ސަރުކާރުގެ އެއްވެސް ބާރެއް ނުހިނގާ ގޮތަށް އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) މިނިވަން މުސްތަގިއްލު ކޮމިޝަނަކަށް ހެދުމަކީ ރާއްޖެ ފަދަ ގައުމަކަށް ރަނގަޅު ނިޒާމަކަށް ނުވާނެ ކަމަށް އެންވަޔަރަމަންޓް މިނިސްޓަރު އައިމިނަތު ޝައުނާ މިއަދު ވިދާޅުވެއްޖެއެވެ.
މަޖިލީހުގެ ޖަލްސާގައި އުނގޫފާރު ދާއިރާގެ މެމްބަރު މުހައްމަދު ވަނީ އީޕީއޭ މިނިވަން މުސްތަޤިއްލު ތަނަކަށް ހެދުމަށް ސަރުކާރުން ކުރެއްވި މަސައްކަތްތަކާއި އަދި ރައީސްގެ ވައުދާއި އެއްގޮތަށް 100 ދުވަހުގެ ތެރޭ އެކަން ކުރުމަށް ކުރުމަށް ކުރި މަސައްކަތާއި ގުޅޭގޮތުން ސުވާލު ކޮށްފައެވެ.
މިނިސްޓަރ ވިދާޅުވީ އީޕީއޭ މިމިނިވަން މުސްތަޤިއްލު ތަނަށް ހެދުމަށް އެންމެ ގަދަޔަށް ވަކާލާތު ކުރަމުންދިޔައީ 2015 ވަނައަހަރު އެންވާރުމަންޓް އެސެސްމަންޓް ހެދުމާއި، ފާކުރުމުގެ ބާރު ޓޫރިޒަމް މިނިސްޓްރީއަށް ބަދަލު ކުރުމުންކަމަށެވެ. ނަމަވެސް މިސަރުކާރުން ވެރިކަމަށް އައިސް ޤާނޫނަށް އިސްލާހު ގެނެސް އީޕީއޭގައި އޮތް އެބާރުވެރިކަން އަލުން އެޖެންސީއަށް ހޯދައި ދީފައިވާކަމަށެވެ.
މދުނިޔޭގެ ބޮޑެތި ގައުމުތަކާއި، ތިމާވެށީގެ ގޮތުން ނާޒުކު ޤައުމުތަކުގައި ތިމާވެށީގެން ކަންކަން ބެލެހެއްޓުމުގެ ބާރު އެޤައުމެއްގެ ސަރުކާރަކަށް ނޯންނަގޮތަށް ހަމަޖެހިފައި ނުވާކަމަށް މިނިސްޓަރ ވިދާޅުވިއެވެ. އެގޮތުން ިނގިރޭސިވިލާތާއި، ސިންގަޕޫރާއި، އެމެރިކާ ފަދަ ޤައުމުތަކުގައިވެސް ތިމާވެށީގެން ކަންކަން ރެގިއުލޭޓް ކުރުމުގެ ބާރު ސަރުކާރާއި ވަކިކުރެވިފައި ނުވާކަމަށެވެ. އެހެންކަމުން ރާއްޖެފަދަ ތިމާފެށީގެން ގޮތުން ނާޒުކު ވެއްޓެއް އޮތް ޤައުމެއްގައި ސަރުކާރުގެ ބާރުވެރިކަން ނުހިނގާ ގޮތަކަށް ދޫކޮށްލުމަކީ އޭގެ ގެއްލުން ރައްޔިތުންނަށްވެސް ކުރާނެ ކަމެއްކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސަރުކާރުން ކަނޑައެޅި ސިޔާސަތާއި އެއްގޮތަށް މިހާރު އީޕީއޭ ހިނގަމުންދަނީ މިނިވަންކަމާއި މުސްތަޤިއްލު ކަމާއިއެކުގައި ކަމަށެވެ. މިހާރު އީޕީއޭގެ މައްޗަށް ސިޔާސީ ނުފޫޒު ފޯރުވައި، އެތަނުގައި މަސައްކަތް ކުރައްވާ މުވައްޒިފުންގެ ނަޒާހާތްތެރިކަމާއިމެދުވެސް ފުރިހަމަ އިތުބާރު އެބައޮތްކަމަށެވެ.
މެނިފެސްޓޯގައި އޮތްގޮތަށް 100 ދުވަހުގެ ވައުދާއި އެއްގޮތަށް އީޕީއޭ ބާރުވެރިކޮށް މިނިވަން ކަމާއިއެކު ހިންގޭގެ ގޮތް ވާނީ ހަދާދީފަ. އެއްވެސް ސިޔާސީ އަދި ސިޔާސީ ނޫންވެސް ނުފޫޒެއް އީޕީއޭގެ މައްޗަށް މިހާރަކު ނުހިނގާ. އެތަނުގެ މިހާރު ތިބި މުވައްޒިފުންގެ އިންޓަރގްރިޓީއާއިމެދުވެސް އަޅުގަނޑުމެން ކޮންފިޑެންސް އެބައޮތް.
– މިނިސްޓަރ ވިދާޅުވިއެވެ.
ޝައުނާގެ އެ ޖަވާބާ މެދު ހިތްހަމަޖެހިވަޑައިނުގެން ބައެއް މެންބަރުން ވަނީ ތަކުރާރުކޮށް އަލުން އެ ސުވާލު ކޮށްފަ އެވެ. އީޕީއޭ މިނިވަން މުސްތަގިއްލު ކޮމިޝަނަކަށް ހެދުމަށް ސަރުކާރުން ވައުދުވެފައިވާ ކަމަށާއި އެކަން ވާނެތޯ ނުވަތަ ނުވާނެތޯ މެންބަރުން ސުވާލު ކުރިއެވެ.
މިނިސްޓަރ ވިދާޅުވީ ރާއްޖޭގެ ނާޒުކު ތިމާވެށި ހިމާޔަތްކޮށް ޒިންމާދާރު މަސައްކަތްތަކެއް ކުރުމަށް މިއަދު ފެށާފައިވާ މަސައްކަތްތަކުން ހެޔޮ ނަތީޖާތަކެއް ލިބެމުންދާކަމަށެވެ. އަދި އީޕީއޭއާއި ސަރުކާރުންވެސް މަސައްކަތް ކުރަމުންދަނީ ވެށީގެ ރައްކާތެރިކަން ކަށަވަރު ކުރުމަށްކަމަށާއި، އެކަން މިސަރުކާރުން ކަށަވަރު ކުރައްވާނެކަމަށެވެ.
