ކުރިއަށް އޮތް ރިޔާސީ އިންތިޚާބުގައި ނިކުންނަވާނީ ރައްޔިތުންނާއެކު ރައްޔިތުންގެ ކޯލިޝަނަކުން ކަމަށާއި، އެއްވެސް ޕާޓީއަކާއިއެކު ކޯލިޝަން ނަހަދާނެކަމަށް ރިޔާސީ ރޭހުގައި ވާދަކުރަން ނިންމާފައިވާ ޑރ.މުނައްވަރު ވިދާޅުވެއްޖެއެވެ.
ރިޔާސީ ރޭހުގައި ވާދަކުރާނެކަން އިއުލާން ކުރުމަށް ބޭއްވި ޕްރެސްގައިވެސް މުނައްވަރު ވަނީ ރިޔާސީ އިންތިޚާބުގައި ވާދަކުރަނީ ޤައުމުގެ މައްސަލަތައް ހައްލުކޮށް، މިނިވަންކަމާއި ސިޔާސަތަދާއި އިސްތިގުލާލު ރައްކާތެރި ކުރުމަށް ކަމަށެވެ. އަދި އޭނާ އިންތިޚާބުގައި ވާދަކުރަނީ ވަކި މީހަކު ބުނެގެން އަދި ވަކި ހިސާބަކުން ނަން ނަގައި ލިބޭ މަޤާމަކަށް ނަން އަބުރާ ނަގާގޮތަށް ނޫންކަމަށެވެ.
މުނައްވަރު އިންތިޚާބުގައި ވާދަކުރައްވަން ނިންމަވާފައިވާއިރު، އޭނާއަށްވެސް ދަނީ ކޯލިޝަން ހެދުމުގެ ދައުވަތު ދެމުންނެވެ. އެގޮތުން ޖުމްހޫރީ ޕާޓީން ވަނީ މުނައްވަރަށް ކޯލިޝަން ހެދުމުގެ ދައުވަތު ދީފައެވެ.
މިދައުވަތާއި ގުޅިގެން ނުވައްވަރު ވިދާޅުވީ އޭނާ ރިޔާސީ ރޭހަށް ނިކުންނެވީ އެއްވެސް ސިޔާސީ ޕާޓީއަކާއި ކޯލިޝަން ހެދުމުގެ ނިޔަތުގައި ނޫންކަމަށެވެ. އޭނާ ކޯލިޝަން ހަދާނީ ދިވެހި ރައްޔިތުންނާއި ކަމަށެވެ. ރައްޔިތުންނާއިއެކު ކުރިއަށް ގޮސް ރިޔާސީ އިންތިޚާބުގައި ވާދަކޮށް އިިންތިޚާބު ކާމިޔާބު ކުރުމަކީ ވިސްނުންކަމަށް މުނައްވަރު ވިދާޅުވިއެވެ.
ރިޔާސީ އިންތިޚާބުގައި ވާދަކުރާނެކަން ހާމަކޮށް މުނައްވަރު މިދިޔަ މަހުގެ 12 ވަނަ ދުވަހު ބޭއްވި ޕްރެސްގައި ވިދާޅުވީ ކުރިއަށް އޮތް ރިޔާސީ އިންތިޚާބުގައި ވާގަދަ ކުރުމަށް ނިންމީ ޤައުމުގެ ހާލަތު އެކަމަށް މަޖުބޫރު ކުރުމުން ކަމަށާއި، ވެރިކަމަށް ކުރިމަތިލުމަށް ނިންމި ނިންމުން ބަދަލުކޮށް ނަންނަގާނެ އެއްވެސް ހާލަތެއް ނާންނާނެކަމަށެވެ.
އޭނާ ވިދާޅުވީ ކުރިއަށް އޮތް ރިޔާސީ އިންތިޚާބުގައި ވާދަކުރުމަށް ނިންމީ އެއްވެސް ސިޔާސީ ލީޑަރަކާއި މަޝްވަރާ ކުރައްވާފައި ނުވާނެކަމަށެވެ. އަދި ކުރިއަށް އޮތް ތަނުގައިވެސް ކުރިމަތި ލުމާއި އަދި ވަކި މީހެއްގެ ފަހަތަށް އަރުމަށާއި، ސިޔާސީ މަންފާއަކަށް ނަން ނެގުމާއި ގުޅޭގޮތުން ކުރާނެ މަޝްވަރާއެއް ނޯންނާނެކަމަށެވެ. ނަމަވެސް ރައްޔިތުންގެ ވެރިކަން ގާއިމް ކުރުމަށް ކުރަންޖެހުނު ކޮންމެ މަސައްކަތެއް ކުރައްވާނެކަމަށް މުނައްވަރު ވިދާޅުވިއެވެ.
