ދިވެހި ދައުލަތުގެ ޖީޑީޕީ، ނުވަތަ ޤައުމީ އުފެެއްދުންތެރިކަން މިއަހަރުގެތެރޭގައި 100 ބިލިޔަން ރުފިޔާއަށް އަރާނެކަމަށް ސަރުކާރުން ހާމަކުރައްވައިފިއެވެ. މިއީ ރާއްޖޭގެ ތާރީޚުގައިވެސް ދައުލަތުގެ ޖީޑީޕީ މިހާ މައްޗަށް އަރާ ފުރަތަމަ ފަހަރެވެ.
ފިނޭންސް މިނިސްޓްރީން ވަނީ މިިކަން ހާމަކުރައްވާފައެވެ. ދައުލަތުގެ އިޤްތިޞާދީ ޙާލަތު ބަޔާންކޮށް ޢާއްމުކުރައްވާފައިވާ "މެކްރޯއިކޮނޮމިކް އަޕްޑޭޓް" ރިޕޯޓްގައިވާގޮތުން، ރާއްޖޭގެ ނޮމިނަލް ޖީޑީޕީ 107.2 ބިލިޔަން ރުފިޔާއަށް އަރާނެއެވެ.
ވޭތުވެދިޔަ އަހަރުތަކުގައި ރާއްޖޭގެ އިޤްތިޞާދަށް އެކިކަހަލަ ދަތިތަކާއި ހުރަސްތައް ކުރިމަތިވިޔަސް ދިވެހި ސަރުކާރުން އެޅުއްވި ހަރުދަނާ ސިޔާސަތުތަކުގެ ސަބަބުން ރާއްޖޭގެ އިޤްތިޞާދު ރަނގަޅުވެ، ސަރަޙައްދުގެ އެންމެ ކުރިއަރަމުންއަންނަ އިޤްތިޞާދަކަށް ރާއްޖެވަނީ ވެފައިކަން ފިނޭންސް މިނިސްޓަރ އިބްރާހިމް އަމީރު ވިދާޅުވެއެވެ. އެގޮތުން ރާއްޖޭގެ އިޤްތިޞާދި މައިގަނޑު ސިނާޢަތްތައް ހަރުދަނާކުރައްވައި ކުރިއަރުވަން ސަރުކާރުން ކުރައްވާ މަސައްކަތްތައް މިނިސްޓަރ އަމީރު ފާހަގަކުރައްވައެވެ.
ކޯވިޑަށްފަހު ދުނިޔެއަށް ކުރިމަތިވި އިޤްތިޞާދީ ހީނަރުކަމުގެ ރާޅުން ރާއްޖެ ސަލާމަތްވެ ކުރިއެރީ ރާއްޖޭގެ ފަތުރުވެރިކަމާއި އެހެނިހެން ސިނާޢަތްތައް ކުރިއެރުމުންނެވެ. ޚާއްސަކޮށް ފަތުރުވެރިކަން ރަނގަޅުވެ އިޤްތިޞާދީގޮތުން ރާއްޖެ ހޯދަމުންދާ ކުރިއެރުންތައް ބައިނަލްއަޤްވާމީ މާލީ އިދާރާތަކުންވެސް ފާހަގަކުރެއެވެ.
