ބަދުރު ހަނގުރާމައިން ދަސްކޮށްދޭ ފިލާވަަޅަކީ، ނަސްރު ލިބޭނީ އެންމެން އެކަތިގަޑަކަށްވެ، ﷲގެ ދީނުގައި ހިފަހައްޓައިގެންކަން ކަމުގައި މިއަދުގެ ހުކުރު ޚުތުބާގައި ވިދާޅުވެއްޖެއެވެ.
"ބަދުރު ހަނގުރާމާއިގެ ފިލާވަޅުތައް"، މި މައުޟޫއަށް ޚާއްސަ ކުރެވިގެންދިޔަ ޚުޡުބާގައި ވިދާޅުވީ ބަދުރު ހަނގުރާމައިން ދަސްކޮށްދޭ އަނެއް ފިލާވަޅަކީ ބައިބައިވުމާއި ވަކިވުމުގެ ނުރައްކާތެރިކަން ކަމުގައެވެ.
މުސްލިމް އަޚުންނޭވެ! ދާދި އަވަހަށް މި ބަރަކާތްތެރި ރަމަޟާން މަހުގެ ފަހުދިހައިގެ ބަރަކާތްތެރި ރޭތަކާއި ދުވަސްތައް އަހަރެމެންނާ ބައްދަލު ކުރާނެއެވެ. އެ ރޭތަކާއި ދުވަސްތަކުގައި ހަވާ ނަފްސުގެ މައްޗަށް ޖިހާދުކޮށް ނަސްރު ހޯދާށެވެ! ރަމަޟާންމަހުގައި ހިނގާފައިވާ ތާރީޚީ ހާދިސާތަކުން އެނގި ކަށަވަރުވަނީ، ރަމަޟާންމަހަކީ، މުރާލިކަމާއި ހީވާގިކަން އިސްކޮށް ގަދައަޅައި މަސައްކަތް ކުރުމުގެ މައްސަރު ކަމެވެ. އެމައްސަރުގައި، ކަންނެތްކަމަށް ޖާގައެއް ނެތްކަމެވެ.
މިއަދުގެ ޚުޡުބާގައި ވިދާޅުވެފައި ވެއެވެ.
ޚުޡުބާގައި އިތުރަށް ވިދާޅުވި ގޮތުގައި ރަމަޟާންމަހަކީ އިސްލާމްދީނުގެ ހިދާޔަތު ފާޅު ކުރައްވާ، ހައްގާއި ބާތިލް ވަކިކޮށްދެއްވި ފޮތް، ކީރިތި ޤުރުއާން ބާވައިލެއްވި މައްސަރު ކަމުގައެވެ. އަދި ރަމަޟާން މަހަކީ، ޝިރުކާއި، ކުފުރާއި، ޖާހިލިއްޔަތުގެ އަހުލުވެރިންގެ މައްޗަށް ހަނގުރާމާއިގެ މައިދާނުގައި ހައްގަށް ނަސްރު ދެއްވި، ބަދުރު ހަނގުރާމަ ހިނގި މައްސަރުކަމުގައިވެސް ޚުޡުބާގައި ވިދާޅުވެފައި ވެއެވެ.
މުސްލިމް އަޚުންނޭވެ! ބަދުރު ހަނގުރާމައަކީ އިބުރަތުން ފުރިގެންވާ މަތިވެރި ހާދިސާއެކެވެ. އެ ހަނގުރާމަ ހިނގާފައިވަނީ، ހިޖުރައިން ދެވަނަ އަހަރު، ރަމަޟާންމަހުގެ ސަތާރަވަނަ ދުވަހުއެވެ. އެދުވަހުގައި ގުރައިޝް ވަންހައިގެ ބޮޑުން، ނިކުތީ ބޮޑާކަމާއި ކިބުރުވެރިކަމާ އެކުއެވެ. ބަދުރަށް ގޮސް، އެތަނުގައި ކައިބޮއި، ކުޅިވަރުކުޅެ، މަޖާ ކޮށްފައި ނޫނީ އެނބުރި މައްކާއަށް ނުދާނަމޭ ބުނެ، ބޮޑާކަމާއި ކިބުރުވެރިކަމުގެ ބަސްތައް ބުނަމުންނެވެ. އެމީހުންގެ ނުފޫޒާއި ބާރު އަރަބީންނަށް ފެނި، އެމީހުން ދެކެ ޖެހިލުންވެ ބިރުގަންނާނެކަމަށް ހީކޮށްގެންނެވެ.
ޚުޡުބާގައި ބަޔާން ކޮށްފައި ވެއެވެ.
ޚުޡުބާގައި ވިދާޅުވި ގޮތުގައި ބަދުރުގެ ހާދިސާއިން އަންގައިދެނީ ﷲގެ ދީނަށްޓަކާ ވާންޖެހޭ ގުރުބާނީގެ މަތިވެރިކަން ކަމުގައެވެ. އެގުރުބާނީގައި މަތިވެރި އަސްހާބުން ދައްކަވާފައިވާ ރިވެތި ނަމޫނާ ކަމުގައެވެ. އަދި އޭގެ އިތުރުން އިސްލާމް ދީނުގައި މަޝްވަރާއަށް ބާރުއަޅުއްވާފައިވާ މިންވަރު ކަމުގައެވެ.
