މި އަހަރު އޮންނަ ރިޔާސީ އިންތިހާބުގައި އެމްޑީޕީގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ސޯލިހުގެ ރަނިން މޭޓަކަށް އެންމެ ރަނގަޅީ ކޮން ބޭފުޅެއްތޯ ބެލުމަށް އެމްޑީޕީގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ޕޯލަކަށް ހުޅުވާލައިފިއެވެ.

ތިން ދުވަހުގެ ނިޔަލަށް ހަސަން ހުޅުވާލާފައިވާ މި ޕޯލްގައި ރައީސް ޞާލިހުގެ ރަނިން މޭޓަކަށް ވޯޓު ދިނުމަށް އޮތް ދެނަމަކީ މިހާރުގެ ފޮރިން މިނިސްޓަރ ޝާހިދާއި، އެމްޑީޕީގެ ޕާލިމަންޓްރީ ގްރޫޕްގެ ރައީސް މުހައްމަދު އަސްލަމްގެ ނަމެވެ. ޝާހިދަކީ ރައީސް ޞާލިހުގެ ވެރިކަމުގައި ޚާރިޖީ ގޮތުންނާއި، ޤައުމަށް ބޭރުގެ އެހީ ހޯއްދެވުމުގައި އެންމެ މުހިންމު ދައުރެއް އަދާކުރެއްވި ފަރާތެވެ.

އަސްލަމަކީ ރާއްޖޭގެ ދެވަނައަށް އެންމެ އާބާދީބޮޑު އެއްސިޓީ އައްޑޫ ސިޓީއަށް ނިސްބަތާ ބޭފުޅެކެވެ. އަދި އެމްޑީޕީ އުފެދުނީއްސުރެއް މިއަދާއި ހަމައަށްވެސް އެޕާޓީގައި އިސްކޮސް ހަރަކާތްތެރިވާ ބޭފުޅެކެވެ. މެމްބަރު ހަސަން ލަތީފަކީ ދެބައިވެފައިވާ އެމްޑީޕީގެ ރައީސް ނަޝީދުގެ ފެކްޝަންގެ ބޭފުޅެކެވެ. ހަސަންގެ ޕޯލަށް މިހާތަނަށް 1،000 އަށްވުރެ ގިނަ މީހުން ވޯޓު ދީފައިވާއިރު، ކުރީގައި އުޅުއްވަނީ ޝާހިދެވެ.

Raees @ibusolih ge running mate akah emme rangalhee

— Hassan Latheef🎈 (@HassanLatheef) May 4, 2023

ރިޔާސީ އިންތިޚާބުގައި އެމްޑީޕީގެ ފަރާތުން ރައީސް ޞާލިހު ވާދަކުރައްވާއިރު، މިހާތަނަށް ރަނިން މޭޓެއް ކަނޑައެޅުމުގެ އެއްވެސް ވާހަކައެއް ދެކެވިފައި ނުވެއެވެ. ރަނިން މޭޓަކަށް ބޭފުޅަކު ކަނޑައެޅުމުގެ ވިސްނުން ހުރިގޮތް ބެލުމަށް ރައީސާއި ކުރެއްވި ސުވާލުގެ ޖަވާބުގައި ވިދާޅުވެފައިވަނީ ރަނިން މޭޓަކަށް ބޭފުޅަކު ކަނޑައެޅުމަކީ ވަރަށް ފަސޭހަ ކަމެއްކަމަށެވެ. އެގޮތުން މިހާރު ކޯލިޝަން ހަދާފައިވާ ޕާޓީތަކާއި އަދި އެމްޑީޕީގެ ތެރޭގައިވެސް އެކަމަށް ވަރަށް ގާބިލް ބޭފުޅުން ތިއްބެވިކަމަށެވެ.

އެހެންކަމުން ރަނިން މޭޓެއް ކަނޑައެޅުމަށް މާބޮޑު ގޮންޖެހުމެއް ނެތްކަމަށް ރައީސް ވަނީ ވިދާޅުވެފައެވެ. ރިޔާސީ އިންތިޚާބުގައި ކެނޑިޑޭޓުންގެ ގޮތުގައި ވާދަކުރުމަށް ހުޅުވާލާނީ 23 ޖުލައިން 3 އޯގަސްޓުގެ ނިޔަލަށެވެ. އަދި ކެނޑިޑޭޓުންގެ ނަންތައް ތަރުތީބުކޮށް 9 އޯގަސްޓްގައި އިޢުލާންކުރާނެއެވެ. ކެންޑިޑޭޓުން ކެމްޕެއިން ކުރުމަށް 10 އޯގަސްޓުން ފެށިގެން 8 ސެޕްޓެމްބަރާ ހަމައަށް ފުރުޞަތު ދެއްވުމަށްވެސް ކޮމިޝަނުން ވަނީ ނިންމަވައިފައެވެ.

ރިޔާސީ އިންތިޚާބުގައި ވެރިކަންކުރާ މައި ޕާޓީން ވާދަކުރައްވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އިދިކޮޅު ޕީޕީއެމްއިން ވާދަކުރަން ނިންމާފައިވަނީ ކުރީގެ ރައީސް ޔާމީނެވެ. ނަމަވެސް އެމަނިކުފާނު ގެންދަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެހެންކަމުން އެމަނިކުފާނަށް އިންތިޚާބުގައި ވާދަކުރެވިދާނެކަމާމެދު ވަނީ ސުވާލެއްގެ ތެރޭގައެވެ.

ޙުކުމް އިސްތިއުނާފުކޮށްފައިވާއިރު، މަތީ ކޯޓުން މި މައްސަލާގައި ނިންމާ ގޮތަކުން ރައީސް ޔާމީނަށް ވާދަކުރުމުގެ ފުރުޞަތު ވެސް ލިބިދާނެއެވެ. އިންތިޚާބުގައި ދެން ވާދަކުރައްވާނެ ކަމަށް އިޢުލާން ކުރައްވާފައިވަނީ އެމްއެންޕީގެ ފަރާތުން އެޕާޓީގެ ރައީސް މުޙައްމަދު ނާޒިމާއި، ޖުމްހޫރީ ޕާޓީގެ ލީޑަރު ޤާސިމް އިބްރާހީމާއި، މިނިވަން ކެނޑިޑޭޓުންގެ ގޮތުގައި ޑރ.މުޙައްމަދު މުނައްވަރުގެ އިތުރުން ޢުމަރު ނަޞީރެވެ.