އަހުމަދިއްޔާ ސްކޫލުގެ ޑެޕިއުޓީ ޑިރެކްޓަރ ޝާކިރު ކުއްލި ގޮތަކަށް ނިޔާވެއްޖެއެވެ.
އަހުމަދިއްޔާ ސްކޫލަށް އެންމެ ގިނަ ދުވަހު ޚިދުމަތް ކުރެއްވި ބޭފުޅުންގެ ތެރޭގައި ހިމެނޭ އިބްރާހިމް ޝާކިރަކީ އެ ސްކޫލުގައި 20 އަހަރަށް ވުރެ ގިނަ ދުވަހު ޚިދުމަތް ކުރައްވާފައިވާ ބޭފުޅެކެވެ. ޝާކިރު ނިޔާވިރު އުމުރަކީ 46 އަހަރެވެ.
ޝާކިރު ރޭ ނިޔާވިއިރު، އިއްޔެ ވަނީ އަހުމަދިއްޔާ ސްކޫލުގެ ދަރިވަރުންނާއިއެކު ދަތުރެއްވެސް ގޮސްފައެވެ. އަދި ރޭ ބޮލުގައި ރިއްސާ އުދަނގޫތަކެއް ވާކަމަށް އަންހެނުން ކައިރީގައި ޝާކިރު ވަނީ ބުނެފައެވެ. މައުލޫމާތު ލިބިފައިވާ ގޮތުގައި ޝާކިރު ހާލު އިތުރަށް ގޯސްވެ ހޮސްޕިޓަލަށް ގެންދިޔަ އިރުވެސް ވަނީ ނިޔާވެފައެވެ.
އަހުމަދިއްޔަ ސްކޫލުގެ ދަރިވަރުން ތަރުބިއްޔަތު ކުރުމުގައާއި، ސްކޫލުގެ އެކި ހަރަކާތްތަކުގައި އިސްކޮށް އުޅުއްވާ ޝާކިރަކީ ބެލެނެވެރިންނާއި، ދަރިވަރުންނާއި ގުޅޭ އެންމެންގެ ގާތް އެކުވެރިއެވެ. ޝާކިރު ނިޔާވުމާއި ގުޅިގެން ގިނަ ބަޔަކު ދަނީ ތައުޒިޔާ ދަންނަވަމުންނެވެ.
ޝާކިރު ނިޔާވިއިރު، އަންބަކާއި، 4 ދަރިން ދުނިޔޭގައި އެބަތިއްބެވެ. ކަށުނަމާދު އޮތީ މިއަދު މެންދުރު ނަމާދަށްފަހު އާސަހަރާ މިސްކިތުގައެވެ.
ޚަބަރު އޮންލައިންގެ ފަރާތުންވެސް މަރުހޫމް ޝާކިރުގެ ފުރާނައަށް ސުވަރުގޭގެ މަތިވެރި ނިއުމަތް މިންވަރު ކުރައްވައި، ޢާއިލާއަށް ކެތްތެރިކަން ދެއްވުން އެދި ދުޢާ ކުރަމެވެ.
