މާދަމާ ބޭއްވުމަށް ހަމަޖެހިފައިވާ ގުރައިދޫ ދާއިރާގެ ބައި އިލެކްޝަންގެ ގޮނޑި އެމްޑީޕީއަށް ކާމިޔާބު ވިޔަނުދޭން، އެޕާޓީގެ ރައީސް މުހައްމަދު ނަޝީދުގެ ފެކްޝަނުން މަސައްކަތް ކުރަމުންދާކަމުގެ ތުހުމަތު އެމްޑީޕީގެ ޗެއަރޕާސަން ކުރައްވައިފިއެވެ.

މާދަމާ ބޭއްވުމަށް ހަމަޖެހިފައިވާ ގުރައިދޫ ދާއިރާގެ ބައި އިލެކްޝަން ކެމްޕޭން މިއަދު ނިމި މާދަމާގެ ވޯޓަށް އިންތިޒާރު ކުރަމުންދަނިކޮށް އެމްޑީޕީގެ ގައުމީ މަޖިލިހުގެ ވަޓްސްއަޕް ގުރޫޕަށް ފައްޔާޒު ކުރެއްވި މެސެޖެއްގައި ވިދާޅުވެފައިވަނީ، ގުރައިދޫ ދާއިރާގެ ގޮނޑި އެޕާޓީއަށް ކާމިޔާބުވިޔަ ނުދޭން، ގުރައިދޫ ދާއިރާގެ އެމްޑީޕީގެ މެމްބަރުންނަށް ގުޅާ ޕާޓީގެ އެތެރެއިން ކުރަމުންދާ މަސައްކަތްތައް ހަރުކަށި އިބާރާތުން ކުށްވެރި ކުރާ ކަމުގައެވެ.

ރިޔާސީ ޓިކެޓާއި ގުޅިގެން އުފެދިފައިވާ ތުންފިއްތުން މިހާރު މުޅިން އެހެން ހިސާބަކަށް ގޮސް، ގަސްތުގައި ޕާޓީ ފުނޑާލުމަށް ކުރާ މަސައްކަތް އިރާދަ ކުރެއްވިއްޔާ ކާމިޔާބު ވިޔަ ނުދޭނަނަ. އިޙުތިރާމް ކުރުމުގެ ގޮތުން ބެލޭނީ ވަކި ވަރަކަށް.

ނަޝީދަށް އިހުތިރާމް ކުރުމުގެ ގޮތުން މިހާތަނަށް ގިނަ ކަންކަން ތަހައްމަލް ކުރިނަމަވެސް، ދެން އެއުސޫލުން ނަޝީދުއާއިމެދު އަމަލު ނުކުރައްވާނެކަމަށް މޭރުން ކުރައްވަމުން ފައްޔާޒުގެ މެސެޖުގައި ލިޔުއްވާފައި ވެއެވެ.

އެމްޑީޕީގެ ރައީސް ނަޝީދުގެ ފެކްޝަންގައި އިސްކޮށް ތިއްބެވި ފަރާތްތަކުން ގުރައިދޫ ދާއިރާގެ ގޮނޑި ޕާޓީއަށް ކާމިޔާބުވިޔަ ނުދޭން މަސައްކަތް ކުރަމުންދާކަމުގެ ތުހުމަތު ފައްޔާޒު ކުރައްވާފައިވާއިރު، ރިޔާސީ އިންތިޚާބުގެ އެޕާޓީގެ ޓިކެޓް ރައީސް ސާލިހު ކާމިޔާބު ކުރެއްވި ހިސާބުން ނަޝީދަށް ތާއީދުކުރާ ފަރާތްތަކުން ދަނީ ރައީސް ސާލިހަށް ރިޔާސީ އިންތިޚާބު ކާމިޔާބުވިޔަ ނުދޭން މަސައްކަތް ކުރަމުންނެވެ.

އަދި ނަޝީދު މިހާރުވަނީ ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީއާއެކު ކޯލިޝަން ހެދުމަށް ނިންމާފައެވެ.

މާދަމާ ބޭއްވުމަށް ހަމެޖެހިފައިވާ ގުރައިދޫ ދާއިރާގެ ބައި އިލެކްޝަންގެ ކެމްޕޭން މިއަދުގެ 6:00 އާއި ހަމައަށް އިންތިޚާބުގައި ވާދަކުރާ 3 ޕާޓީންވެސް ނިންމާލާފައިވާއިރު، އިދިކޮޅު ޕީޕީއެމްއާއި އެމްއެންޕީންވަނީ ކެމްޕޭން ނިންމާލުމުގެ ގޮތުން ޚާއްސަ ހިނގާލުމެއް ބާއްވާފައެވެ. އެހެނެންނަމަވެސް ކެމްޕޭން ނިންމާލުމުގެ ގޮތުން އެމްޑީޕީން ހިނގާލުމެއް ބާއްވާފައި ނުވާކަން ފާހަގަ ކޮށްލެވެއެވެ.

ގުރއިދޫ ދާއިރާގެ ގޮނޑިއަށް ކުރިމަތިލުމަށް ހުޅުވާލި މުއްދަތުގައި ކުރިމަތިލާފައިވަނީ 3 ޕާޓީއަކުންނެވެ. އެއީ އިދިކޮޅު ޕީޕީއެމްއާއި، ވެރިކަންކުރާ މައި ޕާޓީ އެމްޑީޕީގެ އިތުރުން އެމްއެންޕީންނެވެ. ޕީޕީއެމުން ކުރިމަތިލީ، އަވަހާރަވި މެންބަރު އިބްރާހީމް ރިޒާގެ ކޮއްކޮ، ޙުސައިން ރިޒާއެވެ. އެމްޑީޕީން ވާދަކުރަނީ އެ ޕާޓީގެ ޕްރައިމަރީ ކާމިޔާބުކުރި އިބްރާޙިމް ޝާޒްއެވެ. އަދި މޯލްޑިވްސް ނެޝަނަލް ޕާޓީގެ ޓިކެޓް ދީފައިވަނީ އަލީ ޢާރިފަށެވެ.