ޔޫއެސްއެއިޑް މެދުވެރިކޮށް އެމެރިކާއިން ރާއްޖެއަށް 7.2 މިލިއަން ޑޮލަރު އެހީ ފޯރުކޮށް ދިނުމަށް ނިންމައިފިއެވެ.
ފޮރިން މިނިސްޓްރީން ބުނެފައިވަނީ ޔުނައިޓެޑް ސްޓޭޓްސް ފޯ އިންޓަރނޭޝަނަލް ޑިވެލޮޕްމަންޓާއި ދިވެހި ސަރުކާރާއެކު ވެފައިވާ އެއްބަސްވުމަށް އިސްލާހު ގެނެސް، ކުރިއަށް އޮތް އަހަރަށް އިތުރު އެހީ ފޯރުކޮށް ދިނުމަށް އެއްބަސްވުމުގައި ސޮއިކޮށްފައިވާ ކަމަށެވެ.
މިގޮތުން މި އެއްބަސްވުމުގެ ދަށުން 7.2 މިލިއަން އެމެރިކާ ޑޮލަރުގެ އެހީ އެމެރިކާއިން ރާއްޖެއަށް ފޯރުކޮށް ދިނުމަށް ހަމަޖެހިފައިވާކަމަށް ފޮރިން މިނިސްޓްރީން ބުނެފައި ވެއެވެ. އެއީ 554.4 މިލިއަން ރުފިޔާގެ އެހީއެވެ.
މި އެހީ ޚާއްސަ ކުރެވިގެންދާ ދާއިރާތަކަކީ ޑިމޮކްރެޓިކް ހިންގުންތެރިކަން، އަމިއްލަ ފަރުދުންނާ މުޖުތަމައުގެ ވިލުންވެރިކަން، އަދި ތިމާވެށި ހިމާޔަތްކުރުމާއި މޫސުމަށް އަންނަ ބަދަލުތަކަށް ހޭނުމަށް ކަމަށް ފޮރިން މިނިސްޓްރީން ބުނެފައި ވެއެވެ.
ފޮރިން މިނިސްޓްރީން އިތުރަށް ބުނެފައިވަނީ، މިއެއްބަސްވުމުގެ ދަށުން އެމެރިކާއާއި ދިވެހި ރައްޔިތުންނާ ދިވެހި ސަރުކާރާއެކު ޤާއިމުކޮށްފައިވާ ގުޅުން އިތުރަށް ފުޅާވެ، އެމެރިކާ އާއި ރާއްޖޭން އިސްކަންދޭ ކަންކަން ކުރިއެރުވުމަށް އެހީތެރިކަން ލިބިގެންދާނެ ކަމަށެވެ.
އެމެރިކާއިން ރާއްޖެއަށް އެހީ ފޯރުކޮށް ދިނުމުގެ ޑިވެލޮޕްމަންޓް އޮބްޖެކްޓިވް ގްރާންޓް އެގްރީމަންޓްގައި ސޮއިކޮށްފައިވަނީ އިއްޔެއެވެ. އެއްބަސްވުމުގައި ސޮއި ކޮށްފައިވަނީ، އެމެރިކާގެ ޝާޖޭ ޑި އެފެއާޒް ގެބްރިއަލް ގްރައު އާއި މިނިސްޓަރ އޮފް ސްޓޭޓް ފޯ ފޮރިން އެފެއާރޒް އަލްފާޞިލް އަހުމަދު ހަލީލެވެ.
