ނ. މަނަދޫގައި ރަޚުމްކުޑަގޮތަކަށް މަރާލާފައި އޮތްވާ ފެނުނު ނައީމާ މޫސާ މަރާލިކަމުގެ ތުޙުމަތުގައި ހައްޔަރުކޮށްފައިވާ ދެ މީހުން ދުއްވި ކާރު ފުލުހުންގެ ބެލުމުގެ ދަށަށް ގެންގޮސްފިއެވެ.

ނައީމާ މޫސާ މަރުވެފައި އޮތްވާ ފެނުނީ މިދިޔަ އޭޕްރީލް މަހުގެ 7 ވަނަ ދުވަހު އޭނާ ދިރިއުޅެމުންދިޔަ ގޭގައެވެ. މިއާއެކު މަރުގެ މައްސަލާގައި ފުލުހުންގެ ޚާއްޞަ ތަޙްޤީޤު ޓީމެއް ދަނީ މަނަދޫގައި ހަރަކާތްތެރިވަމުންނެވެ.

ނައީމާގެ މަރުގެ މައްސަލައިގައި މިހާތަނަށް ވަނީ ދެ މީހަކު ހައްޔަރު ކޮށްފައެވެ. އަދި މަރައިލަން ބޭނުންކުރި ދެ ހަތިޔާރާއި ގާތިލުން ލައިގެން ތިބި އަންނައުނު ވެސް ފުލުހުން ވަނީ ހޯދައިފައެވެ. އަދި މިހާރު އެމީހުން ދުއްވި ކާރުވެސް ވަނީ ފުލުހުންގެ ތަހުގީގަށް ފުލުހުންގެ ބެލުމުގެ ދަށަށް ގެންގޮސްފައެވެ.

ނައީމާގެ މަރުގެ ތުހުމަތުގައި ހައްޔަރުކޮށްފައިވަނީ މަނަދުއަށް ނިސްބަތްވާ ދެ ޒުވާނެކެވެ. އެއީ މަސްތުވާތަކެތި ބޭނުންކުރާ ދެ ޒުވާނުންކަމަށް އެ ރަށުން ވާހަކަ ދެއްކި މީހުން ކިޔައިދިނެވެ. އެ ދެ މީހުންގެ ތެރެއިން އެރަށު ފެހިވިލާގެ، އަހްޒަމް އަބްދުއްޝަކޫރު، 23 ވަނީ ތަހުގީގުގައި އިއުތިރާފް ވެސް ވެފައެވެ. އޭނާއަކީ ކުރިން މާލޭގައި ދިރިއުޅުނު މީހެކެވެ. ދެވަނަ މީހަކީ ރިފާޝް ނަމަކަށް ކިޔާ މީހެކެވެ.

އަހުޒަމް ހައްޔަރުކުރީ އޭނާގެ ކޮޓަރީގައި މަސްތުވާތަކެތި ހުރި ކަމަށް ފުލުހުންނަށް ލިބުނު ރިޕޯޓަކާ ގުޅިގެން ކޯޓު އަމުރެއްގެ ދަށުން ގޮސް ބަލާ ފާސްކުރުމުން އެ ތަނުން މަސްތުވާތަކެތި ފެނުމުންނެވެ.

ނައީމާ މަރާލުމަށް ބޭނުންކުރިކަމަށް ބެލެވޭ ތޫނު ދެހަތިޔާރު އަދިި ހަމަލާދިން ވަގުތު އެކަމުގައި ބައިވެރިވި މީހުން ލައިގެންތިބި އަންނައުނު، ވަޅުގަނޑެއް ކޮނެ އެތަކެތި އަޅާ، އަންދާލުމަށްފަހު ފަސްއަޅާ ފޮރުވާފައިވާތަން ކޮނެ އެތަކެތި މިހާރު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.

ނައީމާގެ މަރާއި ގުޅޭ ހެކިތައް ފުލުހުންނަށް ފެނުނީ އެރަށުގެ ނާމަގު ސަރަހައްދުންނެވެ. އެއީ ނައީމާ މަރާލި މައްސަލައިގައި އިއުތިރާފްވި މީހާ ދިން މައުލޫމާތައް ބަލައި ފާސްކުރި ތަނެކެވެ. ފުލުހުން އެސަރަހައްދު ފާސްކުރަމުން ގެންދިޔައިރު ހައްޔަރު ކޮށްފައި ތިބި ދެމީހުން ވެސް އެތަނުގައި ތިއްބެވެ.

ނައީމާގެ މަރަށް 50 ދުވަސްވެފައިވާއިރު، މިއީ މި މައްސަލައިގެ ތުހުމަތުގައި ބަޔަކު ހައްޔަރުކުރި ފުރަތަމަ ފަހަރެވެ. މަރުގެ ތަޙުޤީޤަށް ފުލުހުންގެ ގިނަ ޢަދަދެއްގެ ފޮރެންސިކް އެކްސްޓާޕުން އެ ރަށުގައި ހަރަކާތްތެރިވިއެވެ. އަދި އެ ރަށުގެ ގިނަ ބައެއްގެ ޑީ.އެން.އޭ ސާމްޕަލްވެސް ނެގިއެވެ.