ފްލެޓު ވިއްކުމުގެ ނަމުގައި ގިނަ އަދަދެއްގެ ފައިސާ މީހުންގެ އަތުން ނަގައި ހިޔާނަތްވާ މައްސަލަތައް ސަރުކާރުގެ ސަމާލުކަމަށް ގެނައުމަށް ހުށަހެޅި ކުއްލި މައްސަލަ ރައްޔިތުންގެ މަޖިލީހުން މިއަދު ބޭރު ކޮށްލައިފިއެވެ.
ތިމަރަފުށި ދާއިރާގެ އެމްއެންޕީ މެމްބަރު ރިޔާޒް ހުށަހެޅުއްވި އެ މައްސަލަ މަޖިލީހަށް ބަލައިގަތުމާ މެދު ގޮތެއް ނިންމަން ނެގި ވޯޓުގައި ބައިވެރިވެވަޑައިގެންނެވި 44 މެމްބަރުންގެ ތެރެއިން 26 މެމްބަރަކު ވޯޓް ދެއްވީ އެ މައްސަލަ ބަލައިގަތުމާ ދެކޮޅަށެވެ. އެ މައްސަލަ ބަލައިގަންނަން ފެންނަ ކަމަށް ވޯޓު ދެއްވީ 18 މެމްބަރެކެވެ.
ރިޔާޒް ހުށަހެޅުއްވި ކުއްލި މައްސަލާގައި ވިދާޅުވީ މަކަރާއި ހީލަތުން އެއް ފްލެޓެއް ގިނަ ބަޔަކަށް ވިއްކާ މައްސަލަ އާއި ގިނަ އަދަދެއްގެ ފައިސާ ނެގުމަށް ފަހު ފްލެޓު ނުނިމި ލަސްވުމަކީ ރައްޔިތުން އިންތިހާއަށް ކަންބޮޑުވާ މައްސަލައެއް ކަމަށެވެ. ބޯހިޔާވެހިކަމުގެ މަޝްރޫއުތައް އެވޯޑްކުރުމުގައި ސަރުކާރުން އެކަށީގެންވާ ވަރަށް ނުބަލާ ކަމަށާއި މިކަމުގެ ސަބަބުން މަޝްރޫއުތައް ނުނިމި ކުލި ދެއްކުމުގެ ބުރަ ދެގުނަވެ ރައްޔިތުން ބިކަވެފައިވާ ކަމަށް ރިޔާޒް ވިދާޅުވިއެވެ.
އުމުރު ދުވަހު މަސައްކަތް ކޮށްގެން ރައްކާކުރާ ފައިސާކޮޅާއި ލޯނު ނަގައިގެން ދަރަނިވެގެން ހޯދާ ފައިސާކޮޅު މަކަރާއި ހީލަތުން ނިގުޅައިގަންނަމުން ދާއިރު، ރައްޔިތުންގެ ހައްގު ރައްކާތެރިކޮށްދޭން އެއްވެސް މުއައްސަސާއަކުން ނޫޅޭ.
– ކުއްލި މައްސަލާގައި ބުނެފައިވެއެވެ.
ފައިސާ ނެގުމަށް ފަހު ފްލެޓް ނުނިމި ލަސްވާ މައްސަލަ އަކީ އެފަދަ މަޝްރޫއުތައް ހަވާލުކުރާ އިރު ބަލަންވާ ވަރަށް ނުބެލުމުގެ ސަބަބުން ކުރިމަތިވާ ކަމެއް ކަމަށް ވެސް އޭނާ ތުހުމަތުކުރެއްވިއެވެ. ފްލެޓް ވިއްކުމުގެ ނަމުގައި ބައެއް ކުންފުނިތަކުން ނެގުމުގެ ސަބަބުން ބަންދުވެފައިވާ ފައިސާ އަކީ ރިޔާޒް ވިދާޅުވި ގޮތުގައި ބައެއް މީހުން އުމުރު ދުވަހު ކުރި މަސައްކަތުން އެއްކޮށްފައިވާ ފައިސާއެވެ. އެގޮތަށް ދައްކާފައިވާ ފައިސާގެ ތެރޭގައި މީހުން ބޮޑެތި ލޯނުތައް ނަގައިގެން ދެއްކި ފައިސާ ހިމެނޭ ކަމަށް ވެސް އޭނާ ވިދާޅުވިއެވެ.
ރިޔާޒް އެ މައްސަލަ ހުށަަހެޅުއްވި އިރު އޮޅުވާލައިގެން ކޭ ޕާކުގެ ފްލެޓްތަކެއް ވިއްކިކަމަށް ބުނާ މައްސަލަ ހޫނުވެ ފުލުހުން އެ މައްސަލަ މިހާރު ދަނީ ބަލަމުންނެވެ.
ކޮމެންޓު ފޮނުވާ