މިމަހު ކުރީކޮޅު ބޭއްވުނު ތުރުކީގެ ރިޔާސީ އިންތިޚާބުގައި 3 ވަނަ ހޯއްދެވި ސިނާން އޯގަން، ތުރުކީގެ މިހާރުގެ ރައީސް ތައްޔިބު އެރެދޮގާންއަށް ތާއީދުކުރަން ނިންމަވައިފިއެވެ.
ފާއިތުވި ހަފްތާގައި ތުރުކީގައި ބޭއްވުނު އެގައުމުގެ ރިޔާސީ އިންތިޚާބުގައި އެންމެ މަތިން ވޯޓު ހޯއްދަވާފައިވަނީ މިހާރުގެވެސް އެގައުމުގެ ރައީސް އެރެދޮގާންއެވެ. އޭނާ އިންތިޚާބުގެ ފުރަތަމަ ބުރުން 49.52 އިންސައްތަ ވޯޓު ހޯއްދެވިއިރު، އެރެދޮގާންއާއި ވާދަކުރެއްވި، 6 ޕާޓީއެއްގެ މައްޗަށް އެކުލެވޭ އިދިކޮޅު އިއްތިހާދުގެ ކެނޑިޑޭޓް ކިލިކްޑަރޮގްލު އަށް ކާމިޔާބު ކުރެއްވުނީ 44.88 އިންސައްތަ ވޯޓެވެ. ތިންވަނަ ހޯއްދެވި ސިނާން އޯގަންއަށް ކާމިޔާބު ކުރެއްވުނީ 5.17 އިންސައްތަ ވޯޓެވެ.
ތުރުކީގެ ގާނޫނު އަސާސީ ބުނާގޮތުން ރިޔާސީ އިންތިޚާބުގެ ފުރަތަމަ ބުރުން އެއްވެސް ކެނޑިޑޭޓަކަށް 50 އިންސަތައާއި އިތުރު 1 ވޯޓު ނުލިބިއްޖެނަމަ އެންމެ މަތިން ވޯޓު ހޯއްދެވި ދެ ކެނޑިޑޭޓުންގެ މެދުގައި ދެވަނަ ބުރެއް ބާއްވަން ޖެހެއެވެ.
މިގޮތުން ތުރުކީގެ އިލެކްޝަންސް ކޮމިޝަނުން ވަނީ، ފުރަތަމަ ބުރުގައި އެއްވެސް ކެނޑިޑޭޓަކަށް 50 އިންސައްތައާއި އިތުރަށް 1 ވޯޓު ނުހޯއްދެވުމުން، މިމަހުގެ 28ވަނަ ދުވަހު ރިޔާސީ އިންތިޚާބުގެ ދެވަނަ ބުރެއް ބޭވުމަށް ނިންމާފައެވެ.
ތުރުކީގެ ރިޔާސީ އިންތިޚާބުގައި ފުރަތަމަ ބުރުގައި 3 ވަނަ ހޯއްދެވި ސިނާން އޯގަން އެރެދޮގާންއަށް ތާއިދު ކުރާކަން ހާމަ ކޮށްފައިވަނީ ތުރުކީގެ ވެރިރަށް އަންކާރާގައި ބޭއްވި ނޫސްވެރިންގެ ބައްދަލުވުމެއްގައެވެ.
"އަހަރެމެން ގަބޫލުކުރަނީ މި ނިންމުމަކީ ގައުމަށް ރަގަޅު ނިންމުމަކަށް ވާނެކަމަށް،" އެރެދޮގާންއަށް ތާއީދު ކުރަން ނިންމި ހަގީގީ ސަބަބަކީ މި އިންތިޚާބުގައި އެރެދޮގާންގެ ޕާޓީން ޕާލަމެންޓުގެ މެޖޯރިޓީ ހޯދާފައިވާތީކަން ފާހަގަ ކުރައްވަމުން އޯގަން ވިދާޅުވެފައި ވެއެވެ.
"އަލަށް އިންތިޚާބުވާ ރައީސަކު ގާނޫނު ހަދާ މަޖިލިހުގެ ލީޑަރޝިޕާއެކު ހުންނެވުން ވަރަށް މުހިންމު. އިދިކޮޅު އިއްދިހާދަށް (ކިލިކްޑަރޮގްލުގެ ކޯލިޝަނަށް)، 20 އަހަރު ވެރިކަން ކުރަމުންދާ ޕީޕަލްސް އެލަޔަންސް (އެރެދޮގާންގެ އިއްތިހާދު)ގެ މައްޗަށް ކާމިޔާބެއް ނުހޯދުނު. އަހަރެމެންނަށް ޔަގީންކަމެއް ދެވޭވަރުގެ ކާމިޔާބެ ނުނެރެވުނު."
އޭނާ އިތުރަށް ވިދާޅުވެފައިވާ ގޮތުގައި އެރެދޮގާންއަށް ތާއީދު ކުރަން ނިންމެވީ، "ޓެރަރިޒަމާއި ދެކޮޅަށް" ކުރެވެމުންދާ ހަނގުރާމައަށް ހުއްޓުމެއް އަޔަ ނުދިނުމުގެ މަގުސަދުގައި ކަމަށެވެ.
ތުރުކީގެ ރިޔާސީ އިންތިޚާބުގެ ފުރަތަމަ ބުރުގައި 3 ވަނަ ހޯއްދެވި ކެނޑިޑޭޓް އެރެދޮގާންއަށް ތާއީދު ކުރަން ނިންމުމުން، 2 ވަނަ ބުރުގައި އިދިކޮޅު އިއްތިހާދުގެ މައްޗަށް އެރެދޮގާން ފަސޭހަކަމާއެކު ކާމިޔާބު ހޯއްދަވާނެކަމަށް މިހާރު ވަނީ ބެލެވިފައެވެ.
އެރެދޮގާން ތުރުކީގެ ވެރިކަމުގައި ހުންނަވާތާ މިހާރު 20 އަހަރުވަނީ ވެފައެވެ.
