އެމްޑީޕީގެ ރައީސް މުހައްމަދު ނަޝީދު ހިންގަވާ ފިކުރެއްގެ ދިރުން ސިޔާސީ ހަރަކާތުން އަލަށް އުފެއްދުމަށް މިއަދު ހުށަހެޅި އާ ޕާޓީ "ދަ ޑިމޮކްރޭޓްސް" ޕާޓީއާއި ރައްޔިތުންގެ މަޖިލިހުގެ އިތުރު މެމްބަރުން ގުޅިވަޑައިގަންނަވާނޭ ކަމުގައި، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެއެވެ.
ދަ ޑިމޮކްރޭޓްސް ޕާޓީ ރަޖިސްޓްރީ ކުރުމަށް މިއަދު ހުށަހެޅުއްވުމަށްފަހު ނޫސްވެރިންނާ ވާހަކަ ދައްކަވަމުން ހަސަން ލަތީފު ވިދާޅުވީ މަޖިލިސް މެމްބަރުންގެ އިތުން އެމްޑީޕީގެ ގިނަ އަދަދެއްގެ ދާއިރާގެ ރައީސުންވެސް އެޕާޓީއާއި ކުރިޔަށް އޮތް ތަނުގައި ގުޅޭނެ ކަމުގައެވެ.
ދަ ޑިމޮކްރޭޓްސް ޕާޓީ އުފެއްދުމަށް މިއަދު އެނާގެ ނަމުގައި ފޯމް ހުށަހެޅި ނަމަވެސް ހަސަން ލަތީފު ނުސީދާކޮށް ވިދާޅުވެފައިވަނީ އެޕާޓީއަކީ ރައީސް ނަޝީދު އިސްކޮށް ހުންނަވައިގެން އުފެއްދެވި ޕާޓީއެއްކަމުގައެވެ. އޭނާ ވިދާޅުވީ މިއަދު ޕާޓީ ފޯމު ހުށަހަޅަން ވަޑައިގެންނެވި މެމްބަރުންނަށް ބަލައި ލުމުންވެސް ރައީސް ނަޝީދުގެ ވިސްނުމާއި އެއްގޮތަށް ނޫނީ ޕާޓީގެ ހަރަކާތް ކުރިއަށް ނުދާނެކަން ކަށަވަރު ވާނެކަމަށެވެ.
ތިބޭފުޅުންނަށް ފެންނާނެ މިއަދު މިތަނަށް ވަޑައިގެންނެވި ބޭފުޅުން. މިބޭފުޅުންނަށް ބައްލަވާ ލެއްވީމަ ޔަގީން ކުރައްވާ އަޅުގަނޑުމެންގެ ތެރެއިން އެއްވެސް ބޭފުޅަކު މިމަސައްކަތެއް ނުކުރައްވާނެ ރައީސް ނަޝީދު މިކަމަށް ތާއީދު ނުކުރައްވާނަ.
– ހަސަން ވިދާޅުވިއެވެ.
ރިޔާސީ އިންތިޚާބުގައި ހުރިހާ ފަރާތްތަކަށްވެސް ދި ޑިމޮކްރެޓްސްއާއިއެކު މަސައްކަތް ކުރުމުގެ ފުރުސަތު އޮންނާނެކަމަށް ހަސަން ވިދާޅުވިއެވެ. ޕާޓީގެ ތަރުޖަމާނަކަށް ކަނޑައެޅުއްވި އަފްޝަން ވިދާޅުވީ ޕާޓީއަށް މިނަން ދެވުނީ މިމަސައްކަތުގައި އިސްކޮށް އުޅުއްވާ ބޭފުޅުންނަކީ ޑިމޮކްރަސީގެ އަސާސްތަކަށް ތާއީދުކުރާ ޑިމޮކްރަސީ ނެގެހެއްޓުމަށް މަސައްއްކަތް ކުރާ ބޭފުޅުންކަމަށް ވާތީއާއި، އެބޭފުޅުންގެ އަމާޒަކީވެސް ޑިމޮކްރަސީގެ އުސޫލުން ކަންކަން ކުރުން ކަމަށް އަފްޝަން ވިދާޅުވިއެވެ.
އޭނާ ވިދާޅުވީ އެޕާޓީގެ އަމާޒަކީ ލާމަރުކަޒީ އުސޫލުން ކަންކަން ކުރެވޭނެ މަގު ޕާޓީ ތެރެއިން ފަހި ކުރުންކަމަށެވެ. އަދި މިހާރު އޮތް ނުތަނަވަސް ކަމުގެ ތެރެއިން ރައްޔިތުންނަށް ހަމަޖެހޭ ތަނަވަސް ދިރިއުޅުމެއް ހޯދުމަށް ކުރަންޖެހޭ މަސައްކަތް ކުރުންކަމަށެވެ. އެމަސައްކަތުގައި އެޕާޓީ ދެމި އޮންނާނެކަމަށެވެ.
ދި ޑިމޮކްރެޓްސް ޕާޓީ އުފެއްދުމަށް މިއަދު ހުށަހެޅިއިރު، އެބޭފުޅުންވަނީ ޕާޓީ ވީހާވެސް އަވަހަށް އުފެއްދުމުގެ ހުއްދައަށް އިލެކްޝަންސްގައި އެދިފައެވެ. އިލެކްޝަނުން މިހުއްދަ 7 ދުވަހުގެ ތެރޭގައި ދޭންޖެހޭނެކަމަށް ޤާނޫނުގައި ބުނެފައިވެއެވެ. އެހެން ނަަމަވެސް އޭގެ ކުރިންވެސް ޕާޓީ ހެދުމުގެ ހުއްދަ ދޭނެކަމަށް ބެލެއެވެ.
