މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރުކަމަށް ޞަފާ ޝަފީޤު އައްޔަނުކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

ބްރޯޑްކޮމްގެ ހުސްވެފައިވާ މެންބަރުކަމުގެ މަޤާމަށް އައްޔަންކުރުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި ނަންތަކުގެ ތެރެއިން ކޮމިޓީން ދިރާސާކުރައްވާ ތަޅުމަށް ފޮނުއްވެވި ދެ ނަމަށްވެސް ވަނީ ވޯޓަށް އަހާފައެވެ. އެއީ ބަފާ ޝަފީޤާއި، ޝިހާމް މުޙައްމަދު ވަޙީދުގެ ނަމެވެ.

ބްރޯޑްކާސްޓިންގ ކޮމިޝަނުގެ ހުސްވެފައިވާ މެންބަރުކަމުގެ މަޤާމަށް ޞަފާ ޝަފީޤް އައްޔަންކުރައްވަން ފާސްވީ 40 މެންބަރުންގެ ވޯޓުންނެވެ. ޝިހާމް މުޙައްމަދު ވަހީދު އައްޔަންކުރެއްވުމަށް 7 މެމްބަރަކު ވޯޓު ދެއްވިއިރު، ނުފެންނަކަމަށް 31 މެމްބަރަކު ވަނީ ވޯޓު ދެއްވާފައެވެ. ބްރޯޑްކޮމަށް މެންބަރަކު ޢައްޔަންކުރެއްވުމަށް ރުހުން ހޯއްދެވުމަށް މަޖިލީހަށް ނަން ފޮނުއްވީ، ބްރޯޑްކޮމްގެ މެމްބަރުކަމުގެ މަޤާމުގައި ހުންނެވި އަމްޖަދު އިބްރާހީމްގެ މެންބަރުކަމުގެ މުއްދަތު މާރިޗް މަހުގެ 15 ގެ ނިޔަލަށް ހަމަވާތީއެވެ.

މީގެ އިތުރުން ބްރޯޑްކޮމްގެ މެންބަރެއްގެ ގޮތުގައި ހުންނެވި އަހުމަދު ގައިސް މިއަހަރުގެ ޖެނުއަރީ މަހު ވަނީ އިސްތިއުފާ ދެއްވާފައެވެ. ގައިސް އިސްތިއުފާ ދެއްވުމުން ބްރޯޑްކޮމްގެ މެންބަރު ކަމަށް ކުރިމަތިލުމަށް ހުޅުވާލުމުން ކުރިމަތިލެއްވި ބޭފުޅުންގެ ތެރެއިން ފަސް ނަމެއް ރައްޔިތުންގެ މަޖިލީހަށް ވަނީ ހުށަހަޅާފައެވެ.

ބްރޯޑްކޮމް އިން ގައިސް އިސްތިއުފާ ދެއްވުމުން މެންބަރުކަމަށް ކުރިމަތިލެއްވީ އާމިނަތު ނުޒުހާ، ރިވޯޑު، ހއ. ހޯރަފުށި، އާއި މަރިޔަމް ނަރީމާން ޝަރީފް، މުޝްތަރީގެ، ގދ. ތިނަދޫ އާއި މަރްޔަމް މުނާ، ބޯގަންވިލާ، ސ. ފޭދޫ އާއި ޝާން ސޯލިހް މުހައްމަދު، ފިނިވާދީގެ، ދ. ކުޑަހުވަދޫ އަދި ހުސެއިން އަމްރު، ވ. ރޯޝަންއެވެ.

7 މެންބަރުންގެ މައްޗަށް އެކުލެވޭ ބްރޯޑްކާސްޓިންގ ކޮމިޝަންގައި މިހާރު ތިއްބެވީ، އެކޮމިޝަންގެ ރައީސާ މަރްޔަމް ވަޙީދާއާއި، ނާއިބު ރައީސް މުޙައްމަދު ފަޒީންގެ އިތުރުން ކޮމިޝަންގެ މެންބަރުން ކަމަށްވާ އަމްޖަދު ވަހީދާއި، ޢަލީ ޔޫސުފާއި، އާމިނަތު އަމީނާއާއި، ޝިފްލާ އިބްރާހީމެވެ.