ރާއްޖޭގެ އެންމެ ފުރަތަމަ ޕައިލެޓް އިބްރާހީމް ރަޝީދަކީ އޭވިއޭޝަން ކެރިއަރަކީ އެފަދަ ދެވަނައެއްނެތް ލާމަސީލު މިސާލެއް ކަމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
އިބްރާހިމް ރަޝީދު ފްލައިޓް ދަތުރުތައް ނިންމާލެއްވިއިރު ވަޒީފާ އަދާކުރަމުން ގެންދިޔައީ، ވިލާ އެއާގައެވެ. ވިލާ އެއާއަކީ ޤާސިމް ޗެއާމަން ކުރައްވާ ކުންފުންޏެވެ. ރާއްޖޭގެ އެންމެ ފުރަތަމަ ޕައިލެޓް އިބްރާހީމް ރަޝީދު އެންމެ ފުރަތަމަ ޚިދުމަތާ ގުޅިވަޑައިގަތީ 1983 ވަނަ އަހަރު އެއާރ މޯލްޑިވްސްއާއެވެ. މެދުކެނޑުމެއްނެތި 40 އަހަރަށްވުރެ ދިގު މުއްދަތެއްގައި އުދުހުމަށްފަހު ކެޕްޓަން އިބްރާހީމް ރަޝީދު ވަނީ އެންމެ ފަހު ދަތުރަށްފަހު އިއްޔެ ޚިދުމަތުން ރިޓަޔަރކުރައްވާފައެވެ.
ކެޕްޓަން އިބުރޭގެ ޚިދުމަތުގެ އަގުވަޒަންކޮށް ވިލާ ކުންފުނީގެ ޗެއާމަން އަދި ޖުމްހޫރީ ޕާޓީގެ ލީޑަރު، އޮނަރަބަލް ޤާސިމް އިބްރާޙީމް ކުރެއްވި ޓުވީޓެއްގައި ވިދާޅުވީ، ކެރިއަރުގެ ފަހު ދަތުރު، ފްލައިމީގެ ވީޕީ 609 ފްލައިޓުގައި ފުރިހަމަކުރެއްވުމަށްފަހު ކެޕްޓަން އިބުރޭ ރިޓަޔަރކުރެއްވުމުން އެކަމަށް ވަރަށް ހޫނު މަރުހަބާއެއް ދަންނަވާ ކަމަށެވެ.
ރާއްޖޭގައި އެއާލައިން ޓްރާންސްޕޯޓް ޕައިލެޓް ލައިސެންގެ އެއް ނަމްބަރު ލައިސަން ހޯއްދަވައި، ރާއްޖޭގެ ފުރަތަމަ ޕައިލެޓަކަށް ވެވަޑައިގެންނެވީ ކެޕްޓަން އިބުރޭކަން ޤާސިމް ފާހަގަކުރެއްވިއެވެ. ފާއިތުވީ 40 އަހަރުގެ ދިގު ކެރިއަރުގައި ކެޕްޓަން އިބުރޭ ރާއްޖޭގެ އެއާލައިންތަކާއި، ގައުމީ ދިފާއީ ބާރަށް ވެސް ޚިދުމަތްކުރެއްވިކަން ޤާސިމް ފާހަގަކުރެއްވިއެވެ.
ކެޕްޓަން އިބުރޭ ވަނީ އެއާ މޯލްޑިވްސްއާއި ގައުމީ ދިފާއީ ބާރުގެ އިތުރުން އައިލެންޑް އޭވިއޭޝަން ސާވިސަސްއަށް ޚިދުމަތްކުރައްވާފައެވެ. އެންމެފަހުން މަސައްކަތްކުރެއްވީ ވިލާ އެއާ އަށެވެ. ޤާސިމް އިތުރަށް ވިދާޅުވީ، ކެޕްޓަން އިބުރޭގެ އޭވިއޭޝަން ކެރިއަރަކީ އެފަދަ ދެވަނައެއްނެތް ލާމަސީލު މިސާލެއް ކަމަށާއި، ރާއްޖޭގައި ފުރަތަމަ އެއާލައިން ޕައިލެޓުގެ ހައިސިއްޔަތުން އޭނާ ވަނީ ޝައްކެއްވެސް ނެތްގޮތުގައި ވަރަށް ފުރިހަމަ ލެގަސީއެއް ދޫކުރައްވާފައި ކަމަށެވެ.
އަދި މުސްތަގްބަލުގައި ވެސް ކެޕްޓަން އިބުރޭއަށް އުފާވެރި، ފާގަތި ދުވަސްތަކެއް އެދިލައްވާކަމަށާއި، އިތުރު ކާމިޔާބީއާއި ކުރިއެރުމަށް އެދިލައްވާކަމަށް ޤާސިމް ވިދާޅުވިއެވެ.
އިބްރާހީމް ރަޝީދަށް ޕައިލެޓެއްގެ ގޮތުގައި ޚިދުމަތްކުރުމަށް ފުރަތަމަ ފުރުޞަތު ލިބުނީ ކުރީގެ ރައީސް އިބްރާހީމް ނާސިރުގެ ވެރިކަމުގައި އެމަނިކުފާނު ދެއްވި ފުރުޞަތެއްގެ ތެރެއިންނެވެ. އޭގެ ފަހުން ރައީސް މައުމޫންގެ ވެރިކަމުގައި އޭރުގެ ފޮރިން މިނިސްޓަރ ޖަމީލްގެ އެހީތެރިކަން ވަރަށް ބޮޑަށް ލިބިވަޑައިގެންނެވިކަމަށް އިބްރާހީމް ރަޝީދު ވިދާޅުވިއެވެ. އޭރު ރާއްޖޭގައި މިދާއިރާގައި ތިބީ މަދު ބައެއްކަމަށް އިބްރާހިމް ރަޝީދު ވިދާޅުވިއެވެ. އޭނާ ވިދާޅުވީ އެންމެ ފުރަތަމަ ރާއްޖޭގައި މަސައްކަތް ފެށިއިރު ބޯޓުފަހަރު ހުރީ ސިފައިންގޭގައި އެކަނިކަމަށެވެ. ދެން އެއާމޯލްޑިވްސްގައި 19 މީހުންގެ ސީޓުގެ ބޯޓެއް ގެންގުޅޭކަމަށް އޭރުގެ ހަނދަންތައް އައުކުރައްވަމުން އިބްރާހީމް ރަޝީދު ވިދާޅުވިއެވެ.
ކެޕްޓަން އިބްރާހީމް ރަޝީދު ރިޓަޔަރވުމުގެ ކުރިން ކުރެއްވި ފަހު ދަތުރު ކުރެއްވީ އެއާރލައިން ޓުރާންސްޕޯޓް ޕައިލެޓް ލައިސަންސް 001 ނަންބަރު އަތުގައި އޮވެމެއެވެ. ޤާނޫނުގައި ބަޔާންކުރާގޮތުގައި 65 އަހަރުވުމުން ޕައިލެޓަށް ޕަސިންޖަރުންނާއިއެކު ދަތުރު ނުކުރެވޭނެއެވެ.
