ރާއްޖެއާއި ޗާގޮސްއާ ދެމެދުގައިވާ ކަނޑުގެ ފުށުއަރާ ސަރަހައްދުގެ މައްސަލައިގައި ރާއްޖޭގެ ކަނޑުގެ ސަރަހައްދުން ގެއްލުނުބައި ހޯދަން ވެރިކަމުގެ ފުރަތަމަ ދުވަހުން ފެށިގެން މަސައްކަތް ފަށާނެކަމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ޗާގޯސްގެ މައްސަލާގައި އިޓްލޮސް އިން ނިންމި ނިންމުގައި ސަރުކާރުން އަމަލު ކުރި ގޮތުން ސިޔާސީ ގިނަ ޕާޓީތަކުން ވަނީ ހިތްހަމަނުޖެހިފައެވެ. އިޓްލޮސް އިން ވަނީ ރާއްޖޭގެ ދެކުނު 47،232 އަކަކިލޯމީޓަރުގެ ސަރަހައްދެއް ރާއްޖެއަށް ލިބޭގޮތަށް ނިންމާފައެވެ. މޮރިޝަސް އަށް ދޭން ނިންމީ 45،331 އަކަކިލޯ މީޓަރެވެ. މިއީ ރާއްޖޭގެ ކަނޑުގެ ބައެއް ގެއްލުން ކަމަށް ސަރުކާރާ ހިޔާލު ތަފާތުވާ މީހުން ބުނެފައިވެއެވެ.

ޖުމްހޫރީ ޕާޓީގެ ރިޔާސީ ޓިކެޓް ދިނުމަށް ރޭ ބޭއްވި ޖަލްސާގައި ޤާސިމް ވިދާޅުވީ ގައުމަށް ދިމާވެފައިވާ ބޮޑެތި ދުއްތުރާ ތަކުގެ ތެރޭގައި މިނިވަންކަމާއި އިސްތިގުލާލަށް ބޭރުގެ ނުފޫޒުފޯރައި ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ގޮސް ކޮރަޕްޝަން ހައްދުފަހަނައަޅައި ރައްޔިތުންގެ ފައިސާއިން އިސްރާފުކޮށްފައިވާ ކަމަށެވެ. އިޖްތިމާއީ އިގްތިސާދީ އަދި މަދަނީ ދާއިރާގެ އިތުރުން ހިންގުމުގެ ދާއިރާއިން ގިނަ ކަންތައްތަކެއް ބަދަލުވާންޖެހޭ ކަމަށް ގާސިމް ވިދާޅުވިއެވެ. އެމަނިކުފާނު ވިދާޅުވީ ގައުމުގެ މިސްރާބު ބަދަލުނުކޮށްފިނަމަ އިޔާދަނުކުރެވޭފަދަ ގެއްލުން ގައުމަށާއި ރައްޔިތުންނަށް ލިބިގެންދާނެ ކަމަށެވެ.

ރާއްޖޭގެ ސަރަހައްދުން އެންމެ ޒައްރެއްގެ މިންވަރުވެސް ވެރިކަމެއްގައި ގެއްލިގެން ދިޔަ ނުދޭނަން. ކަނޑުގެ މައްސަލައިގައި އިޓްލޮސް އިން ނިންމި ނިންމުމުގެ މައްސަލަ ބައިނަލްއަގްވާމީ ތަޖުރިބާކާރުންނާއިއެކު މަޝްވަރާކޮށް އެބައި ހޯދުމަށް މަސައްކަތް ފުރަތަމަ ދުވަހުން ފެށިގެން ފަށާނަން.

– ޤާސިމް އިބްރާހިމް ވިދާޅުވިއެވެ.

ޤާސިމް މިހެން ވިދާޅުވިއިރު، އިދިކޮޅު ފަރާތްތަކުން ގުޅިގެން ޗާގޯސް މައްސަލާގައި ސަރުކާރު ޒިންމާދާރު ކުރުމަށް ބޭއްވި ބޮޑު އެއްވުމުގައި ޤާސިމް ބައިވެރިވެފައި ނުވެއެވެ. އަދި އެއްވުމުގައި ޤާސިމަށް ތާއީދު ކުރާ ފަރާތްތަކުން ބައިވެރި ނުވުމަށްވެސް ވަނީ ގޮވާލާފައެވެ.

ގާސިމް ވަނީ މީގެ ކުރީ ސަރުކާރުތަކާއިއެކު ޖުމްހޫރީ ޕާޓީން ކޯލިޝަން ހަދަނީ ރައްޔިތުންގެ ހައްގުގައި ސިޔާސަތުތައް ރޭވުމާއި ތަންފީޒުކުރުމަށް އެއްބަސްވެގެން ކަމަށެވެ. އެހެންނަމަވެސް ވެރިކަން ލިބުމުން ކަންކަން ބަދަލުވެ ބާރުވެރިކަން އިތުރުކުރުމަށް މަސައްކަތްކުރުމުގެ ސަބަބުން ގައުމުގެ އިންސާފާއި ހަމަޖެހުން ގެއްލިގެންދާ ކަމަށް އެމަނިކުފާނު ވިދާޅުވިއެވެ.

ޤާސިމް ވިދާޅުވީ ގައުމުގެ މިސްރާބު ގެއްލި ގައުމަށް އެތެރެއާއި ބޭރުގެ ނުފޫޒު ގަދަވެ ގައުމުގެ ދަރަނިވެސް ކަންބޮޑުވާ މިންވަރަށް އިތުރުވެފައިވާ ކަމަށެވެ. ގައުމު މިހާރު އޮތް ހާލަތުން އަމާނާތްތެރި ވިސްނުންތެރި ހިކުމަތްތެރި ވެރިއަކަށް ގައުމު އެދި ގޮވާ ކަމަށްވެސް އެމަނިކުފާނު ވިދާޅުވިއެވެ.

އަދި މީގެ އިތުރުން 2004ވަނަ އަހަރުގެ ޖޫން މަހުގެ 9ވަނަ ދުވަހުގެ ރެއަކީ ރައީސް މައުމޫނުގެ ޒައާމަތުގައި އިސްލާހީ އެޖެންޑާ އިއުލާނުކުރެވިގެން ދިޔަ ރޭކަން ފާހަގަކުރައްވައި ގާސިމްވަނީ ރައީސް މައުމޫނުގެ އިސްލާހީ އެޖެންޑާއަށް ތައުރީފްކުރައްވައި ޑިމޮކްރަސީ ގެނައުމަށް އެމަނިކުފާނާއި އިތުރު ބޭފުޅުންވީ ގުރުބާނީގެ ހަނދުމަފުޅު އައު ކުރައްވާފައެވެ.