ނ. މަނަދޫގައި އަނިޔާވެރިކޮށް މަރާލާފައި އޮއްވާ ފެނުނު އެރަށު އަންނާރުމާގެ، ނައީމާ މޫސާގެ މަރުގެ މައްސަލާގައި ފުލުހުންގެ ތަހުގީގަށް ބޮޑެތި ކުރިއެރުންތަކެއް ލިބިފައިވާކަން ކޮމިޝަނަރ އޮފް ޕޮލިސް އަހުމަދު ހަމީދު ހާމަ ކުރައްވައިފިއެވެ.

ފާއިތުވެދިޔަ މަހުގެ އޭޕްރީލް މަހުގެ ހަތްވަނަ ދުވަހު މަރާލާފައިވާ ނައީމާގެ މަރުގެ ތަހުގީގަށް ލިބިފައިވާ ކުރިއެރުންތައް ހާމަކުރައްވަމުން ޕޮލިސް ކޮމިޝަނަރ މިރޭ އެންމެ ފަހުން ކުރެއްވި ޓުވީޓުގައި ވިދާޅުވެފައިވަނީ، ނައީމާ މޫސާ މަރާލުމަށް ބޭނުންކުރިކަމަށް ބެލެވޭ ތޫނު 2 ހަތިޔާރުގެ އިތުރުން، ހަމަލާދިން ވަގުތު އެކަމުގައި ބައިވެރިވި މީހުން ލައިގެންތިބި އަންނައުނު، ވަޅުގަނޑެއް ކޮނެ އެތަކެތި އަޅާ، އަންދާލުމަށްފަހު ފަސްއަޅާ ފޮރުވާފައިވާތަން ކޮނެ އެތަކެތިވެސް މިހާރު ނަގާފައިވާކަމުގައެވެ.

އަދާހަމަ: ނައީމާ މޫސާ މަރާލުމަށް ބޭނުންކުރިކަމަށް ބެލެވޭ ތޫނު 2 ހަތިޔާރު އަދިި ހަމަލާދިންވަގުތު އެކަމުގައި ބައިވެރިވި މީހުން ލައިގެންތިބި އަންނައުނު، ވަޅުގަނޑެއް ކޮނެ އެތަކެތި އަޅާ، އަންދާލުމަށްފަހު ފަސްއަޅާ ފޮރުވާފައިވާތަން ކޮނެ އެތަކެތި ނެގިފައިވޭ.

— Mohamed Hameed (@M_Hameedh) May 26, 2023

މި ތަހުގީގުގައި ހޯދިފައިވާ އިތުރު ކުރިއެރުންތައް މިރޭ އިރާކޮޅު ކުރެއްވި އިތުރު ދެ ޓުވީޓެއްގައިވެސް ކޮމިޝަނަރ ހަމީދުވަނީ ހާމަ ކުރައްވާފައެވެ.