ރައްޔިތުންގެ މަޖިލީހުގެ އެމްޑީޕީގެ ދެމެމްބަރުން ކަމަށްވާއި، ހެންވޭރު ދެކުނު ދާއިރާގެ މެމްބަރު ހުސެއިން ޝަހީމްއާއި މިނިވަން މުވައްސަސާ ކޮމެޓީގެ މުގައްރިރު އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ރައީސް މުހައްމަދު ނަޝީދުގެ ސެކިއުރިޓީއާއި ގުޅޭގޮތުން ދައްކަވަމުންދާ ވާހަތަކުން ނަޝީދަށް އިތުރު ހަމަލާއެއް އައުމުގެ ބިރު އޮތުމުން އެމެމްބަރުންގެ މައްސަ ބެލުމަށް ފުލުހަށް ހުށަހަޅައިފިއެވެ.
މަޖިލީހުގެ ރައީސް މުހައްމަދު ނަޝީދަށް ދައުލަތުން ސަލަމާތާއި ރައްކާތެރިކަން ދޭންޖެހިފައިވުމުން އެކަމާއި ދެކޮޅަށް އަދި އެކަން ހުއްޓުވުމަށް ބާރުއަޅައި ސަރުކާރާއި ގުޅުން އޮންނަ ނުފޫޒުގަދަ މަޤާމުތަކުގައި ތިއްބެވި ބައެއް ފަރާތްތަކުން ފަހަކަށް އައިސް ތަކުރާރުކޮށް ވާހަކަފުޅު ދައްކަވަމުން ގެންދަވާކަން ފާހަގަކުރެވޭއިރު، އެކަމުގައި އިންތިހާއަށް ކަންބޮޑުވާ ކަންތައްތަކެއް އެކުލެވޭތީ މިކަން ފުލުހުންގެ ސަމާލުކަމަށް ގެނައުމަށް ހުށަހަޅުއްވީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ.
އިންތިގެ ސިޓީގައި ވިދާޅުވީ ރައީސް ނަޝީދަކީ ބޮމުގެ ޓެރަރިސްޓް ހަމަލާއެއްގެ ޝިކާރައެއް ކަމަށެވެ. އެމަނިކުފާނަށް އެމައްސަލާގައި އަދި އިންސާފު ލިބިފައި ނުވާކަމަށެވެ. އެކަން މޮނިޓާ ކުރުމަށް ރައީސުލްޖުމްހޫރިއްޔާ ކަނޑައަޅުއްވާފައިވާ ޚާއްސަ މަންދޫބު އައްބާސް ފާއިޒުވެސް ވަނީ އެމައްސަލާގައި އިންސާފަށް ވާސިލް ނުވާތީ ވަރަށްބޮޑަށް ކަންބޮޑުވުން ފާޅު ކުރައްވާފައިކަމަށެވެ. އެނުރައްކާރި ހަމަލާ ރައްދުކޮށްފައިވަނީ ރައީސް ނަޝީދުގެ ހަށިކޮޅަށް ނުރައްކާ އޮތް މިންވަރަށް ކްރިޓިކަލް ލެވެލްގައި ވަނިކޮށް އެހަމަލާއިން ރައްކާތެރިކަން ފޯރުކޮށްދެވުމުންކަން އިންކުއަރީ ރިޕޯޓުން އެނގޭކަމަށެވެ.
މިހަމަލާއަށް ފަހުވެސް އަދި ސަލާމަތާއި ރައްކާތެރިކަން ފޯރުކޮށް ދިނުން ލާޒިމްކޮށްފައިވާއިރުވެސް، ސަރުކާރާ ގާތް ގުޅުން އޮންނަ މަޖިލީހުގެ 241 ކޮމެޓީ ނައިބް މުގައްރިރު، ހެންވޭރު ދެކުނު ދާއިރާގެ މެމްބަރު ހުސެއިން ޝަހީމްއާއި މިނިވަން މުވައްސަސާ ކޮމެޓީގެ މުގައްރިރު އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ފަދަ ނުފޫޒުގަދަ މަޤާމުތަކުގައި ތިއްބެވި ބައެއް ބޭފުޅުން ރައީސް މުހައްމަދު ނަޝީދަށް ސަލާމަތާއި ރައްކާތެރިކަން ފޯރުކޮށް ދިނުމަށް ދެކޮޅު ހައްދަވައި، އަދި އެކަން ހުއްޓުވުމަށް ބާރު އަޅުއްވައި މޭރުމުން އެކި ފޯރަމްތަކުގައި ތަކުރާރުކޮށް ވާހަކަފުޅު ދައްކަވަމުން ގެންދަވާކަމީ އެކަމުގައި ނުބައި ރޭވުމެއް އޮތްކަމެއް ކަމަށް ތުހުމަތު ކުރެވޭކަމަށެވެ.
ސަރުކާރާއި ގާތްގުޅުން އޮންނަ ނުފޫޒު ގަދަ މަޤާމުތަކުގައި ތިއްބެވި މިދެބޭފުޅުން ރައީސް ނަޝީދާއިމެދު މަތީ ދަރަޖައެއްގެ ރުޅިވެރިކަމާއި ނަފްރަތު އޮންނަކަން އެނގޭގޮތަށް ބަސްތައް ރައްދުކުރައްވަމުން ގެންދަވާ ބޭފުޅުންކަމަށްވުމާއި، އެބޭފުޅުން ހަމައެކަނި ރައީސް ނަޝީދަށް ޓާގެޓްކޮށް، ތްރެޓްގެ މިންވަރު އެންމެ މަތީގައިވާ ބޭފުޅަކަށް ޤާނޫނީ ގޮތުން ލާޒިމްކުރާ ސެކިއުރިޓީ ފޯރުކޮށް ދިނުމާއިމެދު ފާޑުވިދާޅުވެ އެކަމަށް ދެކޮޅު ހެއްދެވައި ތަކުރާރުކޮށް ވާހަކަދައްކަންޖެހޭ އިތުރު ސަބަބެއް އޮންނާނެކަމަށް ނުދެކޭކަމަށެވެ.
އެހެންކަމުން މިއީީ ރައީސް ނަޝީދުގެ ހަށިކޮޅަށް އިތުރު ހަމަލާއެއް ދިނުމަށް ފަހިކުރުމުގެ ނުބައިި ނިޔަތެއްގައި ހީލަތްތެރި ކަމާއިއެކު ދުރާލައި ރާވަމުންދާ ރޭވުމެއް ނުވަތަ ޓެރަރިޒަމުގެ ކުށެއްގެ އަމަލު ހިންގުމަށް ތައްޔާރުވުމުގެ އަމަލެއްކަމަށް ބެލުމުގެ ޖާގަ އޮތްކަމަކަށްވާތީ، މިކަން ބަލައި، ޖިނާއީ އަމަލެއް އެކުލެވޭނަމަ، އަވަސް ފިޔަވަޅު އަޅައި ދިނުމަށް އިންތިގެ ސިޓީއާއި ވަނީ އެދިވަޑައިގެންފައެވެ.
މަޖިލީހުގެ މިދިޔަ ހަފްތާގެ ޖަލްސާތަކުގައި މެމްބަރު ހުސެއިން ޝަހީމްއާއި، ރޮޒޭނާ ވަނީ ރައީސް ނަޝީދަށް ދައުލަތުން ބޮޑު ހޭދައެއްކޮށްގެން ޚަރަދުކުރާތީ ކަންބޮޑުވުން ފާޅުކޮށްފައެވެ.
