ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީއާއިއެކީ ކޯލިޝަން ހެދުމަށް ނަޝީދު ހުށަހަޅުއްވާ ޝަރުތަކީ ވެރިކަމުގެ ނިޒާމު ބަދަލުކުރުންކަން ހާމަ ވެއްޖެއެވެ.

މިކަން ހާމަވީ، ނަޝީދުގެ ފިކުރެއްގެ ދިރުން ސިޔާސީ ހަރަކާތާއި ޖުމުހޫރީ ޕާޓީއާއި ދެމެދު މިހާރު ކުރިޔަށްދާ މަޝްވަރާތަކަށް ނަޝީދުގެ ފަރާތުން ހުށެހެޅުއްވި، މިހާރު ލީކުވެފައިވާ ކަރުދާހުގައި، ދެފަރާތުން އެއްބަސްވުމަށް ނަޝީދު ހުށަހަޅުއްވާފައި ޝަރުތުތަކުންނެވެ. މި ކަރުދާހުގެ ކޮޕީއެއް ޚަބަރު އޮންލައިނަށް ވަނީ ލިބިފައެވެ.

މި ކަރުދާހުގައި ނަޝީދު ހުށަހަޅުއްވާފައިވާ ޝަރުތުތަކުން އެނގޭ ގޮތުގައި، ޖޭޕީއާއި ފިކުރެއްގެ ދިރުމުން އެކުލަވާލާ ކޯލިޝަނަށް ކުރިޔަށް އޮތް ރިޔާސީ އިންތިޚާބު ކާމިޔާބު ކުރެވިއްޖެނަމަ، ގާސިމް އިބުރާހިމް ރައީސްކަމުގެ ހުވާ ކުރެއްވުމުގެ ކުރިން، ވެރިކަމުގެ ނިޒާމު ބަދަލުކުރަން ފެނޭތޯ ބެލުމަށް، ރައްޔިތުންގެ ފެންނަ ނުފެންނަ ވޯޓަކަށް ދާން ޖެހެއެވެ.

ދިވެހި ދައުލަތުގެ ސިފަތަކަށް ގެންނާން ޖެހޭ ބަދަލުތައް،" މިނަމުގައި މަޝަވްރާތަކަށް ނަޝީދުގެ ފަރާތުން ހުށަހަޅުއްވާފައިވާ ކަރުދާހުގައި ވާގޮތުން ރިޔާސީ އިންތިޚާބު ކާމިޔާބު ކުރެވި، ނޮވެމްބަރު 17 ވަނަ ދުވަހު ގާސިމް އިބުރާހިމް ރައީސްކަމުގެ ހުވާ ކުރެއްވުމުގެ ކުރިން ގާނޫނު އަސާސީއަށްވެސް ބަދަލު ގެންނަން ޖެހެއެވެ.

އަދި ގަނޫނު އަސާސީއަށް ގެންނަ މި ބަދަލުތަކާއެކު، 2024ވަނަ އަހަރުގެ ރައްޔިތުންގެ މަޖިލިސް އިންތިޚާބު ބޭއްވުމަށް ނަޝީދު ހުށަހަޅުއްވައެވެ.

ނަޝީދުގެ ފިކުރެއްގެ ދިރުން ސިޔާސީ ހަރަކާތުން މަޝްވަރާއަށް ހުށަހަޅާފައިވާ ކަރުދާހުގައި ވާގޮތުން، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމަށްފަހު ރައްޔިތުންގެ ސިއްރު ވޯޓަކުން 5 އަހަރުގެ ދައުރަކަށް ރައީސަކު އިންތިޚާބު ކުރާނެއެވެ. މިގޮތުން އިންތިޚާބުވާ ރައީސަކަށް ރައްޔިތުންގެ މަޖިލިސް އުވާލުމުގެ ބާރު ލިބިދިން ނަމަވެސް، ރައީސަށް މަޖިލިސް އުވާލެވޭނީ ސީދާ ގާނޫނު އަސާސީގައި ބަޔާންކުރާ އުސޫލުތަކެއްގެ މަތިންނެވެ.

އެހެންނަވެސް، އޭގެ އިތުރަށް ރައީސަކަށް ހުންނަވާ ބޭފުޅަކަށް ސަރުކާރު ހިންގުމާއި ގުޅޭގޮތުން މާބޮޑު ދައުރެއް ނޯވެއެވެ. އޭގެ ބަދަލުގައި، ރައްޔިތުންގެ މަޖިލިހުގައި ލާ ވޯޓަކުން ބޮޑުވަޒީރަކު އައްޔަން ކުރުމަށްފަހު ވެރިކަން ހިންގާނީ ބޮޑުވަޒީރު އައްޔަންކުރާ، މަޖިލިސް މެމްބަރުންގެ މައްޗަށް އެކުލެވޭ ކެބިނެޓަކުންނެވެ.

ގާސިމްގެ ވެރިކަމެއްގައި ރާއްޖޭގެ ވެރިކަމުގެ ނިޒާމު ބަދަލުކުރުމަށްފަހު އެކުލަވާލެވޭ ސަރުކާރެއްގެ ވެރިކަމުގެ އުސޫލުތައް ބަޔާންކުރާ މި ކަރުދާހުގައި ވާގޮތުން ބޮޑުވަޒީރުކަމަށް މަޖިލިހުން އައްޔަންކުރާ ބޭފުޅަކު ވަކިކުރުމުގެ ބާރު އޮންނަގޮތަށް ބަޔާން ކޮށްފައިވަނީ ރައީސުލުމްހޫރިއްޔާއަށާއި ރައްޔިތުންގެ މަޖިލީހުގެ އަޢުލަބިއްޔަތަށެވެ.

އޭގެ އިތުރުން، ރައީސުލްޖުމުހޫރިއްޔާއަކު ހުންނެވިނަމަވެސް، މި ކަރުދާހުގައި ބަޔާން ކޮށްފައިވާގޮތުން، ރައްޔިތުންގެ މަޖިލީހުގައި ސަރުކާރު ތަމްސީލު ކުރުމާއި، ސަރުކާރުގެ ފަރާތުން ޖަވާބުދާރީ ވާނީވެސް ބޮޑުވަޒީރުކަމަށް އައްޔަން ކުރެވޭ ބޭފުޅެކެވެ. ހަމައެއާއެކު، ސަރުކާރުގެ އިދާރާތާއް ގުޅިގެން މުޅި ސަރުކާރުގެ ހިންގުމުގެ ހުރިހާ މަސްއޫލިއްޔަތެއްވެސް އޮންނަ ގޮތަށް ހަމަޖައްސާފައިވަނީ ބޮޑުވަޒީރަކަށް ހުންނަވާ ބޭފުޅެކެވެ.

މި ބަދަލުތަކުގެ އިތުރުން ނަޝީދުވަނީ، ރައްޔިތުންގެ މަޖިލިސް އެތުރިގެންވާ ގޮތަށްވެސް ބޮޑެތި ބަދަލުތަކެއް ގެނައުމަށް ހުށަހަޅުއްވާފައެވެ. މިގޮތުން ރައްޔިތުންގެ މަޖިލިހަށް މެމްބަރުން އައްޔަކުރުމުގެ ފުރުސަތު ރައީސަށް ދެވިދާނެކަމަށް ބަޔާން ކޮށްފައިވި ނަމަވެސް، އެއަދަދު މަޖިލިހުގެ މެމްބަރުންގެ %40 އަށްވުރެ އިތުރުވެގެން ނުވާނެކަމަށްވެސް ބަޔާން ކޮށްފައި ވެއެވެ.

މިގޮތުން ރައްޔިތުންގެ މަޖިލިހުގެ މެމްބަރުންގެ އަދަދު ގާނޫނު އަސާސީގައި ބަޔާން ކުރުމުގެ އިތުރުން، ޕްރިފެރެންޝިއަލް ވޯޓިން ސިސްޓަމަކުން މަޖިލިހަށް މެމްބަރުން ހޮވުމަށާއި، އަންހެނުންނަށް ގޮނޑިތަކެއް ޚާއްސަ ކުރެވިދާނެކަމަށް ބަޔާންކޮށް، މި އުސޫލުން ވަކި ގިންތިތަކެއް ގާނޫނު އަސާސީގައި ބަޔާން ކުރުމަށްވެސް ނަޝީދު ހުށަހަޅުއްވާފައި ވެއެވެ. ހަމަ އެއާއެކު ރައްޔިތުންގެ މަޖިލިހަށް މެމްބަރުން އައްޔަން ކުރުމަށް ނޭޝަނަލް ލިސްޓު އެކުލަވާލާނެ ގޮތާއި، މި ނޭޝަނަލް ލިސްޓުގައި ޕާޓީތަކުގެ ކޮމްޕޮޒިޝަނާއި، ޕާޓީތަކުން މެމްބަރުން އައްޔަން ކުރާނެ އިޖުރާތުތައް ބަޔާން ކުރުމަށްވެސް މަޝްވަރާއަށް ނަޝީދު ހުށަހަޅުއްވާފައިވާ ކަރުދާހުގައި ބަޔާން ކުރައްވާފައި ވެއެވެ.

ނަޝީދުގެ ފިކުރެއްގެ ދިރުން-ޖޭޕީ ކޯލީޝަނެއްގައި ވެރިކަމުގެ ނިޒާމު ބަދަލުކުރުމަށް ނަޝީދު ހުށަހެޅުއްވި ނަމަވެސް، ގާސިމް އިބުރާހިމްވަނީ ވެރިކަމުގެ ނިޒާމު ބަދަލުކުރުމަށް މީގެ ކުރިން ދެކޮޅު ހައްދަވާފައެވެ. އަދި ގާސިމްގެ ވެރިކަމެއްގައި ގާނޫނު އަސާސީއަށް ބަދަލުގެނެސް، ވެރިކަމުގެ ނިޒާމު ބަދަލުކުރުމަށް ނަޝީދު ހުށަހަޅުއްވާފައިވާ އުސޫލުތަކަށް ބަލާއިރު، މި ބަދަލުތަކާއެކު ރައީސްކަމުގައި ހުންނަވާ ބޭފުޅަކަށް އޮންނަނީ ރަމްޒީ ދައުރެއްކަން ފާހަގަ ކޮށްލެވެއެވެ. އޭގެ ބަދަލުގައި، ވެރިކަމުގެ ހުރިހާ ބާރެއް ޖަމާވަނީ ބޮޑުވަޒީރުކަމުގެ މަގާމްގައި ހުންނަވާ ބޭފުޅެއްގެ މުށުތެރެއަށެވެ.