ޕްލާސްޓިކް ކޮތަޅަކުން 2 ރުފިޔާގެ ފީއެއް ނަގަން ފެށުމާއެކު ރާއްޖޭގައި ކޮތަޅުގެ އަގު ވަރަށް ބޮޑަށް އުފުލިގެން ގޮސް، އަދި މިމައްސަލާގައި ގިނަބައެއްގެ ފާޑު ކިއުން އަމާޒުވެގެން ދިއުމާއެކު، ސަރުކާރުން މިމައްސަލަ ހައްލުކުރުމަށް، ކުނި މެނޭޖްކުރުމުގެ ގާނޫނަށް ގެންނަ އިސްލާހުގައި، 50 ކޮތަޅަށްވުރެ ގިނައިން ހިމެނޭ ބޮޑިތަކުން ފީ ނުނަގާގޮތަށް އިސްލާހު ހުށަހަޅުއްވައިފިއެވެ.
ކޮތަޅުން ފީނަގަން ފެށުމާއެކު ކޮތަޅުގެ އަގުބޮޑުވެފައިވާ މައްސަލަ ހައްލުކުރުމަށް މިއަދުޖެ މަޖިލިސް ޖަލްސާއަށް އެޖެންޑާ ކޮށްފައިވަނީ ސަރުކާރުގެ ފަރާތުން، ކޮމަންޑޫ ދާއިރާގެ މެންބަރު މުޙައްމަދު ރާޝިދު ހުށަހަޅުއްވާފައިވާ، ޤާ ނޫނު ނަންބަރު 2022/24 (ކުނި މެނޭޖުކުރުމުގެ ޤާނޫނު) އަށް އިޞްލާޙު ގެނައުމުގެ ބިލުގެ އިބުތިދާއީ ބަހުސް ފެށުމަށެވެ.
މި އިސްލާހުގައި ވާގޮތުން ގާނޫނުގެ 32 ވަނަ މާއްދާގެ (ހ)ގެ (3) ނަމްބަރުގެ ފަހަތަށް އިތުރުކުރާ ނަމްބަރުގައިވަނީ ތިރީގައި މިވާ ގޮތަށެވެ.
32. (ށ) (4) 50 ނުވަތަ އެއަށްވުރެ ގިނަ އަދަދެއްގެ ޕްލާސްޓިކް ކޮތަޅު ހިމެނޭ ބޮނޑިތައް.
މިފަދައިންނެވެ.
މި އިސްލާހުގައި ވާގޮތުން ކަސްޓަމަރުން ވަކިން ގަންނަ ކޮތަޅުތަކުން އަދިވެސް 2 ރުފިޔާގެ ފީއެއް ނަގަންޖެހޭނެއެވެ. އެހެންކަމުން ކޮތަޅުތައް އަގު ހެޔޮކޮށް ގަންނަ ކަމަށްވާނަަ ކަސްޓަމަރުން ޖެހޭނީ 50 އަށްވުރެ ގިނައިން ހުންނަ ކޮތަޅު ބޮނޑިތައް ޕޮއިންޓް އޮފް ސޭލްސް ނުވަތަ ފިހާރަތަކުން ގަންނާށެވެ.
ކުނީގެ ގާނޫނަށް އިސްލާހު ގެނައުމަށް ސަރުކާރުން ހުށަހަޅާފައިވާއިރު، ރައްޔިތުންގެ މަޖިލިހުގެ ރައީސް މުހައްމަދު ނަޝީދުވަނީ ކޮތަޅުން ނަގާ ފީ ކުޑަކުރުމަށް ދެކޮޅު ހައްދަވާފައެވެ.
ފިހާރަތަކުން ވިއްކާ ކޮތަޅުތަކުން ފީނެގުން ލާޒިމްވާގޮތަށް މަޖިލިހުން ފާސްކުރިން ކުނި މެނޭޖް ކުރުމާބެހޭ ގާނޫނު ރައީސް ސާލިހު ތަސްދީގު ކުރެއްވީ 2022 ވަނަ އަހަރުގެ ޑިސެމްބަރުމަހުގެ 18ވަނަ ދުވަހުއެވެ.
