ގިނަ އަދަދެއްގެ މުވައްޒަފުން ތިބީ ހަމައެކަނި މިނިސްޓްރީއަކު ނޫން ކަމަށާއި އެ މުވައްޒަފުން ތިބީ ފަންނާއި ސަގާފަތާއި ތަރިކައިގެ ދާއިރާގައި ކަމަށް އާޓްސް ކަލްޗާ އެންޑް ހެރިޓޭޖް މިނިސްޓްރީން ބުނެފިއެވެ.
މިނިސްޓްރީން މިހެން ބުނެފައި ވަނީ އެ މިނިސްޓްރީގައި 31 ސިޔާސީ މުވައްޒަފުން ތިބޭކަމަށް ބުނެ ނޫހަކުން ލިޔުމެއް ޝާއިއުކުރުމާއި ގުޅިގެނެވެ.
ހެރިޓޭޖް މިނިސްޓްރީ އިން ބުނީ 31 ސިޔާސީ މުވައްޒަފުން ތިބީ ހަމައެކަނި މިނިސްޓްރީ އަކު ނޫން ކަމަށާއި އެ މުވައްޒަފުން ތިބީ ފަންނާއި ސަގާފަތާއި ތަރިކައިގެ ދާއިރާގައި ކަމަށެވެ. އެގޮތުން އެ ދާއިރާގައި މިނިސްޓްރީގެ އިތުރުން 6 އިދާރާއެއް ހިމެނޭ ކަމަށް މިނިސްޓްރީން ވަނީ ބުނެފައެވެ.
އޭގެ ތެރޭގައި ދިވެހިބަހުގެ އެކެޑަމީ، ޤައުމީ އަރުޝީފު، ނޭޝަނަލް ސެންޓަރ ފޯ ދި އާޓްސް، ސަގާފީ ތަރިކަ ރައްކާތެރިކުރާ ޤައުމީ މަރުކަޒު، ޤައުމީ ކުތުބުޚާނާ، ނޭޝަނަލް ބިއުރޯ އޮފް ކްލެސިފިކޭޝަން ހިމެނެއެވެ. އަދި އެ ތަންތަނުގެ ދަށުން 6 ތަނެއް ހިންގާ ތަންތަނުގެ ތެރޭގައި ޤައުމީ ދާރުލްއާސާރު، – ހުވަދޫ ރީޖަނަލް މިއުޒިއަމް، ބޮޑުތަކުރުފާނުގެ ހަނދާނީ މަރުކަޒު، ޗިލްރަންސް މަލްޓިމީޑިއާ ލައިބްރަރީ، އޮލިމްޕަސް އަދި ނޭޝަނަލް އާޓް ގެލެރީ ހިމެނޭ ކަމަށް ހެރިޓޭޖް މިނިސްޓްރީން ވަނީ ބުނެފައެވެ.
31 ސިޔާސީ މުވައްޒަފުން މަސައްކަތް ކުރަނީ މި 13 ތަނުގައި، ރައްޖޭގެ އެކި ހިސާބުތަކުގައި ކަމަށް ވެސް މިނިސްޓްރީން ބުނެފައިވެއެވެ. އަދި ދާއިރާގެ އެކި މަސައްކަތްތަކުގައި ސިޔާސީ މަޤާމުތަކުގައި ތިބީ ޢަމަލީގޮތުން މަސައްކަތުގައި އިސްކޮށް އުޅޭ އެ ދާއިރާތަކުގެ ތަޢުލީމާއި ތަޖުރިބާ ލިބިފައިވާ ފަރާތްތައް ކަމަށް ވެސް މިނިސްޓްރީން ވަނީ ބުނެފައެވެ.
