ނ. މަނަދޫން އަނިޔާ ތަކަކާ އެކު މަރުވެފައި އޮއްވާ ފެނުނު އުމުރުން 62 އަހަރުގެ ނައީމާ މޫސާގެ މަރާ ގުޅޭ އެއްވެސް މައުލޫމާތެއް ލިބިފައިވާ ނަމަ ފުލުހުންނާ ހިއްސާ ކޮށްދިނުމަށް އެ މުއައްސަސާއިން އެދެފިއެވެ.
ނައީމާގެ މަރާ ގުޅޭގޮތުން ފުލުހުން މިރޭ ނެރުނު ނޫސް ބަޔާނުގައި ބުނެފައިވަނީ އޭނާގެ މަރުގައި ތުހުމަތު ކުރެވޭ ކަންތައްތަކެއް ފާހަގަކުރެވިފައިވާ ކަމަށާއި، މައްސަލައިގެ ތަހުގީގު ކުރިއަށް ގެންދަނީ ހޮމަސައިޑް އިންވެސްޓިގޭޝަނެއްގެ ގޮތުގައި ކަމަށެވެ. އެގޮތުން ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ޚާއްސަ ތަހުގީގު ޓީމަކާއި ފޮރެންސިކް ތަހުގީގު ޓީމެއްގެ އިތުރުން ފޮރެންސިކް ޕެތޮލޮޖިސްޓެއް ނ. މަނަދޫގައި ދަނީ ހަރަކާތްތެރި ވަމުންނެވެ.
ކަށުކަމާކެމީގެ ކަންކަން ނިންމުމަށްފަހު ނައީމާގެ ހަށިގަނޑު ވަޅުލާާފައި ވަނީ އިއްޔެ މަގުރިބު ނަމާދަށް ފަހު މަަނަދޫގައެވެ. ނައީމާގެ ހަަށިގަނޑު ވަޅުލި އިރު އިތުރު ތަަހުލީލަށް ބޭނުންވާ ސާމްޕަލްތައް އެމައްސަަލަ ތަހުގީގު ކުރުމަށް އެ ރަށަަށް ގޮސް އުޅޭ ފޮރެންސިކް ޓީމުން ނަގާާފަައިވާ ކަމަށް މައުލޫމާތު ލިބެއެވެ.
ނައީމާގެ މަރުގެ މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާއިރު، އެ ރަށުގައި ފުލުހުން އަންނަނީ ހަރަކާތްތެރިވަަމުންނެވެ. އޭނާ މަރާލާފައި އޮއްވާ ފެނުނީ މިދިޔަ ބުރާސްފަތި ދުވަހުން ފެށިގެން ހަބަރެއް ނުވާތީ އާއިލާއިން ފުލުހުންނަށް އެންގުމުން ފުލުހުން އެގެއަށް ގޮސް ބެލި ބެލުމުންނެވެ.
މައުލޫމާތު ލިބިފައިވާ ގޮތުގާ ނައީމާގެ ހަށިގަނޑުގެ އެތަންމިތަނަށް ތޫނު އެއްޗަކުން ވަނީ ހަމަލާ ދީފައެވެ. ނައީމާގެ މަރާ ގުޅޭ އެއްވެސް ތަފްސީލެއް އަދި ފުލުހުން ހާމަކޮށްފައެއް ނުވެއެވެ. އޭނާގެ މަރުގައި އިތުރަށް ބަލަން ޖެހޭ ކަންތައްތަކެއް ހުރުމުން، ފުލުހުންނަށް ނާންގާ އެއްވެސް އުޅަނދެއް މަނަދޫއިން ބޭރަށް ނުދިއުމަށް އެރަށު ކައުންސިލުން ވަނީ އާންމުކޮށް އަންގާފަ އެވެ. ހަމައެއާއެކު ރަށަށް ދާ މީހުން ވެސް ފުލުހުންނަށް އަންގާފައި ދިއުމަށް ވެސް ކައުންސިލުން އަންގާފައި ވެއެވެ.
