އެކުވެރިކަމާއި އަވައްޓެރިކަމުގައި ރުޅި އިސްކޮށްގެން ނުވާނެކަމަށާއި، ދުނިޔެއަކީ އެއަށްޓަކާ އަރާރުންވާންޖެހޭ ވަރުގެ އަގުހުރި ތަނެއް ނޫންކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"ރުޅި މަތަކުރުމުގެ ޖަޒާއަކީ ސުވަރުގެއެވެ." މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ވިދާޅުވި ގޮތުގައި މުސްލިމުން ނަމޫނާއަކަށް ބަލަންޖެހޭނީ ލޮބުވެތި މާތް ނަބިއްޔާއެވެ.
އެމީހުން، އެމީހުންގެ އަމިއްލަ ޝަޚުސީ ކަންތައްތަކަށް ރުޅި އައިސްގެން ނުވާނެއެވެ. ގަނެވިއްކުމާއި މުޢާމަލާތުތަކުގައި ރުޅި އިސްކޮށްގެން ނުވާނެއެވެ. އެކުވެރިކަމާއި އަވައްޓެރިކަމުގައި ރުޅި އިސްކޮށްގެން ނުވާނެއެވެ. އެމީހުން އަވަދިނެތި އުޅެން ޖެހޭނީ އިސްލާމް ދީނަށްޓަކައެވެ. ދުނިޔެއަކީ އެއަށްޓަކާ އަރާރުން ވާންޖެހޭ ވަރުގެ ތަނެއް ނޫނެވެ. ﷲގެ ހަޒުރަތުގައި އެއީ މަދިރިއެއްގެ ފިޔައަކަށްވުރެ އަގު ދަށް ތަނެކެވެ.
މިއަދު ހުކުރު ޚުޡުބާގައި ވިދާޅުވެފައި ވެއެވެ.
މިއަދުގެ ހުކުރު ޚުޡުބާގައި އިތުރަށް ބަޔާން ކޮށްފައިވާ ގޮތުގައި ރުޅި މަތަ ކުރުމަކީ އެހާ މުހިންމު ކަމަކަށް ނުވާނަމަ އޭގެ ޖަޒާއަކަށް ސުވަރުގެ ނުވީހެވެ.
މުސްލިމް އަޚުންނޭވެ! ކީރިތި ރަސޫލާ ބަޔާން ކޮށްދެއްވާފައިވާ ގޮތުގައި ރުޅިއަކީ ޝައިޡާނާ އިންސާނާގެ ހަށިގަޑުތެރެއަށް އުކާ އަލިފާނުގެ އަގުރުތަކެކެވެ. އެހެންވެ ކީރިތި ރަސޫލާ އެކަލޭގެފާނުގެ ސަޙާބީންނަށް ވަސިއްޔަތް ކުރައްވާފައިވަނީ، "ތިޔަ ބޭކަލުން ކޯފާ އިސްނުކުރައްވާށެވެ! ތިޔަ ބޭކަލުން ކޯފާ އިސް ނުކުރައްވާށެވެ!" މިފަދައިންނެވެ.
ކޯފާ އިސް ނުކުރުމަށް އިސްލާމް ދީނުގައި ބާރުއަޅުއްވާފައިވާ މިންވަރު ބަޔާންކޮށްދެއްވަމުން މިއަދު ޚުޡުބާގައި ވިދާޅުވެފައި ވެއެވެ.
ޚުޡުބާގައި ވިދާޅުވެފައިވާ ގޮތުގައި ރުޅި މަޑުކުރުމަކީ މާތް ސިފައަކަށް ވީނަމަވެސް، މިއަދު މުސްލިމުންގެ ތެރެއިން ރުޅި މަޑުކުރުމުގެ ރީތި ނަމޫނާތައް ފެންނަމުންނެއް ނުދެއެވެ.
