ސިޔާސީ މީހުންނަށް ކުރިމަގު ގެއްލިފައޮތް އެމްޑީޕީގެ ދޮރު އަލުން ހުޅުވިގެން މިދަނީ މާއުޖާލާކޮށް ކަމުގައި އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ވިދާޅުވެއްޖެއެވެ.

މޫސާ މަނިކު މިހެން ވިދާޅުވީ އެމްޑީޕީއަށް ސިޔާސީ މީހުން ގުޅުމަށް ނިމިދޔަ ދުވަސްތަކުގައި އޮތް ގޮންޖެހުންތަކާއި ސިޔާސީ ގޮތުން އެމްޑީޕީ އޮތް ހާލަތު ވިދާޅުވެ ކުރެއްވި ޓުވީޓެއްގައެވެ. އޭނާ މިސާލު ނެންގެވީ 2011 ވަނަ އަހަރު އެމްޑީޕީއާއި ގުޅުނު އަލީ ވަހީދު އެމްޑީޕީން ބޭރުކޮށްލި ގޮތަށެވެ. މޫސަ ވިދާޅުވީ އަލީ ވަހީދު ފަދަ ބޭފުޅުންގެ ސިޔާސީ ކުރިމަގު ބަނަކޮށްލީ ސީދާ ވަކި މީހެއްގެ އަމިއްލަ މަންފާއަށެވެ.

މޫސަ ވިދާޅުވީ މިއަދު އެމްޑީޕީގެ ތެރޭގައި އޮތް ޒާތީ ކަންކަން ފިލައި ސިޔާސީ މީހުންނަށް ހަމަޖެހިލައިގެން މަސައްކަތް ކުރުމުގެ ފުރުސަތު ހުޅުވިފައިވާކަމަށެވެ. އަދި ކޮންމެ މީހަކަށްވެސް އެމްޑީޕީގައި ކުރިމަގު އޮތްކަމަށް މޫސަ ވިދާޅުވިއެވެ.

މީގެ12 އަހަރުުކުރިން 20 މޭ 2011 ވަނަ ދުވަހު މިޕާޓީއަށްގުޅުނު ކުރީގެޗެއަރ އަލީވަހީދުވެސް ޕާޓީން ބޭރުކޮށްލީ ހަމަ ވަކިމީހެއްގެ ސިޔާސީ ކުރިމަގަށް ހުރަސްއެޅިދާނެތީ، އިރާދަކުރެއްވިއްޔާ ސިޔާސީ މީހުނަށް ކުރިމަގު ގެއްލިފައޮތް MDP ގެ ދޮރު އަލުން ހުޅުވިގެން މިދަނީ މާއުޖާލާކޮށް.

– މޫސަ ވިދާޅުވިއެވެ.

މީގެ12 އަހަރުުުކުރިން 20 މޭ 2011ވަނަދުވަހު މިޕާޓީއަށްގުޅުނު ކުރީގެޗެއަރ އަލީވަހީދުވެސް ޕާޓީން ބޭރުކޮށްލީ ހަމަ ވަކިމީހެއްގެ ސިޔާސީ ކުރިމަގަށް ހުރަސްއެޅިދާނެތީ، އިރާދަކުރެއްވިއްޔާ ސިޔާސީ މީހުނައް ކުރިމަގުގެއްލިފައޮތް MDPގެދޮރުއަލުންހުޅުވިގެންމި ދަނީ މާއުޖާލާކޮށް pic.twitter.com/pUTyXbkwUp

— Moosa Maniku (Reeko) (@ReekoMoosa) May 20, 2023

މޫސަ މިހެން ވިދާޅުވިއިރު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިމަހު ތިންވަނަ ދުވަހުން ފެށިގެން އިނގިރޭސިވިލާތަށް ކުރެއްވި ދަތުރުފުޅުގައި، އެ ގައުމަށް އަމިއްލައަށް އަރުވާލެވިގެން ހުންނެވި، ކުރީގެ ޓޫރިޒަމް މިނިސްޓަރު އަލީ ވަހީދާ ބައްދަލު ކުރިކަމަށް ދަނީ އަޑު ފެތުރެމުންނެވެ.

އެ ދަތުރުފުޅުގައި ރައީސް ސޯލިހު އަލީ ވަހީދާ ބައްދަލު ކުރައްވައި، އޭނާގެ މައްޗަށް ކުރާ ދައުވާތަކާ ގުޅިގެން އެއްވެސް ފިޔަވަޅެއް ސަރުކާރުން ނާޅާނެކަމަށް ދަންނަވާފައިވާ ކަމަށް ބައެއް މީޑިއާތަކުން ވަނީ ރިޕޯޓުކޮށްފައެވެ. އެކަން ދޮގު ކުރައްވައި، ރައީސުލްޖުމްހޫރިއްޔާގެ އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ރައީސްގެ ދަތުރުފުޅުގައި އަލީ ވަހީދާ ބައްދަކު ކުރެއްވިކަމަށް ދައްކާ ވާހަކަތަކަކީ، ކަނޑައެޅިގެން ދޮގެއް ކަމަށެވެ.

ޓޫރިޒަމް މިނިސްޓަރުކަމުގެ މަގާމުގައި ހުންނަވައިގެން އެ މިނިސްޓްރީގެ ގިނަ އަދަދެއްގެ އަންހެން މުވައްޒިފުން ތަކަކަށް ޖިންސީ ގޯނާ ކުރިކަމުގެ ތުހުމަތުގައި، އަލީ ވަހީދަށް ވަނީ ދައުލަތުން ގިނަ ދައުވާތަކެއް ކޮށްފައެވެ.

އޭގެ ތެރޭގައި ޖިންސީ އަނިޔާކުރުމުގެ ދައުވާއާއި ޖިންސީ ގޯނާކުރުމުގެ ދައުވާއާއި ޖިންސީ ގޯނާކުރަން އުޅުމުގެ ދައުވާއާއި ރޭޕް ކުރަން އުޅުމުގެ ދައުވާގެ އިތުރުން ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ކުށުގެ ދައުވާ އަދި ހުއްދަ ނޫން ޖިންސީ މުއާމަލާތެއް ހިންގުމަށް އެދުމުގެ ދެ ދައުވާއެއްވެސް ދައުލަތުން އުފުލާފައިވެއެވެ. އެ ހުރިހާ ދައުވާއަކަށް ވެސް އަލީ ވަހީދު ވަނީ އިންކާރު ކުރައްވައިފައެވެ.

އެ ދައުވާތައް އޭނާގެ މައްޗަށް ސާބިތުވެއްޖެ ނަމަ 21 އަހަރުގެ ޖަލު ހުކުމެއް އަންނާނެއެވެ. ނަމަވެސް އެ ދައުވާތައް ފަހެއް އޮކްޓޫބަރު 2022 ގައި ކުރިމިނަލް ކޯޓުން ވަނީ ޕްރޮސެކިއުޓާ ޖެނެރަލް (ޕީޖީ) އޮފީހަށް އަނބުރާ ފޮނުވާލައިފައެވެ. ދައުވާތައް އަނބުރާ ފޮނުވައިލީ އިންޓަޕޯލް ރެޑް ނޯޓިސް ނެރެގެންވެސް އޭނާ ޝަރީއަތަށް ހާޒިރު ކުރެވޭގޮތް ނުވެގެންނެވެ.

ނަމަވެސް ޕީޖީ އޮފީހުން އޭރު ބުނެފައި ވަނީ އަލީ ވަހީދަށް ކުރި ދައުވާތައް އަނބުރާ ފޮނުވާލާފައި ވަނީ، އެ މައްސަލަތައް ފަހުން ހުށަހެޅޭ ގޮތަށް ކަމަށެވެ.