މި ދައުރުގެ ތެރޭގައި މިހާތަނަށް 127 ރަށަށް އެމްބިއުލާންސް ފޯރުކޮށްދީފައިވާ ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

މިއުވާން މިހެން ވިދާޅުވީ، މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، ނޫސްވެރިންގެ ފަރާތުން ލިބިފައިވާ ބައެއް ސުވާލުތަކުގެ ތަފްސީލު ހިއްސާކުރައްވަމުންނެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން މިއުވާން ވިދާޅުވީ، 127 ރަށަކަށް އެންބިއުލެންސް ފޯރުކޮށްދީފައިވާއިރު، އޭގެ ތެރޭގައި އަލަށް އެންބިއުލެންސް ފޯރުކޮށްދިން ރަށްތައްވެސް ހިމެނޭ ކަމަށެވެ. އަދި ބޭނުން ނުކުރެވޭ ހާލަތުގައި އެންބިއުލެންސް ހުރި ރަށްތައް ވެސް އޭގެ ތެރޭގައި ހިމެނޭ ކަމަށް މިއުވާން ވިދާޅުވީއެވެ.

މީގެ ތެރޭގައި އަލަށް އެމްބިއުލާންސް ފޯރުކޮށްދެވުނު ރަށްތައް ހިމެނޭ. އަދި މީގެ ކުރީގައި އެމްބިއުލާންސްތަކެއް ނަމަކަށް ހުރި ރަށްރަށްވެސް އެބަ ހިމެނޭ. އަދި އެމްބިއުލާންސްތަކެއްގެ ބަދަލުގައި ހަމައެކަނި ވެހިކަލްތަކެއް ބާއްވައިގެން އެމްބިއުލާންސްގެ ހިދުމަތް ދެމުންދިޔަ ރަށްރަށްވެސް ހިމެނޭ. އެހެންވީމާ މިހުރިހާ ރަށްރަށެއް ހިމެނޭގޮތައް މިހާތަނަށް 127 ރަށަކަށް އެންބިއުލެންސް ވަނީ ފޯރުކޮށްދެވިފަ.

– މިއުވާން ވިދާޅުވިއެވެ.

މީގެއިތުރުން، މިއުވާން ވިދާޅުވީ، އެމްބިއުލާންސް ފޯރުކޮށްދިނުމުގައި އެމްބިއުލާންސް ނެތް ރަށްރަށާއި އެމްބިއުލާންސް މަރާމާތުކުރަންޖެހިފައި ހުރި ރަށްރަށަށް އިސްކަންދޭ ކަމަށެވެ.

މިމަހުގެ 9 ވަނަދުވަހުވެސް މިނިސްޓްރީ އޮފް ހެލްތަށް އަށް ބޭނުންވާ 20 އެމްބިއުލަންސް އެއް ގަތުމަށް، ސްޓޭޓް ޓްރޭޑިންގް އޯގަނައިޒޭޝަން އާއި މިނިސްޓްރީ އޮފް ހެލްތް އާއި ދެމެދު އެއްބަސްވުމެއްގައި ސޮއި ކުރެވިފައިވެއެވެ. މި އެއްބަސްވުމުގެ ދަށުން، 90 ދުވަސްތެރޭގައި 20 އެމްބިއުލަންސް ގެނެސް ހަވާލުކުރެވޭނެކަމަށް އެސްޓީއޯ އިން މައުލޫމާތު ދެއެވެ.