ކުޑަގިރި ޕިކްނިކް އައިލެންޑުގައި ފިޠުރު ޢީދުގައި ޚާއްޞަ ހަރަކާތްތަކެއް ކުރިއަށްގެންދިއުމަށް ނިންމާފައިވާކަމަށް އަރބަންކޯއިން ހާމަކޮށްފިއެވެ.
އާރބަންކޯއިން މަޢުލޫމާތުދޭ ގޮތުގައި "ކުޑަގިރި ޢީދު ފެސްޓު"ގެ ނަމުގައި ކުރިއަގެންދާ މި ހަރަކާތްތަކުގައި ހުރިހާ ޢުމުރެއްގެ މީހުންނަށްވެސް ބައިވެރިވެވޭ ގޮތަށް އީދު ދުވަހުގެ ހެނދުނުން ފެށިގެން ރޭގަނޑާއި ހަމައަށް ތަފާތު އެކި ޙަރަކާތްތައް ހިންގުމަށް ވަނީ ހަމަޖެހިފައެވެ.
އޭގެތެރޭގައި ކުލަ ޖެހުމާއި، ކްރޮސްނެޓް ވޮލީބޯޅަ އާއި، ކުޑަކުދިންގެ ކައިޓް ސެޝަނެއް ކުރިއަށްދާނެއެވެ. އަދި ރޮބޯމޭންގެ ޙަރަކާތްތަކާއި، ބޮޑުމަސް، ކޯޑި ކެނޑުން، އަދި މާލި ޙަރަކާތްތަކާއި، ބޮޑުބެރު، ދަފިނެގުން، ދަނޑިޖެހުމާއި މާފަތި އަދި ބަނޑިޔާ ހަރަކާތްތައްވެސް ހިމެނެއެވެ.
ބިދަބިން ބޮޑުބެރު ގްރޫޕުގެ ހުނަރުވެރިކަން ފެނިގެންދާ މި ޙަރަކާތްތަކުގައި ބައިވެރިވުމަށް އެ ދުވަހުގެ ހެދުނު 8:30 އިން ފެށިގެން އިރުއޮއްސި 7:30 އާ ހަމައަށް ކުޑަގިރިއަށް ހިލޭ އަރާ ފޭބޭނެކަމަށް އާރބަންކޯއިން ހާމަކޮށްފައިވެއެވެ. އަދި މި ގަޑިތަކުގައި ކުޑަގިރީގައި އުޅޭ މީހުންނަށް ޚާއްޞަކޮށް ސްނެކްސް ލިބޭނެ ގޮތަށް ސްޓޯލްތައް ވެސް ބެހެއްޓުމަށް ވަނީ ހަމަޖެހިފައެވެ.
ހެނދުނާއި ހަވީރުގެ ކުޅިވަރު ޙަރަކާތްތަކަށްފަހު ކުޑަގިރި ޢީދު ފެސްޓު ނިންމާލަން ހަމަޖެހިފައި ވަނީ ގާލާ ނައިޓަކުން ކަމަށާއި މި ގާލާގައި ބައިވެރިވުމަށް ކޮންމެ މީހަކު ވެސް 150 ރުފިޔާ ދައްކަން ޖެހޭނެކަމަށް އާރބަންކޯއިން މަޢުލޫމާތުދެއެވެ.
މީގެތެރޭގައި ޢީދު ސްޕެޝަލް ގާލާ ޑިނާއެއްގެ އިތުރުން ޑި ޓިއުން ބޭންޑާއި، ބިދަބިން ބޮޑުބެރު ގްރޫޕް ޙަރަކާތްތަކާއި، ލޯކަލް އަދި އިންޓަނޭޝަނަލް އާޓިސްޓުންގެ އެކި ޙަރަކާތްތައް ހިމެނިގެންދާނެކަމަށް އެކޯރޕަރޭޝަނުން ވިދާޅުވިއެވެ.
