ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އެއްބަޑު އެއްބަފާ ލޯފަން ތިބެއިންނަށް އިމާމުކަމުގެ ޑިގްރީ ސެޓްފިކެޓް އެމަނިކުފާނުގެ އަތްޕުޅުން ހަވާލުކޮށް ދެއްވައިފިއެވެ.

މި އިމާމުންނާއި ބެސްޓް ސްޓޫޑެންޓް އެވޯޑް 9 ދަރިވަރުންނަށް އިނާމާއި އެވޯޑް ރައީސުލްޖުމްހޫރިއްޔާ ހަވާލުކޮށްދެއްވާފައިވާއިރު، އެ އިމާމުންގެ ތެރޭގައި ރައީސް ޞާލިހުގެ އެއްބަނޑު އެއްބަފާ ތިން ކޮއްކޮއިން ހިމެނެއެވެ. އެއީ މޫސާ މުހައްމަދު ޞާލިހު (މޫސަބެ)އާއި، ޝާޒްލީ އާއި ހުސެއިން ޝަޔާޒް (ކުޑަ ހުސައިން)އެވެ.

މޫސަބެ އާއި ޝާޒް އަދި ހުސެއިން ގުރުއާން ހިތުދަސްކުރެއްވީ ވެސް މައުހަދުގެ ގުރުއާން ކްލާސްތަކުންނެވެ. ޓޭޕް ރެކޯޑަރު ޖައްސައިގެން ދަސްކޮށް، ކޮންމެ ދުވަހަކު ސޮފްހާއެއް މުދައްރިސަށް ކިޔައިދެއްވަމުން ގޮސް ގުރުއާން ހިތުދަސްކުރައްވާފައި ވަނީ ތިން އަހަރުންނެވެ. އޭގެ ފަހުން، ހާފިޒު ކަމުގެ ކޯސް ނިމުމާ އެކު ދެން ފުރިހަމަކުރެއްވީ ގާރީ ކޯހާއި އިމާމު ކަމުގެ ކޯހެވެ. އެ ކޯސްތަކުގެ އެކި ލެވެލްތައް ފުރިހަމަކުރައްވަމުން، ޑިގްރީއާ ހަމައަށް ރޭ ދަސްވެނިވިއިރު، އެ ތިން ބޭފުޅުން ވެސް ކިޔަވައި ވިދާޅުވީ އެކުގައެވެ.

ރޭގެ ޖަލްސާގައި ރައީސް ޞާލިހުގެ ތިން ކޮއްކޮއަށްވެސް ސަނަދު ދެއްވައި ހިއްވަރު ދެއްވުމުގެ ބަސްކޮޅެއް، ބޭބެ، ރައީސް ޞާލިހު ވިދާޅުވާތަންވެސް ވީޑިއޯ އިން ފެނެއެވެ. އަދި ޖަލްސާއަށްފަހު ދަސްވެނިންނާއި އެކު ރައީސް ޞާލިހް އާއި އަނބިކަނބަލުން ފަޒްނާ އަހްމަދު ފޮޓޯ ނަންގަވާފައިވާއިރު ކޮއްކޮމެންނާއި އެކުވެސް ވަނީ ފޮޓޯ ނަންގަވާފައެވެ.

ރޭގެ ޖަލްސާގައި އިސްލާމީ ޔުނިވަރސިޓީން އެކި ދަރަޖައިގައި ދަސްވެނިވާ 709 ދަރިވަރުންނާ އަދި ބެސްޓް ސްޓޫޑެންޓް އެވޯޑް 9 ދަރިވަރަކު ޙާޞިލުކޮށް އިނާމާ ސެޓްފިކެޓް ހާސިލުކޮށްފައިވެއެވެ. މީގެ ތެރޭގައި ރާއްޖޭގެ އެ ޔުނިވަސިޓީން އިމާމު ކަމުގެ ޑިގްރީ ހާސިލްކުރި 78 އިމާމުން ވެސް ހިމެނެއެވެ.