ރާއްޖޭގެ އެއްވެސް ރަށަކުން މީހުން ނުގެނެސް ޖުމްހޫރީ ޕާޓީގެ ލީޑަރު ޤާސިމް އިބްރާހިމަށް އޮތް ތާއީދު ފެނިފަ އިދިކޮޅު ފަރާތްތަކުން ހަސަދަވެރިވާ ކަމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ޕޮލިޓިކަލް އެޑްވައިޒާ ރިޔާޒު ރަޝީދު ވިދާޅުވެއްޖެއެވެ.

އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގައި ވާދަކުރައްވާ ޖުމްހޫރީ ޕާޓީގެ ލީޑަރު ގާސިމް އިބްރާހިމަށް އެ ޕާޓިގެ ރިޔާސީ ޓިކެޓު ރޭ އަރުވައިފައެވެ. ކާނިވަލް ސަރަހައްދުގައި މިހާރު ކުރިއަށްގެންދާ ޖަލްސާގައި، ފެހި ގާނޫނު އަސާސީގެ ކޮޕީއަކާއެކު ރިޔާސީ ޓިކެޓު ހަވާލުކޮށްދެއްވީ، ޖޭޕީގެ ސެކްރެޓަރީ ޖެނެރަލް، ވައިކަރަދޫ ދާއިރާގެ ކުރީގެ މެމްބަރު އަލީ އާރިފެވެ.

"ހާސްކަނޑާލަ، ކުރިއަށް ދެވޭނެ" ޝިއާރުގެ ދަށުން ޖޭޕީގެ ރިޔާސީ ޓިކެޓު ހަވާލުކޮށް، ކެމްޕެއިން ފެށުމަށް ބޭއްވި ޖަލްސާގައި، މާމިގިލީ ދާއިރާގެ މެމްބަރުކަން ވެސް ކުރައްވާ ގާސިމް ވިދާޅުވީ ރިޔާސީ އިންތިހާބުގައި ވާދަކުރައްވަން ނިންމެވީ ދިވެހިންނަށް ހިތްފަސޭހަ އަދި އުފާވެރި މާހައުލެއް ގާއިމްކޮށްދިނުމަށް ކަމަށެވެ.

މިޖަލްސާގައި ގިނަ އަދަދެއްގެ ގޮޑި ޖެހި ނަމަވެސް އެގޮޑިތައް އެކީ ފުރާލެވިފައި ނުވެއެވެ. ރިޔާޒު ވިދާޅުވީ ޖަލްސާ ފެށުމުގެ މާކުރިން އިދިކޮޅު ފަރާތްތަކުން ޖަލްސާގެ ފޮޓޯ ނަގައި އެކި ގޮތްގޮތަށް އެބުރިކަމަށެވެ. ނަމަވެސް މިކަމުން ކުރި ފައިދާއެއް ނެތްކަމަށާއި، ޤާސިމަށް ޓިކެޓް ހަވާލުކުރީ ގިނަ އަދަދެއްގެ ރައްޔިތުން ތިބި ޖަލްސާއެއްގައި ކަމަށް ރިޔާޒު ވިދާޅުވިއެވެ. އޭނާ ވިދާޅުވީ އަތޮޅު ތެރެއިން މީހުން ނުގެނެސް މިވަރުގެ ޖަލްސާއެއް ބޭއްވުމަށް އިިދިކޮޅުން ހަސަދަ ވެރިވާކަމަށެވެ.

ޖޭޕީން އިދިކޮޅުފަރާތްތަށް ސިއްސުވާލާ ލީޑަރ އޮނަރަބަލް ގާސިމް އިބުރާހިމްއަށް ރިޔާސީ ޓިކެޓު އަރުވައިފި! އިދިކޮޅުންތިބީ ހުސްގޮނޑިގުނަން، ޖަލްސާފެށުމުގެ ކުރިން ހުސްގޮނޑީގެ ފޮޓޯނަގާ ޓުވީޓްކުރަނީ ހިތުގަ އުފެދޭ ނަފުރަތާއި ހަސަދަވެރިކަން ބޮޑުކަމުން! ހަގީގަތުގަވެސް އަތޮޅުތެރެއިން މީހުން ނުގެނެސް ރޭގެ ޖަލްސާއިން އޮނަރަބަލް ގާސިމު އިބުރާހިމް އަށް އޮތް ތާއިދު ދައްކާލައިފި! ޝުކުރިއްޔާ ދިވެހިރައްޔިތުން! ހާސްކަނޑާލާ! ހަމަޖެހޭނެ!

– ރިޔާޒު ވިދާޅުވިއެވެ.

މި ޖަލްސާގައި ޕާޓީގެ ރިޔާސީ ޓިކެޓް ޤާސިމަށް އެރުވުމަށްފަހު، ޖުމްހޫރީ ޕާޓީން ވަނީ އެޕާޓީގެ ރިޔާސީ ކެމްޕޭންވެސް ވަނީ ރަސްމީކޮށް ލޯންޗްކޮށްފައެވެ. އެގޮތުން ކެމްޕޭންގެ ސްލޯގަން ކަމުގައިވާ "ހާސްކަނޑާލާ، ހަމަޖެހޭނެ" އާއި ކެމްޕޭންގެ ރަސްމީ ލަވަ މި ޖަލްސާގައި ވަނީ އިފްތިތާޙްކޮށްފައެވެ.

ޤާސިމް އިސްވެ ހުންނަވާ ޖޭޕީން ވަނީ 2008 އަދި 2013 ގެ ރިޔާސީ އިންތިޚާބުގައިވެސް ވާދަކޮށްފައެވެ. މިއަހަރުގެ ރިޔާސީ އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ ސެޕްޓެމްބަރުމަހުގެ 9 ވަނަ ދުވަހުއެެވެ. އަދި އިންތިޚާބުގެ 2 ވަނަ ބުރެއް ބާއްވަން ޖެހޭނަމަ ސެޕްޓެމްބަރު 30 ގައި ދެވަނަ ބުރުގެ ވޯޓުލުން ބޭއްވުމަށްވެސް ވަނީ ނިންމާފައެވެ.