އިދިކޮޅު އެންމެ ބޮޑު ޕާޓީން ކުރިއަށް އޮތް ރިޔާސީ އިންތިޚާބުގައި ވާދަކުރާނެ ކެނޑިޑޭޓަކީ ރައީސް ޔާމީންކަމަށް ކަނޑައަޅާފައިވާއިރު، އެމަނިކުފާނަށް އިންތިކާބުގައި ވާދަކުރުމާއިމެދު އުފެދިފައިވާ ސުވާލަށް އަވަސް ޖަވާބެއް އިލެކްޝަން ކޮމިޝަނުން ދޭންޖެހޭކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ވ. އާރަށުގެ ޚިޔާނާތުގެ މައްސަލަ ސާބިތުވެ ރައީސް ޔާމީން މިހާރު ހުންނެވީ 11 އަހަރުގެ ޖަލު ހުކުމެއްގައެވެ. އެހެންވެ އަންނަ ސެޕްޓެމްބަރު މަހު ބާއްވާ އިންތިހާބުގައި ވާދަކުރެވިދާނެ ކަމާ މެދު ވަނީ ސުވާލު އުފެދިފައެވެ. އެއީ ރައީސް ޔާމިންގެ ޖަލު ހުކުމް އިސްތިއުނާފްގެ މައްސަލަ އިންތިހާބުގެ ކުރިން ބަލައި ނިމޭނެކަމަށް ނުބެލެވޭތީއެވެ. އެކަމަކު ޕީޕީއެމްގެ އިސް ބޭފުޅުން ވިދާޅުވަމުން ދަނީ އިންތިހާބުގެ ކުރިން ރައީސް ޔާމިން މިނިވަން ވާނެ ކަމަށެވެ.
މިކަމާއިމެދު ކަންބޮޑުވުން ފާޅުކޮށް އެމްޑީޕީގެ މެމްބަރު ޝަރީފް ވިދާޅުވީ ޕީޕީއެމް އަކީ ރާއްޖޭގެ އެންމެ ބޮޑު އިދިކޮޅު ޕާޓީކަމަށެވެ. އެޕާޓީން ރިޔާސީ އިންތިޚާބުގައި ވާދަކުރައްވާ ކެނޑިޑޭޓަކީ ރައީސް ޔާމީންކަމަށް ކަނޑައަޅާފައިވާއިރު، އެމަނިކުފާނަށް އިއްވާފަިއވާ ޖަލު ހުކުމުގެ ސަބަބުން އިންތިޚާބުގައި ވާދަކުރުމުގެ ފުރުސަތު ހަނިވާކަމަށެވެ. ނަމަވެސް އެހުކުމް އިސްތިއުނާފު ކޮށްފައި ވުމުން، މިހާލަތުގައި އިލެކްޝަނުން ވަކި ގޮތެއް ޔާމީންގެ ކެނޑިޑޭސީއާއިމެދު ނިންމަންޖެހޭކަމަށް ޝަރީފް ވިދާޅުވިއެވެ.
އިދިކޮޅު އެންމެ ބޮޑު ޕާޓީގެ ރިޔާސީ ކެނޑިޑޭޓް ޖަލު ހުކުމެއް ތަންފީޒު ކުރަމުންދާއިރު، އެމަނިކުފާނު ވަނީ އެހުކުމް އިސްތިއުނާފް ކޮށްފަ. އިސްތިއުނާފުން ނިހާއީ ހުކުމަކާއި ހަމަޔަށް އަދި ނުދޭ. މިހާލަތުގައި ކެނޑިޑޭސީއާއިމެދު އަވަހަށް އިލެކްޝަނުން ގޮތެއް ނިންމުން މުހިންމު.
– ޝަރީފް ވިދާޅުވިއެވެ.
އިލެކްޝަން ކޮމިޝަންގެ ރައީސްވެސް މީގެ ކުރިން ޔާމީނަށް ކުރިމަތި ލުމުގެ ފުރުސަތު އޮތްކަމަށް ވިދާޅުވެފައިވާއިރު، ޕީޕީއެމްއާއި އެޕާޓީގެ އާންމު އެތައް މެމްބަރުންގެ ހައްގުގައި މިކަމާއިމެދު އަވަސް ނިންމުމެއް ނިންމުމަކީ މުހިންމު ކަމެއްކަމަށް ޝަރީފް ވިދާޅުވިއެވެ.
ޕީޕީއެމްއަށްވެސް ކުރިޔަށް ދެވޭނީ ރައީސް ޔާމީންގެ ކެނޑިޑޭސީއައި ދޭތެރޭ ގޮތެއް ނިންމައިގެން. އިލެކްޝަން ކޮމިޝަންގެ ރައީސް ފުއާދު ތައުފީގް އެބަ ވިދާޅުވޭ ލެވިވެސް ދާނެއޭ. އިލެކްޝަނުން ކަނޑައަޅަންވީ ވަކި ޑެފިނިޓިވް ގޮތެއް. މިއީ އަވަހަށް ގޮތެއް ކަނޑައަޅަން ޖެހޭ މުހިންމު މައްސަލައެއް.
– ޝަރީފް ވިދާޅުވިއެވެ.
ޕީޕީއެމްއިން ވަނީ ހަރޯދައަށްފަހު ރާއްޖޭގެ ހުރިހާ ރަށެއްގައި ރައީސް ޔާމީންގެ ކެމްޕެއިން ހަރަކާތްތައް ފެށުމަށް ނިންމާފައެވެ. އަދި އެޕާޓީގެ ލީޑަރޝިޕުން އޮތީ ރައީސް ޔާމީނަށް އިންތިޚާބު ކާމިޔާބު ކޮށްދިނުމަށް ތައްޔާރަށް ވަނީ ބުނެފައެވެ.
