް! މީ ކޮންފަދަ ޑިމޮކްރެޓްސް އެއް.
– ވެލިދޫ ދާއިރާގެ މެމްބަރު މޯޑު ވިދާޅުވިއެވެ.
ނޫސްވެރިކަމުގެ ދާއިރާގައިވެސް ގިނަ ދުވަސްތަކެއް ވަންދެން މަސައްކަތް ކުރައްވާފައިވާ މޯޑަކީ މަޖިލިސް ތެރޭގައި ވަރަށް އިންސާފަށް ވާހަކަ ދައްކަވާ މެމްބަރެއްކަން ފާހަގަކޮށްލެވެއެވެ. ޚާއްސަކޮށް ސަރުކާރު ޒިންމާދާރު ކުރުވައި ޖަވާބު ދާރީ ކުރުމުގައިވެސް މޯޑަކީ ސަރުކާރުގެ ސިޔާސަތްތަކަށްވެސް ފާޑުކިޔަން ޖެހޭ ހާލަތެއްގައި ފާޑުކިޔާ އިންސާފަސް ވާހަކަ ދައްކަވާ މެމްބަރެއްކަން ފާހަގަކޮށްލެވެއެވެ.
